తమిళ్‌ సీనియర్‌ నటుడు, రాజకీయ నేత విజయ్‌కాంత్‌ గత కొన్ని రోజులుగా హాస్పిటల్‌లో చికిత్స పొందుతున్న విషయం తెలిసిందే. ఎప్పటిక్పుడు డాక్టర్లు ఆయన ఆరోగ్యపరిస్థితిని తెలుపుతూ హెల్త్‌ బులెటిన్లు విడుదల చేస్తున్నారు. అయితే విజయ్‌కాంత్‌ ఆరోగ్యం విషమించిందనే వార్తలు వైరల్‌ అవ్వడంతో అభిమానుల్లో ఆందోళన పెరిగింది. దీన్ని దృష్టిలో పెట్టుకొని తాజాగా ఎంఐఓటీ హాస్పిటల్‌ డాక్టర్లు మరో హెల్త్‌ బులెటిన్‌ విడుదల చేశారు.

‘విజయ్‌కాంత్‌ ఆరోగ్యం కాస్త మెరుగుపడినా.. గత 24 గంటలుగా ఆయన పరిస్థితి కాస్త క్రిటికల్‌గానే ఉంది. చికిత్సకు ఆయన శరీరం సహకరిస్తున్నప్పటికీ.. పరిస్థితి విషమంగానే ఉంది. అతడు కోలుకోవడానికి పల్మనరీ చికిత్సను వైద్య నిపుణులు సిఫార్సు చేశారు. అంతేకాదు, ఆయన కోలుకోవడానికి మరో 14 రోజుల పాటు నిరంతర చికిత్స అవసరం’ అంటూ ఆ హెల్త్‌ బులెటిన్‌లో తెలియజేశారు. విజయ్‌ కాంత్‌ ఆరోగ్యం క్షీణించడంతో ఈనెల 18న ఆసుపత్రిలో చేరిన విషయం తెలిసిందే. కొంతకాలంలో విజయ్‌కాంత్‌ ఆరోగ్య సమస్యలతో బాధపడుతున్నారు. చాలా కాలంగా ఆయనకు డయాబెటీస్‌ ఉంది. లివర్‌ సమస్యతో కూడా బాధపడుతున్నారు. అంతేకాదు, జలుబు, దగ్గు, గొంతునొప్పితో శ్వాస తీసుకోవడంలో ఇబ్బందులు ఎదురవ్వడంతో కుటుంబ సభ్యులు ఆయన్ని హాస్పిటల్‌లో జాయిన్‌ చేశారు. తాజాగా విడుదలైన హెల్త్‌ బులెటిన్‌తో విజయ్‌కాంత్‌ ఆరోగ్య పరిస్థితి తెలుసుకున్న అభిమానులు ఆందోళన చెందుతున్నారు. తమ అభిమాన హీరో, నాయకుడు త్వరగా కోలుకోవాలని ప్రార్థిస్తున్నారు.