తారాగణం: అజిత్‌ కుమార్, త్రిష, అర్జున్ సర్జా, రెజీనా కసాండ్రా తదితరులు
సంగీతం: అనిరుధ్
డీఓపీ: ఓం ప్రకాష్
ఎడిటర్: ఎన్.బి. శ్రీకాంత్
దర్శకత్వం: మగిజ్‌ తిరుమేని 
నిర్మాత: సుభాస్కరన్ 
బ్యానర్: లైకా ప్రొడక్షన్స్ 
విడుదల తేదీ: ఫిబ్రవరి 6, 2025

కోలీవుడ్ స్టార్ అజిత్‌ కుమార్ (Ajith Kumar) కథానాయకుడిగా నటించిన చిత్రం 'విదాముయార్చి' (Vidaamuyarchi). తెలుగులో 'పట్టుదల' పేరుతో విడుదలైంది. మగిజ్‌ తిరుమేని దర్శకత్వంలో లైకా ప్రొడక్షన్స్ బ్యానర్ పై సుభాస్కరన్ నిర్మించారు. త్రిష కథానాయికగా నటించిన ఈ సినిమాలో అర్జున్ సర్జా, రెజీనా కసాండ్రా కీలక పాత్రలు పోషించారు. తెలుగులో పెద్దగా అంచనాలు లేకుండా థియేటర్లలో అడుగుపెట్టిన ఈ 'పట్టుదల' చిత్రం, ఎలా ఉందో రివ్యూలో తెలుసుకుందాం. (Pattudala Movie Review)

కథ:
అర్జున్ (అజిత్ కుమార్), కాయల్ (త్రిష) ప్రేమించి పెళ్లి చేసుకుంటారు. 12 ఏళ్ళ తర్వాత మరో వ్యక్తిని ప్రేమించిన కాయల్, తన భర్త నుంచి విడాకులు తీసుకోవాలని నిర్ణయించుకుంటుంది. భార్యను ఎంతో ప్రేమించే అర్జున్, ఆమెతో కలిసి చివరి ప్రయాణం చేయాలనే ఉద్దేశంతో.. పుట్టింటి దగ్గర దిగబెడతానని అంటాడు. అలా భార్యాభర్తలు ఇద్దరూ కారులో బయలుదేరుతారు. ఈ ప్రయాణంలో వారికి ఊహించని సంఘటలు ఎదురవుతాయి. కాయల్ మిస్ అవుతుంది. ఆమెని ఎవరు కిడ్నాప్ చేశారు? ఎందుకు చేశారు? ఈ ప్రయాణంలో ఎదురైన దీపిక (రెజీనా), రక్షిత్ (అర్జున్) పాత్రలు ఏంటి?. భార్య కాయల్ ను కాపాడుకోవడం కోసం అర్జున్ ఏం చేశాడు? చివరికి కాయల్ ను కాపాడుకోగలిగాడా? అనేది సినిమా చూసి తెలుసుకోవాలి.

ఎనాలసిస్ :

1997లో వచ్చిన అమెరికన్ క్రైమ్ థ్రిల్లర్ 'బ్రేక్‌డౌన్'కి ఆధారంగా పట్టుదల రూపొందింది. ఓటీటీల పుణ్యమా అని ప్రపంచ సినిమా అర చేతిలోకి వచ్చిన ఈరోజుల్లో రీమేక్ ల జోలికి వెళ్లడం సాహసమనే చెప్పాలి. ఒకవేళ రీమేక్ చేసినా.. ఇక్కడికి తగ్గట్టుగా కొత్త మెరుపులు ఏమైనా జోడించాలి లేదా ఒరిజినల్ కి మించిన థ్రిల్ ను పంచాలి. కానీ పట్టుదల విషయంలో అదేదీ జరగలేదు. అసలు కథలోకి వెళ్ళడానికి దర్శకుడు చాలా సమయం తీసుకున్నాడు. మొదటి గంట అజిత్-త్రిష మధ్య వచ్చే సన్నివేశాలు చప్పగా సాగాయి. కాయల్ (త్రిష) కిడ్నాప్ తర్వాతే కథ ఆసక్తికరంగా మారుతుంది. ఇంటర్వెల్ సన్నివేశాలు మెప్పిస్తాయి. కానీ సెకండ్ హాఫ్ లో మళ్ళీ అదే తంతు. ఊహకందే కథనంతో ఏమాత్రం ఇంట్రెస్టింగ్ గా లేకుండా సినిమా సాగుతుంది. అసలు ఇలాంటి కథను ఎంచుకున్నప్పుడు స్క్రీన్ ప్లేతో మ్యాజిక్ చేయాలి. తర్వాత ఏం జరుగుతుందోనన్న ఉత్కంఠను ప్రేక్షకులలో క్రియేట్ చేయగలగాలి. కానీ ఆ విషయంలో దర్శకుడు విఫలమయ్యాడు. విజువల్ గా 'పట్టుదల' బాగుంది. దర్శకుడిగా మగిజ్‌ తిరుమేని మేకింగ్ స్టైల్ మెప్పించింది. కానీ రచయితగా మాత్రం ఆయన తడబడ్డాడు. అదే సినిమాకి మైనస్ గా మారింది. పైగా సినిమా చూస్తున్నప్పుడు ఇలాంటి కథకి అజిత్ లాంటి స్టార్ అవసరం లేదేమో అనే ఫీలింగ్ కలుగుతుంది.

అనిరుధ్ మ్యూజిక్ లో పెద్దగా మెరుపుల్లేవు. పాటలు, నేపథ్య సంగీతం జస్ట్ ఓకే అనేలా ఉన్నాయి. ఓం ప్రకాష్ సినిమాటోగ్రఫీ ఆకట్టుకుంది. సినిమాకి ప్రధాన బలంగా కెమెరా పనితనం నిలిచింది. ఎన్.బి. శ్రీకాంత్ ఎడిటింగ్ ఇంకా క్రిస్పీగా ఉండాల్సింది. నిర్మాణ విలువలు బాగున్నాయి. తెలుగు డబ్బింగ్ తేలిపోయింది. 

నటీనటుల పనితీరు:
అజిత్ తనదైన స్క్రీన్ ప్రజెన్స్ తో మెప్పించాడు. లుక్స్ బాగున్నాయి. యాక్షన్ సీక్వెన్స్ లతో పాటు, ఎమోషన్ సీన్స్ లోనూ తన మార్క్ చూపించాడు. త్రిష తనదైన నటనతో ఆకట్టుకుంది. ముఖ్యంగా ఎమోషనల్ సన్నివేశాల్లో మెప్పించింది. అర్జున్ సర్జా, రెజీనా కసాండ్రా వారి పాత్రలకు న్యాయం చేశారు.

తెలుగుఒన్ పర్‌స్పెక్టివ్:

కథనంలో పట్టుతప్పిన 'పట్టుదల' ప్రయాణం అంత ఆసక్తికరంగా సాగలేదు.