Home  
Politics

టీడీపీ నేత అలక.. తను వస్తే నేను పోతా

వైకాపా జమ్మలమడుగు ఎమ్మెల్యే ఆదినారాయణ రెడ్డి వైకాపాని వీడి టీడీపీలోకి చేరే ప్రయత్నాలు చేస్తున్నట్టు గత కొద్దిరోజుల నుండి వార్తలు వస్తూనే ఉన్నాయి. అయితే ఇక్కడ వరకూ బానే ఉన్నా ఇప్పుడు ఇంకో చిక్కు వచ్చిపడింది. ఆదినారాయణ రెడ్డిని కనుక పార్టీలోకి తీసుకుంటే తాను పార్టీని వీడతానని జమ్మలమడుగుకు చెందిన టీడీపీ సీనియర్ నేత, మాజీ మంత్రి రామసుబ్బారెడ్డి అల్టిమేటం జారీ చేశారు. శుక్రవారం రామసుబ్బారెడ్డి నారా లోకేశ్.. హిందూపురం ఎమ్మెల్యే బాలకృష్ణతో భేటీ అయ్యారు. ఈ సందర్భంగా ఆయన ఆదినారాయణ రెడ్డిని కనుక పార్టీలోకి తీసకుంటే తాను పార్టీనుండి వెళిపోతానని మొహం మీద చెప్పేశారు. అంతేకాదు తన కారణంగా టీడీపీకి చెందిన 150 కార్యకర్తలు చనిపోయారని అలాంటి వ్యక్తిని పార్టీలోకి ఎలా ఆహ్వానిస్తున్నారని ప్రశ్నించారట. అయితే బాలకృష్ణ లోకేశ్ లు.. తమ ప్రతిపక్షనేత అయిన జగన్ సొంత జిల్లా నుండే పార్టీ నేతలు మన పార్టీలోకి రావడం మనకే ప్రయాజనం ఉంటుంది కదా అని ఎన్ని రకాలుగా నచ్చజెప్పడానికి చూసిన తాను మాత్రం వెనక్కి తగ్గలేదట. దీంతో ఇప్పుడు ఆదినారాయణ రెడ్డి టీడీపీ ఎంట్రీకి బ్రేక్ పడినట్టుయింది.

ఏపీలో ఐటీ కంపెనీలకు చంద్రబాబు ఆఫర్లు

హైదరాబాద్ లో ఐటీ పరిశ్రమను ఇంతలా అభివృద్ది చేయడానికి ముఖ్యకారణం చంద్రబాబు నాయుడే అని అందరికి తెలిసిన సంగతే. తెలంగాణ వాదులు ఈ విషయాన్ని ఒప్పుకోకపోయినా ఐటీ పరిశ్రమలో పనిచేసే ఏ ఒక్కరిని అడిగినా అవుననే సమాధానం చెపుతారు. అయితే ఇక్కడ పరిస్థితి ఒకే.. మరి ఏపీలో ఐటీ పరిశ్రమల పరిస్థితి. రాష్ట్ర విభజన జరిగి కనీసం రాజధాని కూడా రాష్ట్రం.. ఇప్పుడు అన్ని నగరాల మాదిరి ఏపీ రాష్ట్రంలో కూడా ఐటీ రంగం ముందుండాలంటే ఎలాంటి చర్యలు తీసుకోవాలి అనే దానిపై ప్రస్తుతం చర్చలు జరుగుతున్నాయి. దీనిలో భాగంగానే ఏపీ రాష్ట్రంలో కూడా మిగతా రాష్ట్రాల మాదిరి ప్రోత్సాహాలను ఇస్తే సరిపోదని.. ఏపీకి మరింత ప్రోత్సాహాలు అవసరమని ఐటీ అధిపతులు చంద్రబాబుకు సూచించారట. ఈ నేపథ్యంలో చంద్రబాబు కూడా మరింత ప్రోత్సాహాలను ఇవ్వడానికే నిర్ణయించుకున్నట్టు తెలుస్తోంది. అవి..   * కొత్తగా పెట్టబోయే కంపెనీకి 50 శాతం ఫీజు లేదా మూడేళ్లపాటు రీయింబర్స్ చేయడం. * ఒక్క రూపాయికే యూనిట్ విద్యుత్.. ఐదేళ్లపాటు * 25 శాతం ఇంటర్నెట్ కనెక్టెవిటీ.. మూడేళ్లపాటు * విద్యుత్ పన్నుల్లో రాయితీ.. ఐదేళ్లపాటు * రిజిస్ట్రేషన్.. స్టాంప్ ఫీజుల్లో 50 శాతం రీయింబర్స్ మెంట్ * ప్రాపర్టీ టాక్స్ లోనూ 50 శాతం రీయింబర్స్ మెంట్

