ప్రముఖ నిర్మాత యమ్.యస్.రెడ్డి మృతి చెందారు. చనిపోయే నాటికి ఆయన వయసు 87 సంవత్సరాలు. యమ్.యస్.రెడ్డి నెల్లూరు జిల్లా, వెంకటగిరి మండలంలోని అలిమిలి గ్రామంలో 1924 వ సంవత్సరం, ఆగస్టు 15 తేదీన జన్మించారు. ఆయన నిర్మాతగా, రచయితగా, నటుడిగా తెలుగు సినీ రంగంలో ప్రసిద్ధులు. ఆయన "ఏకలవ్య, తలంబ్రాలు, అంకుశం, ఆహుతి, అమ్మోరు, బాలరామాయణం" వంటి అనేక చిత్రాలను నిర్మించారు.

ఆయన మాట కచ్చితంగా ఉందేది. అలాగే మనిషి కూడా అన్ని విషయాల్లోనూ చాలా నిక్కచ్చిగా వ్యవహరించేవారు.ముక్కుకు సూటిగా మాట్లాడే తత్వం ఉన్న ఆయనంటే అందరికీ భయంతో కూడిన గౌరవం. ఆయన ఏ విషయాన్నైనా కుండబ్రద్దలు కొట్టినట్లు మాట్లాడేవారు. యమ్.యస్.రెడ్డి ఇటీవల వ్రాసిన ఆయన ఆటోబయోగ్రఫీ పుస్తకంలో చిరంజీవి, యన్ టి ఆర్, వంటి అనేకమంది మీద విమర్శలు చేస్తూ వ్రాసిన "ఇది నాకథ" పుస్తకం చాలా సంచలనం సృష్టించింది.

యమ్.యస్.రెడ్డి తెలుగువన్ డాట్ కామ్ లోని "కిడ్స్ వన్" ఆవిష్కరణ సభకు విచ్చేసి, తెలుగు భాషకు తెలుగువన్ డాట్ కామ్ చేస్తున్న సేవలను శతధా కొనియాడారు. యమ్.యస్.రెడ్డి గత కొంతకాలంగా అస్వస్థులుగా ఉన్నారు. ఆయన నేటి ఉదయం అనగా డిసెంబర్ 11 వ తేదీ ఉదయం మరణించారు. ఆయన లేని లోటు తెలుగు సినీ పరిశ్రమకు ఎవరూ తీర్చలేనిది.

ఆయన మృతికి మన రాష్ట్ర ముఖ్యమంత్రి కిరణ్ కుమార్ రెడ్డి యన ప్రగాఢ సమతాపాన్ని తెలియజేశారు. డాక్టర్ రామానాయుడు, నాగబాబు వంటి అనేక మంది సినీ ప్రముఖులు ఆయన పార్దివ దేహాన్ని సందర్శించి ఆయనకు ఘనంగా నివాళులర్పించారు.