తెలుగు రాష్ట్రాల్లో 'కార్తీకదీపం' వంటలక్క అలియాస్ దీప అలియాస్‌ ప్రేమి విశ్వనాథ్ కు ఉన్న ఫాలోయింగ్ చూస్తే ఆశ్చర్యపోవాల్సిందే. స్టార్ హీరోలు, హీరోయిన్ల రేంజ్ లో పాపులారిటీ దక్కించుకుంది వంటలక్క. సాధారణంగా సీరియల్స్ అంటే గృహిణులు మాత్రమే చూస్తారని అనుకుంటారు కానీ 'కార్తీకదీపం' సీరియల్ ను ఇంటిల్లిపాదీ ఎంజాయ్ చేస్తున్నారు. ఇదిలా ఉండగా.. రీసెంట్ గా ప్రేమి విశ్వనాథ్ రాజకీయాలపై చేసిన కామెంట్స్ వైరల్ అవుతున్నాయి.

కేరళకు చెందిన ఈమెకు తన సొంత రాష్ట్రమైన కేరళ రాజకీయాలపై అంత ఇంట్రెస్ట్ లేదంట కానీ.. తెలుగు రాష్ట్రాలలో ఎమ్మెల్యేగా పోటీ చేయడానికి రెడీ అంటోంది. ఆమె సరదాగా చేసిన కామెంట్స్ ఇప్పుడు హాట్ టాపిక్ గా మారాయి. 'కార్తీకదీపం' సీరియల్ లొకేషన్ కు సంబంధించిన వీడియోలను యూట్యూబ్ ఛానెల్ లో షేర్ చేస్తుండగా.. తాజా వీడియోలో ప్రేమి విశ్వనాథ్, ఈ సీరియల్ నిర్మాత గుత్తా వెంకటేశ్వరావు సరదాగా ముచ్చట్లు పెట్టుకున్నారు. మధ్యలో వీరు పాలిటిక్స్ గురించి మాట్లాడుకున్నారు.

కేరళలో మా పార్టీ బంపర్ విక్టరీ కొట్టిందని చెప్పింది ప్రేమి విశ్వనాథ్. "మరి నీకు నెక్స్ట్ ఎన్నికల్లో ఎమ్మెల్యే టికెట్ ఇస్తారా.?" అని అడిగాడు నిర్మాత. "ఎమ్మెల్యేనా నాకు పాలిటిక్స్ ఇంట్రస్ట్ లేదు సార్" అని చెప్పింది ప్రేమి విశ్వనాథ్. "కేరళ సంగతి వదిలేయ్.. ఏపీ, తెలంగాణలో ఎమ్మెల్యే టికెట్ ఇస్తే పోటీ చేస్తావా..?" అని నిర్మాత అడగగా.. "హా.. టికెట్ ఇస్తే ఎమ్మెల్యేగా పోటీ చేస్తా" అని చెప్పింది వంటలక్క. మరి ఏ పార్టీలో చేరతావని అడిగితే.. "అది మాత్రం చేరినప్పుడు చెప్తా." అంటూ తెలివిగా సమాధానం ఇచ్చింది.