రాజధాని అమరావతి శంకుస్థాపన ముహూర్తం ఖరారు

  ఏపీ రాజధాని అమరావతి శంకుస్థాపన కార్యక్రమాన్ని అత్యంత అంగరంగా వైభవంగా నిర్వహించాలని ఏపీ ముఖ్యమంత్రి నిర్ణయించుకున్నారు. ఈ శంకుస్థాపన కార్యక్రమానికి వెయ్యిమందికి పైగా అతిధులను ఆహ్వానించనున్నారు. అయితే ఈ నవ్యాంధ్ర రాజధాని శంకుస్థాపన కార్యక్రమానికి ముహుర్తం ఖరారు అయింది. దసరా రోజు అంటే అక్టోబర్ 22వ తేదీన మధ్యాహ్నం 12.45 నిమిషాలకు శంకుస్థాపన కార్యక్రమాన్ని నిర్వహించాలని నిర్ణయించారు. మందడం- ఉద్దండరాయపాలెం మధ్యలో భూమిపూజ జరిగిన చోటునే శంకుస్థాపన చేయనున్నారు. ప్రధాని నరేంద్ర మోడీ చేతుల మీదుగా ఆ శంకుస్థాపన కార్యక్రమం చేయనున్నారు. గురువారం నాడు జరిగిన ఆంధ్రప్రదేశ్‌ రాష్ట్ర మంత్రివర్గ సమావేశంలో చంద్రబాబు శంకుస్థాపనం కార్యక్రమంపైన నిర్ణయం తీసుకున్నట్టు తెలుస్తోంది.

గంటావారింట్లో బాజా బంత్రీలు

  ఆంద్రప్రదేశ్ రాష్ట్ర మానవ వనరుల అభివృద్ధి శాఖ మంత్రి గంటా శ్రీనివాసరావు, రాష్ట్ర మునిసిపల్, పట్టణ అభివృద్ధిశాఖ మంత్రి పి. నారాయణ ఇళ్ళలో బాజా బజంత్రీలు మ్రోగబోతున్నాయి. వారిరువు త్వరలో వియ్యంకులు కాబోతున్నారు. గంటావారి రెండవ కుమారుడు రవితేజ, నారాయణ గారి రెండవ కుమార్తె శరణికి ఈనెల 30వ తేదీన నెల్లూరులో వివాహం జరుపబోతున్నారు. ఆ తరువాత నవంబర్ 4వ తేదీన వైజాగ్ లో రిసెప్షన్ పార్టీ జరుగుతుంది. ఇంతవరకు పార్టీలో, ప్రభుత్వంలో కలిసి పనిచేస్తున్న వారిరువురూ బందువులు అవుతున్నారు.

గాలి జనార్ధనరెడ్డికి మళ్ళీ జైలు గాలి సోకినట్లే ఉంది

  కొండనాలిక్కి మందేస్తే ఉన్న నాలిక కూడా ఊడిందన్నట్లు అయ్యింది గాలి జనార్ధనరెడ్డి పరిస్థితి. మూడేళ్ళపాటు జైలులో గడిపి బయటకు వచ్చిన ఆయన ప్రస్తుతం బెంగళూరులో ఉంటున్నారు. బళ్ళారి వెళ్లేందుకు తనకు బెయిలు షరతులు సడలించాలని ఆయన సుప్రీంకోర్టులో పిటిషన్ దాఖలు చేసుకొన్నారు. ఆయన బళ్ళారి వెళ్ళడం సంగతి ఏమో కానీ మళ్ళీ జైలుకి వెళ్ళే పరిస్థితి కనబడుతోంది. సుమారు ఐదు లక్షల టన్నుల ఇనుప ఖనిజానికి తప్పుడు లెక్కలతో తక్కువ చేసి చూపించి కర్ణాటకలోని కెరికెరి పోర్టు నుండి విదేశాలకు ఎగుమతి చేసినందుకు ఆయనపై లోకాయుక్తలో కేసు నడుస్తోంది. ఆయనతో బాటు ఎమ్మెల్యే సురేష్, మరో పది మందిపై కూడా కేసులు నడుస్తున్నాయి. వారందరినీ కొన్ని రోజుల క్రితమే పోలీసులు అరెస్ట్ చేసారు. ఆ తరువాత వంతు గాలి జనార్ధన్ రెడ్డిదేనని తెలుస్తోంది. కనుక సుప్రీంకోర్టులో ముందస్తు బెయిల్ కోసం మరో పటిషన్ వేసేందుకు ఆయన సిద్దం అవుతున్నట్లు తాజా సమాచారం.

