సూపర్‌హిట్ కామెడీ షో 'జబర్దస్త్'లో ఈమధ్య చాలా మార్పులు జరిగాయి. స్కిట్స్ చేసే టీమ్స్ సంఖ్య తగ్గింది. స్కిట్ నిడివి కూడా తగ్గించారు. అందులో భాగంగా కొంతమంది టీమ్ లీడర్లను తీసేశారు. దాంతో వాళ్ళు షోలో కనిపించడం లేదు. అలా 'జిగేల్' జీవన్ కూడా కొన్నాళ్ల నుంచి కనిపించడం లేదు. నెక్స్ట్ ఎపిసోడ్ నుండి మళ్ళీ అతడు షోలో కనిపించనున్నాడు. అతడి ఆబ్సెన్స్ కి కారణం హెల్త్ ఇష్యూ అని ప్రోమోలో చూపించారు.

ఎప్పుడూ ప్రేక్షకులను నవ్వించే 'జబర్దస్త్' టీమ్ లీడర్లు స్టేజి మీద కన్నీళ్లు పెట్టుకున్నారు. ముఖ్యంగా 'జిగేల్' జీవన్ కన్నీళ్లు అయితే ఆగలేదు. 'కొన్ని ఎపిసోడ్లు మీరు ఎక్స్ట్రా జబర్దస్త్ ఎపిసోడ్స్ నుండి దూర‌మ‌య్యారు. ఇప్పుడు మీకు ఎలా అనిపిస్తుంది?' అని జీవన్ ను రష్మీ అడిగిన తర్వాత అతడు అసలు ఏమైందో వివరించాడు.

"నిజంగా నేను ఈ రోజు బతికి ఉన్నానంటే కారణం టీమ్ లీడర్లు. వీళ్ళందరూ లేకపోతే నిజంగా నేను బతికి ఉండేవాడిని కాదు. ఒక్కసారి కాదు... రెండుసార్లు సీరియస్ అయ్యింది. రెండోసారి అయితే డాక్టర్లు లేడ‌ని చెప్పేశారు. మా అమ్మ ఏడుపు. నా బాబు చిన్నోడు. ఇంజెక్షన్లకు కూడా బాడీ సహకరించలేదు. కష్టం అని డాక్టర్లు చెబితే... వీళ్ళందరూ నన్ను కాపాడారు" అని 'జిగేల్' జీవన్ కన్నీటి పర్యంతం అయ్యాడు. అతడితో పాటు తోటి 'జబర్దస్త్' టీమ్ లీడర్లు భావోద్వేగానికి లోనయ్యారు. 'మన జబర్దస్త్ లో ఎవరికి ఏం జరిగినా మన జబర్దస్త్ ఫామిలీ అంతా ఇలాగే ఉండాలి' అని గెటప్ శీను అన్నాడు.