ఒక తాండాలో ఒక పోలీసాఫీసర్ భార్య(శరణ్య)తన భర్త కనపడటం లేదని పోలీస్ స్టెషన్ కి వెళ్ళి అడిగితే అక్కడి పోలీసాఫీసర్లు నిర్లక్ష్యంగా సమాధానం చెపుతారు.దాంతో తన భర్త వెళ్ళిన అల్ సలీమ్(మనోజ్ వాజ్ పాయ్)అనే గూండా దగ్గరికి వెళితే అతను ఆమెను చంపబోతాడు.కానీ ఆమె తప్పించుకుని అయ్యప్ప గుడిని చేరి,ఆ దేవుణ్ణి తనకు అన్యాయానికి ప్రశ్నిస్తుంది.దానికి సమాధానంగా ఆమెకు వేవిళ్ళు అవుతాయి.ఆమె ఆ గుళ్ళోనే నిండు గర్భవతిగా ఉన్నప్పుడు మళ్ళీ అల్ సలీమ్ చంపటానికి ప్రయత్నిస్తే అతన్నుంచి తప్పించుకుని ఒక లోయలో నీళ్ళల్లో పడి అక్కడే ఒక మగబిడ్డకు జన్మనిస్తుంది.ఆ బిడ్డను పోలీసాఫీసర్ని చేస్తుంది.అతనే కొమరం పులి (పవన్ కళ్యాణ్).మలేసియా వెళ్ళిన మన ప్రథాన మంత్రిని నిక్సన్ అనే మాఫియా డాన్ చంపబోతే పులి ఆయన్ని కాపాడతాడు.దానికి ప్రతిగా పులిని ప్రథాన మంత్రి గౌరవించబోతే తనకా గౌరవం వద్దనీ,పోలీస్ స్టెషన్ కి వెళ్ళిన ప్రజలకు న్యాయం జరుగక పోతే,ఆ పోలీసాఫీసర్ తోనే న్యాయం చేయించేలా తనకు ఒక టీమ్ నివ్వాలనీ కోరతాడు పులి.అప్పటి నుంచీ ఎవరికి పోలీస్ స్టెషన్లో న్యాయం జరక్కపోయినా పులికి ఫోన్ చేయటం వారికి పులి న్యాయం జరిగేలా చూడటం జరుగుతుంటుంది.పిచ్చాసుపత్రి నుంచి ఒకావిడ(ఆలపాటి లక్ష్మి)పులికి ఫోన్ చేసి తన ఒక్కగానొక్క కొడుకు హుస్సేన్ని పోలీసాఫీసర్ ను చేస్తే అతనే కనపడకుండా పోయాడని చెప్పినా పోలీసులు పట్టించుకోలేదని ఆమె పులికి చెపుతుంది.హుస్సేన్ గురించి విచారిస్తున్న పులికి తీగలాగితే డొంక కదిలినట్టు,అంతర్జాతీయ స్థాయికి ఎదిగిన మాఫియా డాన్ అల్ సలీమ్ ఎదురవుతాడు.అల్ సలీమ్ ని పులి ఎలా ఎదుర్కొన్నాదనేది మిగిలిన కథ.

ఎనాలసిస్ :

యస్.జె.సూర్యలో ఉన్న పర్ వర్షన్ ఈ సినిమాలో బాగా కనిపించింది.పులిని అతని తల్లి నీళ్ళల్లో కనటం కొంచెం విపరీతంగా అనిపిస్తుంది.ఆడదానికి ఒక బిడ్డకు జన్మనివ్వటం అంటే చచ్చి బ్రతికినంతపని.మరో జన్మ ఎత్తినట్లే.అలాంటిది ఎవరి సాయం లేకుండా ఒక ఆడ మనిషి స్వయంగా పురుడు పోసుకోవటమే దాదాపు అసాథ్యం అయితే ఆ పురుడు ఒక లోయలో పడి,కాళ్ళు అందీ అందని లోతులో నిలబడి బిడ్డను కనటం ఒక్క ఈ కొమరం పులి చిత్రంలోనే సాథ్యం.ఇక పులి మలేసియాలో ప్రథాన మంత్రిని కాపాడే సీన్లో బిల్డింగుల మీద నుంచి ఎగరటం,పక్కా ప్రణాళికతో ప్లాన్ చేసుకున్న మాఫియా బ్యాచ్ ని రక రకాలుగా చంపటం కూడా హాలీవుడ్ సినిమా "మాట్రిక్స్"స్థాయిలో చిత్రీకరించాలని ప్రయత్నించినా అది సైంటిఫిక్ మూవీ...ఇది కొమరం పులి చిత్రం.ఆ టైపు ఫైట్లు ఎందుకనో ఈ సినిమాలో సెట్ కాలేదనిపిస్తుంది.ఒక అంతర్జాతీయ స్థాయి మాఫియా డాన్ నో పార్కింగ్ లో పెట్టిన కారుని పోలీసోళ్ళు తీసుకెళ్తే అంతగా ఎందుకు గింజుకుంటాడో మనకర్థం కాదు.ఇక హీరోయిన్ని డ్యూప్లికేట్ పోలీస్ గా పరిచయం చేసే బదులు నిజమైన పోలీసాఫీసర్ గానే పరిచయం చేసి ఉండాల్సింది.పోనీ ఆలీతో కామెడీ కోసమా అంటే ఆ కామేడీ కూడా పండిన దాఖలాల్లేవు.నికీషా పటేల్ హీరోని పెళ్ళి చేసుకునే తీరు మరింత హాస్యాస్పదం.ఆమె అతన్ని ఫస్ట్ నైట్ అవ్వలేదని టీజ్‍ చేసే సీన్లో పులి గాత్రం పిల్లిలా మారటం కామెడీ పండించలేదు సరికదా,పులి పాత్ర ఔచిత్యాన్ని దెబ్బతీసిందని చెప్పాలి.ఇక నిక్సన్ పులి పక్కనే ఉన్నా అతని మీద పులికి అనుమానం రాకపోవటం ఆశ్చర్యంగా ఉంటుంది.ఈ సినిమాలో ప్లస్ పాయింటేమిటంటే పులి పాత్రలో పవన్ కళ్యాణ్ ఒక పోలీసాఫీర్ కి,ముఖ్యంగా ప్రజలకి ఉన్న సామాజికి బాధ్యతని తెలియజెప్పటం.కాకపోతే అది ఉపన్యాసంలా కనిపించి కాస్త అతి అనిపించింది.