గాంధీజి గురించి అందరికి తెలియని ఓ పది విశేషాలు

మహాత్మా గాంధీ అనే వ్యక్తీ ఈ భూప్రపంచం మీద ఒకప్పుడు నడయాడాడు ...అంటూ ఎన్ని యుగాలు గడిచినా ప్రజలు మరచిపోని, మర్చిపోలేని వ్యక్తీ గాంధీజీ. మన దేశంలో ఆయనకి ప్రతివ్యక్తి తన గుండెలలో గూడు కట్టి పూజిస్తాడు. అయితే మన మహాత్ముడు కేవలం మన దేశ జాతిపిత మాత్రమే కాదు. ఆయన ప్రభావం విశ్వవ్యాప్తం. గాంధీజీ గురించి తెలుసుకు తీరవలసిన ఒక పది విశేషాలు ఇవిగో ...   1. గాంధీజీ తన ఆత్మ కథ " మై ఎక్స్పెరి మెంట్స్ విత్ ట్రూత్" ని 1925 లో గుజరాతి భాషలో రాసారు. అది నవజీవన్ అనే పత్రికలో ధారావాహికంగా వచ్చింది. దానిని ఇంగ్లీష్ లోకి అనువదించినది " మహాదేవ్ దేశాయ్ " .   2. మన దేశంలోనే కాదు ప్రపంచవ్యాప్తంగా గాంధీజి ఆత్మకథ ఎంతో ఆదరణ పొందించి. చివరికి పాకిస్తాన్ లో కూడా బెస్ట్ సెల్లెర్స్ జాబితాలో వుంది అంటే దాని ప్రభావం ఎంతో అర్ధం చేసుకోవచ్చు. 3. 20 శతాబ్దపు అతి గొప్ప ఆద్యాత్మిక పుస్తకాల జాబితాలో గాంధీజీ ఆత్మ కథది ప్రముఖ స్థానం.   4. గాంధీజీకి మన దేశంలో ఎన్నో చోట్ల గుళ్ళు వున్నాయి. అక్కడ ఆయనని దేవుడిలా కొలుస్తారు.   5. మన దేశంలోనే కాదు చాలా దేశాలలో గాంధీ పేరున వీధులు, నగరాలూ వున్నాయి. అమెరికాలోని టెక్సాస్ ప్రాంతానికి ' మహాత్మా గాంధీ డిస్ట్రిక్ట్ ' అని పేరు పెట్టారు. ఆఫ్రికా లోని బోట్సువాన దేశం లో వున్న ఫ్రాన్సిస్ టౌన్ లో గాంధీ పేరుతో ఒక వీధి వుంది. ఉరుగ్వే లోని మోంట్ వీడియో తీరప్రాంత౦ లో ఓ కాలనీకి మహాత్ముడి పేరు పెట్టుకున్నారు, దక్షిణాఫ్రికాలో 'గాంధీ స్క్వేర్ ' డర్బన్ లో గాంధీ మెమోరియల్ ఆసుపత్రి వున్నాయి.     6. ఇక గాంధీ విగ్రహాలు మన దేశంలో ఎంత విరివిగా దర్శనమిస్తాయో, ప్రపంచవ్యాప్తంగా కూడా చాలా దేశాలలో, ఎన్నో ప్రాంతాలలో  కనిపిస్తాయి. జర్మన్ పార్లమెంట్లో మహాత్ముని విగ్రహం ప్రతిష్టించారు. మాస్కోలో కూడా గాంధీజీ విగ్రహంవుంది. ఆస్ట్రేలియా యూనివర్సిటీలో  కెనడాలో, ఇటలి,కజికిస్తాన్, ఫ్రాన్స్, మొరాకో, ఇలాఎన్నో దేశాలలో గాంధీజీ విగ్రహాలు ప్రతిష్టించారు.   7. సుమారు వందకు పైగా దేశాలు గాంధీజీ పేరున స్టాంపులు విడుదల చేసాయి.     8. గాంధీజీ ఎందరినో ప్రభావితం చేసారు. అమెరికా హక్కుల వీరుడు మార్టిన్ లూథర్ కింగ్, నెల్సన్ మండేలా, ఐన్ స్టీన్, అల్గోరే, బరాక్ ఒబామా,అంగ్సాన్ సూకీ, దలైలామా, వీరంతాగాంధీజీ అడుగుజాడలలో నడిచినవారు. ఆయనని ఆదర్శంగా తీసుకుని తమ జీవన మార్గాలని నిర్దేశించుకున్నవారు. 9 . అరబ్ దేశాల ఉద్యమగీతాలలో గాంధీయిజం నిండివుంటుంది. 10 . అంతర్జాతీయంగా అనేక విశ్వవిద్యాలయాలు గాంధీయిజంలోని మేనేజ్మెంట్ సూత్రాలని తమ కోర్స్ లో భాగం చేసాయి. .......రమ

