అపరకోటీశ్వరుడు చక్రవర్తి (మోహన్‌బాబు) తమ్ముడు కళ్యాణ్‍ (శర్వానంద్) బాధ్యతలు లేకుండా, కుటుంబ సంబంధాలకు విలువ ఇవ్వకుండా తిరుగుతుంటాడు.అతనికి వెయిటింగ్ అంటే అస్సలు పడదు. అతన్ని బిందు అనే అమ్మాయి ప్రేమిస్తుంటుంది. కానీ తన ప్రేమను కళ్యాణ్‍కి చెప్పదు. కానీ కళ్యాణ్‍ మరో అమ్మాయిని చూసి ప్రేమిస్తున్నానని చెపుతాడు. కానీ ఆ అమ్మాయి అతని ప్రేమను తిరస్కరిస్తుంది. దాంతో పరీక్షల్లో పాసయిన ఆమెను కళ్యాణ్‍ తప్పేలా చేస్తాడు.ఆమె ధ్యాసలో పిచ్చి వాడవుతాడేమోనని అతని వదిన (రమ్యకృష్ణ) కళ్యాణ్‍తో ఓ పది రోజులు స్నేహంగా ఉండమని ఆమెను రిక్వెస్ట్ చేస్తుంది.దానికామె ఒప్పుకుని అలాగే ఉండగా, ఒకరోజు తన ప్రియురాలిని కలవటానికి జీప్‌లో వేగంగా వస్తున్న కళ్యాణ్‍ అడ్డం వచ్చిన ఒకతన్ని గుద్దేసి వస్తాడు.ఆ యాక్సిడెంట్‍లో అతను చనిపోతాడు. అతను తను ప్రేమించిన అమ్మాయి తండ్రి (నాజర్). దాంతో ఆ అమ్మాయి కళ్యాణ్‍ మీద కేసు పెట్టి పోలీస్‌స్టేషన్‌లో పెట్టిస్తుంది. చక్రవర్తి వచ్చి తన తమ్ముణ్ణి కాపాడమని ఆమెను రిక్వెస్ట్ చేస్తాడు. దానికామె మీ ఆస్తంతా నాకు వ్రాసిస్తే కేసు వాపసుతీసుకుంటానంటుంది. చక్రవర్తి అలాగే చేసి తమ్ముణ్ణి బయటకు తెస్తాడు. అప్పటి నుంచీ కళ్యాణ్‍కి లోకం అంటే బంధాలంటే ఏమిటో అర్థమవుతుంది. అతను ఒక ఉద్యోగం సంపాదించి అక్కడ మంచి పేరు తెచ్చుకుంటే అక్కడ కొందరు అమ్మాయిలు అతను మమ్మల్ని ఏడిపిస్తున్నాడని అతని ఉద్యోగం పోయేలా చేస్తారు. దానికి కారణం కళ్యాణ్‍ ప్రేమించిన అమ్మాయి. ఒకసారి ఒక టెండరు తమకే వచ్చిందన్న సంతోషకరమైన వార్తను తన తమ్ముడికి చెప్పాలని అతని ఆఫీసుకి వెళ్ళగా అతన్ని తీసేశారని తెలుసుకున్న చక్రవర్తి బస్సెక్కి కుప్పకూలిపోతాడు. ఆ బస్సుకి కండక్టరుగా కళ్యాణ్‍ పనిచేస్తుంటాడు.అన్న హాస్పిటల్లో ఉన్నాడని వదినకు తెలిస్తే ఆమె ఎక్కడ బాధపడుతుందోనని ఆమెకు చెప్పకుండా ఆ విషయం దాస్తాడు కళ్యాణ్‍. కళ్యాణ్‍ ప్రేమించిన అమ్మాయి ఆ విషయాన్ని కళ్యాణ్‍ వదినకు చెపుతుంది. దాంతో ఆమె హాస్పిటల్‍కి వెళ్ళి అక్కడ కనపడిన కళ్యాణ్‍ని చెంపలు పగలకొడుతుంది. అన్నయ్యను కాపాడే బాధ్యత నాది వదినా అని కళ్యాణ్‍ వదినకు మాటిస్తాడు. కానీ చక్రవర్తి ఆపరేషన్‌కి కావలసిన డబ్బుని కళ్యాణ్‍కి దొరకకుండా అతని ప్రియురాలు నానా బాధలూ పెడుతుంది. చివరికి తన కిడ్నీ అమ్మి తన అన్నను కాపాడదామనుకుంటే అన్నయ్య ప్రత్యర్థులు ఆ డబ్బిచ్చే మనిషిని దాచేస్తారు. కళ్యాణ్‍ తన అన్నను ఎలా కాపాడుకున్నాడు...? అతని ప్రియురాలు ఎందుకు అతని మీద పగబట్టినట్టు ప్రవర్తించింది...? వంటి ప్రశ్నలకు సమాధానం కావాలంటే ఈ చిత్రం సకుటుంబ సమేతంగా చూడాలి.

