జూలై 12 నుండి రవితేజ, గుణశేఖర్ ల "నిప్పు" మొదలవుతుందని విశ్వసనీయ వర్గాల ద్వారా అందిన సమాచారం. వివరాల్లోకి వెళితే బొమ్మరిల్లు వారి పతాకంపై గతంలో అనేక చిత్రాలను స్వీయ దర్శకత్వంలో నిర్మించిన ప్రముఖ దర్శక, నిర్మాత వై.వి.యస్. చౌదరి ప్రస్తుతం తన బ్యానర్ లో తొలిసారి వేరే దర్శకుడి దర్శకత్వంలో "నిప్పు" అనే సినిమా నిర్మించనున్నారు. ఆ వేరే దర్శకుడు మరెవరో కాదు...గుణశేఖర్. గుణశేఖర్ "కత్తి" అనే పేరుని ఈ కథకు ముందుగా అనుకున్నారు. ఆ పేరుని ఫిలిం ఛాంబర్ లో రిజిస్టర్ కూడా చేశారు. కాని నందమూరి కళ్యాణ్ రామ్ "కళ్యాణ్ రామ్ కత్తి" పేరుతో సినిమా తీయటంతో, తన సినిమాకి "నిప్పు" అన్న పేరుని పెట్టుకున్నాడు గుణశేఖర్. ఈ "నిప్పు" సినిమాలో మాస్ రాజా రవితేజ హీరోగా నటిస్తున్నారు.

ఈ రవితేజ, గుణ శేఖర్ ల "నిప్పు" సినిమా జూలై 12 వ తేదీ నుండి షూటింగ్ ప్రారంభించుకోనుంది. గుణ శేఖర్ దర్శకత్వంలో వచ్చిన "అర్జున్, సైనికుడు, వరుడు" చిత్రాలు వరసగా ఫ్లాపయ్యాయి. ఆయనకి కచ్చితమైన హిట్ కావాలి. ఆ హిట్ ఈ "నిప్పు" చిత్రంతో సాధించాలని గుణశేఖర్ పట్టుదలతో ఉన్నారని సమాచారం.సాటి దర్శకుడు వైవియస్ చౌదరి తనను నమ్మి ఇంత పెద్ద బాధ్యతను అప్పగించినప్పుడు అతనికోసమైనా ఈ సినిమాని హిట్ చేయాలి కదా...!