జగన్మోహన్ రెడ్డితో కేసీఆర్ కూతురు భేటీ

వైఎస్సార్ కాంగ్రెస్ పార్టీ అధినేత వైఎస్ జగన్మోహన్ రెడ్డితో తెలంగాణ సీఎం కేసీఆర్ కూతురు కవిత భేటీ అయ్యింది, లోటస్ పాండ్ లోని జగన్ నివాసానికి వెళ్లిన నిజామాబాద్ ఎంపీ కవిత... జగన్ తోపాటు ఆయన సతీమణి భారతితో కూడా సమావేశమైనట్లు తెలుస్తోంది. అయితే మీడియాకి ఎలాంటి సమాచారం ఇవ్వకపోవడంతో ఈ భేటీపై పలు ఊహాగానాలు చెలరేగినా, బతుకమ్మ ఉత్సవాల్లో పాల్గొనాలని ఆహ్వానించడానికే భారతిని కలిసినట్లు తెలుస్తోంది, ప్రస్తుతం సాక్షి మీడియా గ్రూప్ బాధ్యతలు చూస్తున్న భారతిని మర్యాదపూర్వకంగానే ఆహ్వానించామని, త్వరలో అన్ని టీవీ ఛానల్స్ ను కలిసి బతుకమ్మ ఉత్సవాల్లో పాల్గొనాలని కోరనున్నట్లు చెబుతున్నారు

2017 జూన్ లోపు వస్తేనే ఆంధ్రా ప్రజలు

స్థానికతపై ఆంధ్రప్రదేశ్ ప్రభుత్వం విధానపరమైన నిర్ణయం తీసుకుంది, తెలంగాణలో ఉంటున్న ఉద్యోగులు గానీ, ప్రజలు గానీ, విద్యార్ధులు గానీ 2017 జూన్ లోపు ఏపీకి వస్తే వారిని స్థానికులుగానే గుర్తించాలని కేబినెట్ నిర్ణయం తీసుకుంది, స్థానికత వివాదం, ఏపీ ఉద్యోగులు నవ్యాంధ్ర రాజధానికి రావడానికి ఇబ్బందులు పడుతున్న నేపథ్యంలో ఈ కీలక నిర్ణయం తీసుకున్నారు, రాష్ట్ర విభజన కారణంగా ఏర్పడిన స్థానికత సమస్యకు పరిష్కారం ఇవ్వాలని భావించిన ముఖ్యమంత్రి చంద్రబాబు....మంత్రివర్గంతో చర్చించి ఈ విధానపరమైన నిర్ణయం ప్రకటించారు

అమెరికాలో ఉన్మాది కాల్పులు, 9మంది మృతి

  అమెరికాలో గురువారం ఉదయం ఒరెగాన్ వద్ద గల వుంపక్ కమ్యూనిటీ కాలేజీ విద్యార్ధులపై ఒక ఉన్మాది కాల్పులు జరపడంతో 9 మంది మరణించగా 7 మంది విద్యార్ధులు గాయపడ్డారు. తాజా సమాచారం ప్రకారం అతను విద్యార్ధుల మతం గురించి అడిగి తెలుసుకొన్న తరువాత వారిని కాల్చి చంపాడు. తక్షణమే అక్కడికి చేరుకొన్న పోలీసులు కాల్పులకు తెగబడ్డ వ్యక్తిని అరెస్ట్ చేసేందుకు ప్రయత్నించగా అతను వారిపై కూడా కాల్పులు జరిపాడు. కానీ పోలీసులు అతనిని చాకచక్యంగా బంధించగలిగారు. అతనిని చిరిస్ హార్పర్ మెర్సెర్ (26) గా పోలీసులు గుర్తించారు. ఈ సంఘటన అమెరికా కాలమాన ప్రకారం గురువారం ఉదయం 10.30 గంటలకు జరిగింది. అతను వించిస్టర్ ఒరెగాన్ లో ఒక అపార్ట్ మెంటులో తన తల్లితో కలిసి ఉంటున్నట్లు పోలీసులు గుర్తించి అతని ఇంటిని కూడా శోదా చేశారు. అతను ఇంటర్ నెట్ లో ‘మై స్పేస్’ అనే బ్లాగ్ నడిపిస్తున్నట్లు గుర్తించారు. అందులో అతని ఫోటోలు, అతని గ్రూప్ మెంబర్ల వివరాలు, ఆ బ్లాగ్ ద్వారా అతను వ్యాపింపజేస్తున్న మత సంబంధిత భావజాలం పోలీసులు అధ్యయనం చేస్తున్నారు.

