ఆంధ్రప్రదేశ్‌లో సినిమా స్టూడియోలు అనగానే హైదరాబాద్‌లోని స్టూడియోలు మనకు గుర్తొస్తాయి. వాస్తవానికి మొట్ట మొదటి స్టూడియో రాజమండ్రిలో 1936వ సంవత్సరంలో దుర్గా సినీటోన్‌ పేరుతో ప్రారంభించారు. స్టూడియో పేరుతోనే ‘సంపూర్ణ రామాయణం’ చిత్రాన్ని నిర్మించేందుకు ఆ స్టూడియో అధినేతలు సిద్ధమయ్యారు. కొంత భాగం ఆ స్టూడియోలోనే సెట్‌ వేసి షూట్‌ చేశారు. అయితే కొన్ని కారణాల వల్ల ఆ సినిమా ఆగిపోయింది. స్టూడియోను కూడా మూసేశారు. సినిమా షూటింగ్‌కి కావాల్సిన సామాగ్రి అంతా అక్కడ ఉంది. వాటిని బొబ్బిలి రాజావారు, చిక్కవరం జమీందారు తీసుకొని ఆంధ్రా సినీటోన్‌ పేరుతో విశాఖపట్నంలో స్టూడియోను ప్రారంభించారు. 

ఆ స్టూడియోలో 1938లో సి.పుల్లయ్య దర్శకత్వంలో ‘మోహిని భస్మాసుర’, హిరేన్‌బోస్‌ దర్శకత్వంలో ‘భక్త జయదేవ’, కొచ్చెర్లకోట రంగారావు దర్శకత్వంలో ‘పాశుపతాస్త్ర’ చిత్రాలను నిర్మించారు. ఈ సినిమాల కోసం స్టూడియోకి కావాల్సిన లైట్లను ఓ కంపెనీ నుంచి అద్దెకు తెచ్చారు. ఆ మూడు సినిమాలను పూర్తి చేశారు. మరో పౌరాణిక సినిమా నిర్మాణ దశలో ఉంది. షూటింగ్‌ కోసం తెచ్చిన లైట్లకు అద్దె బకాయి పడింది స్టూడియో. ఆ డబ్బు వెంటనే చెల్లించమని ఎన్నిసార్లు అడిగినా స్టూడియో యాజమాన్యం పట్టించుకోలేదు. ఆ తర్వాత లైట్లు సప్లయ్‌ చేసిన కంపెనీవారు స్టూడియోలోకి ప్రవేశించి షూటింగ్‌ జరుగుతుండగా, వెలుగుతున్న లైట్లను తీసుకెళ్ళిపోయారు. ఆ కారణం వల్ల షూటింగ్‌ ఆగిపోయింది. షూటింగ్‌ను కొనసాగించేందుకు కొత్త లైట్లను తెచ్చే ప్రయత్నం చెయ్యలేదు స్టూడియో యాజమాన్యం. బకాయిపడిన అద్దెను చెల్లించి లైట్లను తెచ్చుకునే అవకాశం ఉన్నప్పటికీ ఆ పని కూడా చెయ్యలేదు. దీంతో షూటింగులు లేక స్టూడియోను మూసెయ్యాల్సిన పరిస్థితి ఏర్పడింది.