ఎనాలసిస్ :

ఈ సినిమా చూసిన వారికి సీనియర్ దర్శకుడు ముత్యాల సుబ్బయ్య దర్శకత్వం వహించాడేమోననిపిస్తుంది. ఎందుకంటే ఈ చిత్రంలోని సెంటిమెంట్‍ సీన్లు అలా పండాయి. భానుశంకర్ అదేనండీ దుర్గాశంకర్‌నాథ్ స్క్రీన్‌ప్లే చాలా బాగుంది. అతని దర్శకత్వం టేకింగ్ పరంగా కూడా బాగానే ఉంది.ఇక సీన్‌కీ సీన్‌కీ మధ్య లింక్‌లు, లీడ్‌లు ఈ సినిమాని ఆసక్తికరంగా మలచాయి. ఇతనికి దర్శకుడిగా చక్కని భవిష్యత్తుంది. ఈ సినిమాని ప్రేక్షకజనరంజకంగా మలచటంలో అతను సఫలీకృతుడయ్యాడు. నిర్మాణపు విలువలు చాలా బాగున్నాయి. డాక్టర్ వంటి చిన్న పాత్రకు కూడా రంగనాథ్ వంటి సీనియర్ నటుణ్ణి తీసుకున్నారు. దీన్ని బట్టి రాజీపడకుండా ఈ సినిమా తీశారని అర్థమవుతుంది.

తెలుగుఒన్ పర్‌స్పెక్టివ్:

నటన -: మోహన్‌బాబు చక్రవర్తి పాత్రలో చాలా హుందాగా నటించారు.అతని భార్యగా నటించిన రమ్యకృష్ణ ఆ పాత్రకు ప్రాణం పోసింది. శర్వానంద్ తన పాత్ర పోషణలో చాలా పరిణితి చూపించాడు. చాలా బ్యాలెన్స్‌డ్‌ గా నటించాడు. ముఖ్యంగా సెంటిమెంట్‍ సీన్లలో అతని నటన ప్రేక్షకులనాకట్టుకుంటుంది.ఇక పాటల్లో, యాక్షన్ సీన్లలో అతని స్టైల్‍ బాగుంది. ఇక హీరోయిన్లు ఎవరి స్థాయికి తగ్గట్టు వారు బాగానే నటించారు. ఓం రాజాగా బ్రహ్మానందం, దత్తుగా ధర్మవరపు సుబ్రహ్మణ్యం, గోపాత్రగా సునీల్‍ ప్రేక్షకులను కాసేపు నవ్విస్తారు. ముఖ్యంగా శర్వానంద్ మందు కొట్టినప్పుటి సీన్లో బ్రహ్మానందం, ధర్మవరపు సుబ్రహ్మణుం, యల్‍.బి. శ్రీరామ్ లనటన బాగుంది. సంగీతం -: చక్రి సంగీత దర్శకత్వంలో వచ్చిన పాటల్లో అన్నీ బాగున్నా ముఖ్యంగా భాస్కరభట్ల వ్రాసిన ఫ్యామిలీ సెంటిమెంట్‍ సాంగ్ ప్రేక్షకుల హృదయాలను తాకుతుంది. ఇక నేపథ్య సంగీతం ఈ సినిమాకు ప్రాణం పోసిందని చెప్పాలి. సెంటిమెంట్‍ సీన్లలో కె.యమ్‌‍.రాధాకృష్ణ హిందుస్థానీ ఆలాపన మనసులకు హత్తుకునేలా ఉంది. కెమెరా -: కన్నుల పండుగ్గా ఉంది. మాటలు -: ఈ చిత్రానికి జీవన్‌ సత్యం రాసిన మాటలు జీవిత సత్యాలను తెలియపరిచేలా వున్నాయి. ఎడిటింగ్ -: బాగుంది. కానీ కొంచెం క్రిస్ప్ గా కట్‍చేస్తే ఇంకా బాగుండేదేమో. యాక్షన్ -: ఈ సినిమాలో రెండే రెండు యాక్షన్ సీన్లున్నాయి. ఒకటి మోహన్ బాబుతో, మరొకటి క్లైమాక్స్ లో శర్వానంద్‌తో.ఈ రెండూ బాగానే ఉన్నాయి. చాలాకాలం తర్వాత సెంటిమెంట్‍తో కూడిన సకుటుంబ కథా చిత్రం తెలుగులో వచ్చింది. ఈ సినిమా సకుటుంబంగా చాలా హ్యాపీగా, ధైర్యంగా చూడొచ్చు.