తెలుగుఒన్ పర్‌స్పెక్టివ్:

టన- పవన్ నటనలో అదే స్పీడ్...అదే స్టైల్.పులి పాత్రకు ఆయన పూర్తి న్యాయం చేశారు.కాకపోతే గుర్తొచ్చినప్పుడు డైలాగుల్లో తెలంగాణా మాండలీకాన్ని ఉపయోగించటం కాస్త కృతకంగా ఉంది.నికీషా పటేల్ బాగానే నటించింది కానీ ఆమె కంటే ఇంకా బెటర్‍ హీరోయిన్ని తీసుకునుంటే బాగుండేది.ఆమే ఈ చిత్రానికి మైనస్ అనిపిస్తుంది.పులి తల్లిగా శరణ్య చక్కగా నటించింది.మనోజ్ వాజ్ పాయ్ నటన ఏ కోశానా ఆకట్టుకోలేదు సరికదా అతను విలనీ చేస్తున్నాడా,కామేడీ చేస్తున్నాడా అన్నది అర్థం కాకుండా తిక్కల తిక్కలగా ఆ పాత్ర పయనించిన తీరు అతి అనిపించింది.నాజర్, చరణ్ రాజ్ లు తమ తమ పాత్రలకు న్యాయం చేశారు.ఆలీ కామెడీ పెద్దగా పండలేదు. సంగీతం- ఈ చిత్రంలోని పాటల్లో సాహిత్యం ఒక్కో పాటలో మనకర్థం కాదు.ట్యూన్లు బాగున్నా తమిళ వాసన కొడతాయి."నిర్భయమీయరా స్వామీ", "చెకుముకే చెకుముకే","పవర్ స్టార్"పాటలు వినటానికి బాగున్నాయి. రీ-రికార్డింగ్ ఫరవాలేదు. మాటలు - తమాషాగా ఉన్నాయి.తెలుగుదనం శరణ్య,పవన్ కళ్యాణ్ డైలాగుల్లోనే కనపడుతుంది.హీరో పాత్ర తెలంగాణా మాండలీకాన్ని వాడిన తీరు కూడా వివాదాస్పదమవుతుంది.మొత్తం ఆ మాండలీకంలోనే వాడినా బాగుండేది.సగం కోస్తా తెలుగు భాష,అప్పుడప్పుడు తెలంగాణా తెలుగు వాడటం రచయిత పరిణితి స్థాయిని తెలియజేస్తుంది. పాటలు - చంద్రబోస్ పడ్డ కష్టం అంతా సంగీతం హోరు మింగేసింది. సినిమాటోగ్రఫీ - ఇది చాలా బాగుంది.కంప్యూటర్ గ్రాఫిక్స్ కీ,ఒరిజినల్‍ షాట్ కీ తేడా తెలియనంత బాగా ఈ చిత్రంలోని ఫొటోగ్రఫీ ఉంది. ఎడిటింగ్ - ఒ.కె.ఎడిటింగ్ ఫరవాలేదనిపిస్తుంది. ఆర్ట్ - బాగుంది.హీరో ఇంటి సెట్ పులి ఆఫీస్ సెట్ ఇలా అన్నీ బాగున్నాయి. కొరియోగ్రఫీ - చెప్పుకునే స్థాయిలో లేదనే చెప్పాలి. యాక్షన్ - ఇది బాగుంది.ఇద్దరు ఫైట్ మాస్టర్లు ఈ చిత్రంలోని ఫైట్లు కొత్తగా చూపించే ప్రయత్నం చేశారు.కాకపోతే బిల్డింగుల పై నుంచి ఎగరటాలే ప్రేక్షకుడికి జీర్ణం కావనిపిస్తుంది.