భవిష్యత్లో జరగబోయే ఒక ఉహాజనితమైన సంఘటనకు ఆధారం చేసుకుని ప్రఖ్యాత హాలీవుడ్ దర్శకుడు జేమ్స్ కెమరాన్ అత్యంత అద్భుతంగా భారీ బడ్జెట్తో నిర్మించిన చిత్రం "అవతార్''. కేవలం పేరులో మన భారతీయ ఇతిహాసాలకు సంబంధించిన ఒక పాత్రను ఆధారంగా తీసుకొని నిర్మించిన ఈ చిత్ర కథ విషయానికి వస్తే.... పండోర గ్రహంలోని అత్యంత విలువైన ఒక ఖనిజం 'అన్ అబ్టేనియం' ను సొంతం చేసుకోవాలనే ఉద్దేశ్యంతో ఒక ప్రాజెక్ట్ను మానవులు ఏర్పాటు చేసుకుంటారు. కానీ ఈ ఖనిజం వున్న ప్రదేశం పండేర వాసుల అధీనంలో వుంటుంది. జేక్ (కథానాయకుడు ) ఒక ఎక్స్ మెరైన్, అతడు ఈ పండేర వాసులతో స్నేహం చేయడానికి నియమింపబడ తాడు. ఇక ఈ ప్రాజెక్ట్లో భాగంగా శాస్త్రవేత్తలు పండోర గ్రహంలో జీవించే ప్రాణిని సృష్టిస్తారు. ఈ సృష్టించబడిన జీవి పేరే "అవతార్''. ఈ ప్రాజెక్టులో పనిచేసే వారిలో ప్రతి ఒక్కరికి ఒక్కొక్క అవతార్ ను తయారు చేస్తారు.
ఎనాలసిస్ :
ఒక విధంగా ఇది మన జానపదాల్లోని పరకాయ ప్రవేశం వంటిది అని చెప్పుకోవచ్చు. ఈ అవతార్ రూపం ద్వారా పండోర గ్రహంలో వుండే జీవులతో కలిసిపోయి, అపురూప ఖనిజం వున్న ప్రదేశం పై దాడి చేయడం ప్రాజెక్టు ముఖ్యవుద్దేశం. కాగా జేక్ ఆ గ్రహంలోకి వెళ్ళాక అక్కడ యువరాణి స్నేహంతో పాటు ఆ గ్రహవాసుల అధరణతో తన ఉద్దేశ్యాన్ని మార్చుకోవడంతో ఆ ప్రాజెక్ట్కి సంబంధించిన ఆర్మీతో ఘర్షణ ప్రారంభమవుతుంది. ఇంతకి హీరో తన ఆలోచన ఎందుకు మార్చుకున్నాడు... మానవులు ప్రారంభించిన ప్రాజెక్ట్ పూర్తి చేశారా.. లేదా... అని మీకు తెలియాలంటే ఈ సినిమా చూడాల్సిందే.టైటానిక్ సినిమాతో ఒక మంచి ప్రేమకథా చిత్రాన్ని అందించి ప్రపంచ సినీ అభిమానుల మనసులు దోచుకున్న దర్శకుడు జేమ్స్ కెమరాన్ సృష్టించిన మరో అద్భుత సృష్టి ఈ అవతార్. అత్యంత భారీ బడ్జెట్తో చాలా కాలంగా షూటింగ్ జరుపుకున్న అవతార్ సినిమా చరిత్రలోనే ఓ వండర్ చిత్రంగా నిలిచిపోతుందని చెప్పడంలో ఎలాంటి సందేహం లేదు. జేమ్స్ కెమరాన్ దర్శకత్వం గురించి ప్రత్యేకంగా చర్చించాలి. అవతార్ చిత్రంలోని ప్రతీ ఫ్రేమ్ని ఆయన అత్యద్భుతంగా చిత్రీకరించారు. అద్భుతమయిన కథకి పటిష్టమయిన స్క్రీన్ప్లే జోడించి నిర్మించిన ఈ చిత్రం ప్రేక్షకులని మరో లోకంలోకి తీసుకువెళుతుంది. ఒక వైపు పోరాటాలు, మరో వైపు సున్నితమయిన ప్రేమని, మానవీయత మిళితం చేసి జేమ్స్కెమరాన్ అద్భుత సృష్టి చేశారు. ప్రతీ ఒక్కరూ తప్పకుండా చూడాల్సిన హైటెక్నికల్ వ్యాల్యూస్ కలిగిన చిత్రం ఈ అవతార్.
తెలుగుఒన్ పర్స్పెక్టివ్:
కెమెరా-: ఈ చిత్రానికి వాడిన కెమెరాలను ప్రత్యేకంగా దర్శకుడు తయారు చేయించాడు అంటే అతిశయోక్తి కాదనే చెప్పాలి.
స్పెషల్ ఎఫెక్ట్ గురించి చెప్పాలంటే-: ఇంతకు ముందు ఏ సినిమాలో చూడనటువంటి స్పెషల్ ఎఫెక్ట్ ఈ చిత్రంలోచూపించాడు దర్శకుడు. ముఖ్యంగా చెప్పుకోదగ్గ విషయం.. ఈ స్పెషల్ ఎఫెక్ట్స్ రూపొందించిన వారిలో భారతీయ తెలుగువారు వుండటం విశేషం.
ఎడిటింగ్-: చాలా చాలా బాగుంది
మాటలు-: వివిధ భారతీయ భాషలో అనువధించబడిన ఈ సినిమా విశేషం ఏమిటంటే... ఈ సినిమా మాటలు వింటుంటే అనువధించిన సినిమాలా అనిపించదు.