బీహార్ లో బీజేపీ బీసీ ప్రయోగం

బీహార్ అసెంబ్లీ ఎన్నికల పోలింగ్ కు సమయం దగ్గర పడటంతో బీజేపీ కొత్త ఎత్తువేసింది, రిజర్వేషన్లపై ఆరెస్సెస్ చీఫ్ మోహన్ భగవత్ చేసిన వ్యాఖ్యలతో కొంచెం ఇబ్బంది పడుతున్న బీజేపీకి బూస్టింగ్ ఇచ్చేలా కేంద్ర నాయకత్వం కీలక ప్రకటన చేసింది, బీహార్ లో ఎన్డీఏ అధికారంలోకి వస్తే బీసీనే ముఖ్యమంత్రిని చేస్తామంటూ కేంద్రమంత్రి గిరిరాజ్ సింగ్ ప్రకటించారు. రిజర్వేషన్లపై మోహన్ భగవత్ చేసిన వ్యాఖ్యలను ఆధారం చేసుకుని ప్రత్యర్ధి పార్టీలైన జేడీయూ, ఆర్జేడీ, కాంగ్రెస్ లు ప్రజల్లోకి వెళ్తుండటంతో జాగ్రత్తపడిన బీజేపీ ఈ విధాన ప్రకటన చేయాల్సి వచ్చింది, దాంతో నితీష్, లాలూ ప్రచారాన్ని బీజేపీ వ్యూహాత్మకంగా తిప్పికొట్టినట్టయింది. అన్ని సర్వేల్లోనూ ముందున్న బీజేపీకి ఈ బీసీ మంత్రం ఎలాంటి విజయాన్ని అందిస్తుందో చూడాలి

ఆంబోతులా... ఎంత మాటన్నావ్ నారాయణా!

సీపీఐ నారాయణ మరోసారి వివాదాస్పద వ్యాఖ్యలు చేశారు, ప్రధాని నరేంద్రమోడీ, ఏపీ ముఖ్యమంత్రి చంద్రబాబు, తెలంగాణ సీఎం కేసీఆర్ లపై విరుచుకుపడ్డ నారాయణ.... ఆ ముగ్గురినీ ఏకంగా ఆంబోతులతో పోల్చినట్లు వార్తలు వస్తున్నాయి, దేశంలో రైతులు ఆత్మహత్యలు చేసుకుంటుంటే.... మోడీ, బాబు, కేసీఆర్ లు కొత్త పెళ్లికొడుకుల్లా విహారయాత్రలు చేస్తున్నారని విమర్శించారు, అన్నదాతలు ఆక్రందనను పట్టించుకోకుండా ఆంబోతుల్లా తిరుగుతున్నారని నారాయణ తీవ్ర వ్యాఖ్యలు చేసినట్లు తెలుస్తోంది. అయితే ఇలాంటి వ్యాఖ్యలతో గతంలో చిక్కులు కొనితెచ్చుకున్న సీపీఐ నారాయణ... తాజా కామెంట్స్ తో ఎలాంటి ఇబ్బందుల్లో పడతారో చూడాలి

భోగాపురం సముద్రం ఒడ్డుకి చేరిన చిన్నారి అదితి మృతదేహం

  వారం రోజుల క్రితం విశాఖనగరంలో ప్రమాదవశాత్తు ఒక కాలువలో పడికొట్టుకుపోయిన ఆరేళ్ళ చిన్నారి అదితి, గురువారం మధ్యాహ్నం విజయనగరం జిల్లా భోగాపురం మండలం దిబ్బపాలెం వద్ద గల సముద్ర తీరానికి శవమై కొట్టుకు వచ్చింది. ఆమె తండ్రి సత్య శ్రీనివాసరావు పాప ఒంటిపై ఉన్న దుస్తులను బట్టి ఆమె తన కూతురేనని దృవీకరించారు. గత వారం రోజులుగా పాప పడిపోయిన చోట నుండి సముద్రం వరకు గల కాలువలను, చివరికి సముద్రంలో కూడా హెలికాఫ్టర్ ద్వారా గాలించినప్పటికీ ఆమె ఆచూకి దొరకకపోవడంతో గాలింపు చర్యలు నిలిపివేశారు. కానీ చివరికి ఆ చిన్నారి అదితి పక్క జిల్లాలో సముద్రం ఒడ్డున శవం అయి తేలింది. ఇంతవరకు ఆశగా ఎదురుచూసిన పాప తల్లితండ్రుల ఆ చిన్నారిని ఆ స్థితిలో చూసి కన్నీరు మున్నీరుగా విలపిస్తున్నారు. పాప శవాన్ని పోలీసులు స్వాధీనం చేసుకొని పోస్ట్ మార్టం కోసం విశాఖకు తరలించారు.

తెలంగాణ దొంగల పార్టీ అంటూ కవిత సెటైర్లు

తెలుగుదేశం పార్టీపై కేసీఆర్ కూతురు కవిత మరోసారి నిప్పులు చెరిగింది, తెలంగాణ ఉద్యమ సమయంలో ద్రోహుల పార్టీగా ఉన్న టీడీపీ... తెలంగాణ వచ్చాక దొంగల పార్టీ మారిందంటూ విమర్శించారు, రేవంత్ రెడ్డికి టీటీడీపీ వర్కింగ్ ప్రెసిడెంట్ పదవి ఇవ్వడాన్ని ఆక్షేపించిన కవిత.... ఎమ్మెల్యేలను కొంటూ పట్టపగలు అడ్డంగా దొరికిపోయినవాళ్లని అందలమెక్కిస్తారా అంటూ ప్రశ్నించారు

ఏపీకి జగన్ అతిథా?

