'ఆదిపురుష్' రూపంలో అతి పెద్ద సినిమా పండుగ వచ్చేసింది. రామ కథను మరోసారి వెండితెరపై చూడటం కోసం ప్రేక్షకులు ఎంతగానో ఎదురుచూశారు. పాన్ ఇండియా స్టార్ ప్రభాస్ శ్రీరాముడిగా నటించిన 'ఆదిపురుష్' నేడు(జూన్ 16) ప్రేక్షకుల ముందుకు వచ్చేసింది. ప్రేక్షకులు థియేటర్లకు పెద్ద ఎత్తున తరలి వెళ్తున్నారు. ఇప్పటికే చాలా చోట్ల మొదటి షోలు పూర్తయ్యాయి. సినిమాకి మంచి టాకే వస్తోంది. ముఖ్యంగా ఫస్టాఫ్ అదిరిపోయింది అంటున్నారు.

రామాయణం ఆధారంగా ఎన్ని సినిమాలు వచ్చినా, రామాయణంపై మరో కొత్త సినిమా వస్తుందంటే చాలు ప్రేక్షకులు ఆసక్తి చూపిస్తూనే ఉంటారు. పైగా ఈ తరానికి రామ కథను తెలియజేయడం కోసం ప్రభాస్ వంటి స్టార్ ని ఎంచుకోవడంలోనే మేకర్స్ సగం విజయం సాధించారు. మొదట్లో పాత్రల వేషధారణ, వీఎఫ్ఎక్స్ విషయంలో విమర్శలు వచ్చినా.. అవేవీ ప్రేక్షకులను థియేటర్ల దగ్గరకు రాకుండా ఆపలేకపోయాయి. ఈ చిత్రానికి రికార్డు స్థాయి ఓపెనింగ్స్ వస్తున్నాయి. టాక్ కూడా పరవాలేదు అన్నట్టుగా ఉంది. ఇప్పటికే సినిమా చూసిన వారిలో దాదాపు అందరూ ఫస్టాఫ్ అమోఘం అంటున్నారు. డ్రామా బాగా పడిందని చెబుతున్నారు. సెకండాఫ్ కాస్త డల్ అయినప్పటికీ ఓవరాల్ గా సినిమా బాగానే ఉంది అంటున్నారు. అయితే రావణాసుర పాత్ర చిత్రీకరణ, యాక్షన్ సన్నివేశాల వీఎఫ్ఎక్స్ గురించి మాత్రం నెగటివ్ కామెంట్స్ వినిపిస్తున్నాయి. ఇక రాముడిగా ప్రభాస్ అద్భుతంగా ఉన్నాడని, అలాగే సంగీతం ఈ సినిమాకి ప్రధాన బలంగా బలంగా నిలిచిందని చెబుతున్నారు. మొత్తానికి ఈ తరానికి రామ కథను తెలియజేయాలనే ప్రయత్నానికి ప్రశంసలు దక్కుతున్నాయి.