ఫణికుమార్ కి ప్రజా సమూహం ముందు ఉరిశిక్ష విధించటమే!
ఆలస్యం చేస్తే పరిస్థితి చెయ్యిదాటిపోతుంది.
మరుక్షణం జడ్జి ఒక నిర్ణయం తీసుకున్నారు.
"ఆర్డర్! ఆర్డర్!"
ఆ హెచ్చరికతో సద్దు మణిగింది.
"ప్రజావెల్లువ ఎంతో శక్తివంతమైంది. ఆ ప్రజల్లో ఫణికుమార్ తను చేసిన హత్య మూలంగా ఎలాంటి ముద్ర వేసుకున్నాడో అర్ధం అవుతోంది. వారి ఆవేశాన్ని అర్ధం చేసుకున్నాను. ఆ ఆవేశంలో వారు తమ ప్రాణాలు బలిదానం చేయడానికి కూడా వెనుకాడకుండా ఉద్రేకంతో ఉరకలు వేస్తు్నారు. ఇలాంటి పరిస్థితిలో అనేకమంది ప్రాణాలకి ముప్పువాటిల్లే ప్రమాదాన్ని తప్పించటానికి తప్పనిసరి పరిస్థితుల్లో నేనొక నిర్ణయాన్ని తీసుకోవలసి వచ్చింది.
"భారతీయ శిక్షా స్మృతిలో 'పబ్లిక్ హ్యాంగింగ్' లేకపోయినా 'కోడ్ ఆఫ్ ఎథిక్స్' పాటించాల్సిన ఒక నాగరికుడైన వైద్యుడు అనాగరికంగా ప్రవర్తించటంతో పాటు నరరూప రాక్షసుడిలా ఒక స్త్రీని అతి కిరాతకంగా హత్య చేయటాన్ని మానవ మాత్రులెవ్వరూ క్షమించరు. ప్రజాభీష్టం మేరకు నేను సాహసం చేసి చారిత్రాత్మకమైన తీర్పుని ఇస్తున్నాను. ఫణికుమార్ ని ప్రజా సమూహం ముందు ఉరి తీయటానికి ఆదేశిస్తున్నాను. పబ్లిక్ హ్యాంగింగ్ చేసి శిక్ష అమలుపరచటం జరుగుతుంది."
జడ్జిగారు లేచి నిలబడ్డారు.
కోర్టు హాలులో హర్షధ్వానాలు మిన్నుముట్టాయి.
క్షణంలో ఈ వార్త బైటికి పరుగెత్తింది.
అంత -
ఆనందోత్సాహలతో ప్రజావాహిని కేరింతలు కొడుతోంది.
"జడ్జిగారికి జై!" అంటూ జయజయధ్వానాలు చేయసాగారు.
జడ్జిగారు భారంగా నిట్టూర్చి అక్కణ్ణుంచి కదిలారు.
బోనులో నిలబడ్డ ఫణికుమార్ ఉన్న పళంగా కుప్పకూలిపోయాడు.
ప్రేక్షకుల్లో కూర్చుని వున్న ఆనందమూర్తి లేచి నిలబడ్డాడు. అతని కళ్ళనుండి కన్నీటి బొట్లు జలజలా రాలాయి.