  రాష్ట్రం విడిపోయిన తరువాత ఏపీ ముఖ్యమంత్రి చంద్రబాబు మొదట హైదరాబాద్ లోనే ఉండి పాలనా కార్యక్రమాలు నిర్వహించినా ఆతరువాత అది సాధ్యం కాదని భావించి వారంలో మూడు రోజులు అక్కడ మూడు రోజులు విజయవాడలో ఉండాలని నిర్ణయం తీసుకున్నారు. అయితే ఆతరువాత అది కూడా కాదని ఇప్పుడు మొత్తంగా అక్కడే ఉండి పాలనా విధానాలు చేస్తున్నారు. అయితే ఇప్పుడు ఫోకస్ ప్రతిపక్ష నేత అయిన జగన్ మీద పడింది. ప్రతిపక్షనేత ఏపీకి అతిధిగా మారారని విమర్శలు తలెత్తున్నాయి. ప్రతిపక్షనేత జగన్ హైదరాబాద్ ను విడిచిపెట్టడానికి అస్సలు ఇష్టపడటం లేదని.. ఎప్పుడో ఒకసారి ఏపీకి వస్తున్నారని గుసగుసలాడుకుంటున్నారు. అంతేకాదు పార్టీ నేతలు ఏపీకి వెళదాం అని సూచించినా కూడా ఇప్పుడే వెళ్లి ఏం చేస్తాం అని కూడా అంటున్నారట. మరోవైపు చంద్రబాబు తనయుడు లోకేశ్ కూడా విజయవాడలో ఉండటంతో జగన్ కు రాబోయే కాలంలో ఇదే మైనస్ పాయింట్ అవుతుందని పార్టీ నేతలు భావిస్తున్నారట. మరి ఇప్పుడైనా జగన్ ఏపీ మకాం వేయడానికి ఇష్టపడతారో లేదో చూడాలి.

రాజకీయాల్లోకి రాను... కోదండరాం క్లారిటీ

తెలంగాణ జేఏసీ అధ్యక్షుడు ప్రొఫెసర్ కోదండరాం పదవి విరమణ చేసిన సంగతి తెలిసిందే. ఈ సందర్భంగా ఆయన తన పొలిటికల్ ఎంట్రీపై ఒక క్లారిటీ ఇచ్చారు. తెలంగాణ ఉద్యమంలో చాలా ముఖ్య భూమిక పోషించిన కోదండరాం.. ఆతరువాత మళ్లీ తన వృత్తినే కొనసాగించారు కాని ఎలాంటి పదవి ఆశించలేదు. అప్పుడప్పుడు ప్రజాసమస్యలపై అధికారపార్టీని ప్రశ్నించేవారు అంతే. అయితే కోదండరాంని రాజకీయాల్లోకి తీసుకురావడానికి పలు రాజకీయపార్టీలు చాలా రకాలుగా ప్రయత్నించాయి. దీనిపై అప్పట్లో కోదండరాం కొత్తపార్టీ పెడుతున్నారని.. అధికార పార్టీ పని ఇక అయిపోయిందనే వార్తలు కూడా వచ్చాయి. కోదండరాం కూడా ఈవిషయంలో చర్చలు జరుగుతున్నాయని చెప్పారే కాని అప్పుడు క్లారిటీ ఇవ్వలేదు. అయితే ఈరోజు పదవీవిరమణ చేసిన నేపథ్యంలో ఆయన మాట్లాడుతూ తనకు పదవుల మీద వ్యామోహం లేదని.. తాను రాజకీయాల్లోకి వచ్చే అవకాశం లేదని.. రాజకీయాల్లోకి రానని స్పష్టం చేశారు. మీడియా వాళ్లు ఎన్నిసార్లు ఈ ప్రశ్న అడిగినా తన సమాధానం ఇదేనని చెప్పారు. మొత్తానికి కోదండరాం పొలిటికల్ ఎంట్రీ లేనట్టు అర్ధమయిపోయింది. ఇన్నీరోజులు కోదండం ఎంట్రీతో అధికార పార్టీకి గట్టిపోటీ ఇస్తారు అనుకుంటే ఇప్పుడు అలాంటిది ఏం లేదని చెప్పడంతో టీఆర్ఎస్ ప్రభుత్వానికి పోటీ లేనట్టే. ఒకరకంగా ఇది టీఆర్ఎస్ కు హ్యాపీ న్యూసే.

కేటీఆర్ పై అక్బరుద్దీన్ ఫైర్.. అక్బరుద్దీన్ అసలు ప్లాన్ అదా?

