అలియా భ‌ట్ టైటిల్ రోల్ పోషిస్తుండ‌గా, టాప్ డైరెక్ట‌ర్ సంజ‌య్ లీలా భ‌న్సాలీ రూపొందిస్తోన్న 'గంగుబాయ్ క‌థియ‌వాడి' మూవీ టీజ‌ర్ ఇటీవ‌ల విడుద‌లై ఫ్యాన్స్ నుంచి అమితాద‌ర‌ణ పొందింది. అయితే ఫ‌స్ట్ లుక్ పోస్ట‌ర్ రిలీజైన‌ప్ప‌ట్నుంచే ఈ సినిమా చ‌ట్ట‌ప‌ర‌మైన స‌మ‌స్య‌ల్లో చిక్కుకుంది. ఆ సినిమా విడుద‌ల‌ను నిలిపివేయాల్సిందిగా ఆదేశాలు జారీ చేయాలంటూ గంగుబాయ్ ద‌త్త‌పుత్రునిగా చెప్పుకుంటున్న బాబూజీ షా బాంబై సివిల్ కోర్టును ఆశ్ర‌యించాడు. అయితే ఆ విజ్ఞ‌ప్తిని న్యాయ‌స్థానం తిర‌స్క‌రించింది.

లేటెస్ట్‌గా ఆ సినిమా త‌మ ఫ్యామిలీని త‌ప్పుడు ప‌ద్ధ‌తిలో చూపిస్తోంద‌నీ, వాస్త‌వ విరుద్ధమైన అంశాల‌తో దాన్ని తీస్తున్నార‌నీ ఆరోపిస్తూ మ‌రో పిటిష‌న్ దాఖ‌లు చేశాడు. ఈ కేసు విచార‌ణ‌లో భాగంగా హీరోయిన్ అలియా భ‌ట్‌, డైరెక్ట‌ర్ సంజ‌య్ లీలా భన్సాలీ, రైట‌ర్ హుస్సేన్ జైదీల‌ను మే 21న త‌మ ముందు హాజ‌రు కావాల్సిందిగా ముంబై కోర్టు ఆదేశాలిచ్చింది. ఈ సినిమాలో వ్య‌భిచార గృహ య‌జ‌మానురాలిగా, కామాటిపుర‌కు మ‌కుటం లేని మ‌హారాణిగా అలియా క‌నిపించ‌నుంది.

కాగా.. భ‌న్సాలీ, అలియా ఇద్ద‌రూ ఈ ఆదేశాల‌పై ఎలాంటి స్పంద‌నా వ్య‌క్తం చేయ‌లేదు. బ‌యోగ్రాఫిక‌ల్ క్రైమ్ డ్రామా 'గంగుబాయ్ క‌థియ‌వాడి'ని జ‌యంతీలాల్ గ‌డాతో క‌లిసి భ‌న్సాలీ స్వ‌యంగా నిర్మిస్తున్నాడు. 2020 సెప్టెంబ‌ర్‌లోనే ఈ మూవీని రిలీజ్ చేయాల‌నుకున్నారు కానీ కొవిడ్ 19 మ‌హ‌మ్మారి కార‌ణంగా వాయిదా వేశారు. ఇప్పుడు జూలై 30న రిలీజ్ చేయ‌డానికి స‌న్నాహాలు చేస్తున్నారు.