  తెలంగాణ అసెంబ్లీ సమావేశాల నేపథ్యంలో రైతు ఆత్మహత్యాలపై జరిగిన సమావేశంలో తెలంగాణ ఎంఐఎం పార్టీ అధ్యక్షుడు అక్బరుద్దీన్ ఒవైసీ అధికార పార్టీ దుమ్ము దులిపేశారు. మద్యలో కలుగజేసుకున్న కేటీఆర్ కు కూడా ఘాటుగానే సమధానం చెప్పి కేటీఆర్ ను సైతం ఏం మాట్లాడనీయకుండా చేశారు. అయితే తాను రైతుల ఆత్మహత్యలపై అంతలా రియాక్ట్ అవడానికి వేరే కారణం ఉందని వార్తలు వచ్చాయి. తాను కూడా చావు దాకా వెళ్లానని..ఆ బాధ నాకు తెలుసని అక్బరుద్దీన్ చెప్పినట్టు తెలిసింది. అయితే దానికి మరో కారణం కూడా ఉందని రాజకీయ విశ్లేషకులు చర్చించుకుంటున్నారు. అసలు గతంలో టీఆర్ఎస్ పార్టీ ఎంఐఎం పార్టీతో పొత్తు పెట్టుకోవాలని చూసిన సంగతి అందరికి తెలిసిందే. దీనిలో భాగంగానే వారితో మంతనాలు కూడా జరిపింది. గ్రేటర్ హైదరాబాద్ ఎన్నికల అనంతరం ఎంఐఎం పార్టీతో పొత్తు పెట్టుకోవాలని టీఆర్ఎస్ ప్రభుత్వం చూస్తున్న తరుణంలో టీఆర్ఎస్ కు షాక్ తగిలింది. అయితే అక్బరుద్దీన్ అంతలా విరుచుకుపడటానికి కారణం లేకపోలేదు. అసలే ప్రస్తుతం అధికార ప్రభుత్వం పరిస్థితి అంతంత మాత్రం ఉంది. రాష్ట్రం ఏర్పడినప్పుడు కేసీఆర్ ప్రభుత్వంపై ఉన్న నమ్మకం  ఇప్పుడు ప్రజల్లో లేదనే చెప్పాలి. ఈ నేపథ్యంలో అనవసరంగా టీఆర్ఎస్ పార్టీతో పొత్తు పెట్టుకొని పార్టీని కష్టాల్లో పడేయటం కంటే పొత్తు పెట్టుకోకుండా ఉండటమే మంచిదని ఆలోచించిన అక్బరుద్దీన్ ఈరకంగా అసెంబ్లీ సాక్షిగా అధికార పార్టీ పై ఉన్న వ్యతిరేకతను చూపించారని రాజకీయ వర్గాల వెల్లడి.  అందుకే రైతు ఆత్మహత్యల సమావేశంలో కేటీఆర్ ను టార్గెట్ చేశారని అనుకుంటున్నారు.

దసరా మాదిరి అమరావతి శంకుస్థాపన.. ప్రత్తిపాటి

  ఏపీ రాజధాని అమరావతి శంకుస్థాపన కార్యక్రమాన్ని దసరా రోజు అంటే అక్టోబర్ 22న నిర్వహించాలని నిర్ణయం తీసుకున్న సంగతి తెలిసిందే. ఏపీ ప్రభుత్వం.. ముఖ్యమంత్రి చంద్రబాబు ఈ  శంకుస్థాపన కార్యక్రమాన్ని అంగరంగ వైభవంగా చేయాలని నిర్ణయించుకున్నారు. ఇప్పుడు ఈ శంకుస్థాపనపై వ్యవసాయ శాఖ మంత్రి ప్రత్తిపాటి పుల్లారావు మాట్లాడుతూ దసరా రోజు జరిగే అమరావతి శంకుస్థాపన కార్యక్రమానికి లక్షమందిని ఆహ్వానిస్తున్నామని.. ప్రధాని నరేంద్ర మోడీతోపా టు సింగపూర్, జపాన్ ప్రధానులు కూడా విచ్చేస్తున్నారని.. ప్రధాని మోడీ చేతుల మీదుగా రాజధాని భూమిపూజ జరుగుతుందన్నారు. అంతేకాదు ఈ కార్యక్రమానికి పదివేల గ్రామాల నుండి రైతులను ఆహ్వానిస్తున్నామని.. దసరా పండుగకి నవరాత్రులు ఉన్న మాదిరిగా ఈ నెల 13నుంచి 22వ తేది వరకు ఈ శంకుస్థాపన కార్యక్రమాన్ని నిర్వహిస్తామని తెలిపారు.

వాళ్లకు క్షమాపణ చెప్పాల్సిందే.. హరీష్ రావు

తెలంగాణ మంత్రి హరీష్ రావు కాంగ్రెస్ నేత ప్రభాకర్ రావుపై తీవ్ర స్థాయిలో ధ్వజమెత్తారు. అసెంబ్లీ సమావేశాల నేపథ్యంలో శాసనమండలిలో జరిగిన ప్రశ్నోత్తరాలలో భాగంగా ప్రభాకర్ రావు పోలీసు వ్యవస్థపై విమర్శలు చేశారు. తెలంగాణ ప్రభుత్వంలో పోలీసు వ్యవస్థ బాలేదని.. పేకాటలు ఆడుతున్నారని వ్యాఖ్యానించారు. దీంతో ప్రభాకర్ రావు చేసిన వ్యాఖ్యలను హరీశ్ రావు తీవ్రంగా ఖండిస్తూ ప్రభాకర్ రావు పోలీసులను అవమానపరుస్తూ వ్యాఖ్యానించారని అన్నారు. అంతేకాదు పేకాట క్లబ్ లు నడిపింది కాంగ్రెస్ ప్రభుత్వమేనని.. క్లబ్‌లను మూయించిన ఏకైక ప్రభుత్వం టీఆర్‌ఎస్ మాత్రమే అని అన్నారు. కాంగ్రెస్ పార్టీ పోలీసు వ్యవస్థను కించపరిచే మాటలు మాట్లాడి వారి మనోభావాలు దెబ్బతీస్తున్నారని.. ఇలాంటి అవాంఛిత వ్యాఖ్యలు చేసిన ప్రభాకర్ రావు పోలీసులకు క్షమాపణ చెప్పి తీరాల్సిందే అని డిమాండ్ చేశారు. ప్రాణాలకు తెగించి పోలీసులు మీకు భద్రత కల్పిస్తుంటే వారిపై ఇలాంటి వ్యాఖ్యలు చేయడం సరికాదని అన్నారు.

చంద్రబాబు బాగా ఆలోచించి ఇచ్చినట్టున్నారు

టీడీపీ అధినేత చంద్రబాబు చాలా వ్యూహాత్మకంగా ఆలోచించి నేతలకు పదవులు కట్టిపెట్టినట్టు తెలుస్తోంది. బుధవారం చంద్రబాబు రాష్ట్ర, జాతీయ వర్కింగ్ కమిటీ సభ్యులను ప్రకటించిన నేపథ్యంలో పలువురుకి పదవులు ఇవ్వడంపై చాలా వ్యూహాత్మకంగా వ్యవహరించినట్టు తెలుస్తోంది. దీనిలో భాగంగానే నారా లోకేశ్ కు జాతీయ ప్రధాన కార్యదర్శిగా బాధ్యలు ఇచ్చారు. ఇక తెలంగాణ సంగతికి వచ్చేసరికి ఎన్నో అనుమానాలు.. ఎన్నో ట్విస్ట్ ల నేపథ్యంలోఈసారి కూడా పార్టీ అధ్యక్ష పదవి బాధ్యతలు ఎల్. రమణకే అప్పగించారు. దీని వెనుక కారణం లేకపోలేదు. ఎల్ రమణ బిసి వర్గానికి చెందిన నేత.. టీడీపీకి బిసిలలో మంచి పట్టు ఉంది.. కనుక ఈ వర్గాన్ని దూరం చేసుకోవద్దనే కారణంతో మళ్లీ పార్టీ పగ్గాలు ఎల్. రమణకే చెందాయి. మరోవైపు ఫైర్ బ్రాండ్ రేవంత్ రెడ్డికి వర్కింగ్ ప్రెసిండెంట్ ఇవ్వడంపై కూడా  పలు కారణాలు ఉన్నట్టు తెలుస్తోంది. అందులో ముఖ్యంగా కేసీఆర్ ను ఎదుర్కోవడం మొదటిది. దీనివల్ల అతి తక్కువ కాలంలోనే రేవంత్ రెడ్డికి వర్కింగ్ ప్రెసిడెంట్ పదవి వరించింది. ఇంకా ఎర్రబెల్లి.. ముందు అధ్యక్ష పదవి కోసం చూసినా అది మాత్రం రాలేదు.. ఎప్పిటిలాగే పోలిట్ బ్యూరోలోకి తీసుకున్నారు. బిసి నేత దేవేందర్ గౌడ్‌ను కూడా పొలిట్ బ్యూరోలోకి తీసుకున్నారుయ. అంతేకాదు గత సార్వత్రిక ఎన్నికల్లో కేసీఆర్ కు మంచి పోటీ ఇచ్చిన ఒంటేరు రైతు విభాగం అధ్యక్షునిగా.. శోభారాణిని తెలుగు మహిళా అధ్యక్షురాలిగా తీసుకున్నారు. మొత్తానికి చంద్రబాబు సభ్యల ఎన్నికల విషయంలో చాలా లోటుపాట్లు ఆలోచించి పదవులు కట్టబెట్టినట్టే కనిపిస్తుంది.