టాలీవుడ్ లో భారీ బడ్జెట్ తో రూపొందుతోన్న పలు పాన్ ఇండియా సినిమాలు వాయిదా పడుతున్నాయి. ఏప్రిల్ 5న విడుదల కావాల్సిన 'దేవర'(Devara) అక్టోబర్ 10కి వాయిదా పడింది. ఆగస్టు 15న 'పుష్ప-2'(Pushpa 2) విడుదల కావాల్సి ఉండగా.. ఆ తేదీకి రావడం అనుమానమే అంటున్నారు. ఇప్పుడదే బాటలో 'కల్కి 2898 AD' పయనించనుందని తెలుస్తోంది.

ప్రభాస్(Prabhas) హీరోగా నాగ్ అశ్విన్ దర్శకత్వంలో రూపొందుతోన్న చిత్రం 'కల్కి 2898 AD' (Kalki 2898 AD). భారతీయ పురాణాల ఆధారంగా రూపొందుతోన్న ఈ సైన్స్ ఫిక్షన్ చిత్రాన్ని వైజయంతీ మూవీస్ నిర్మిస్తోంది. 'బాహుబలి', 'ఆర్ఆర్ఆర్' తర్వాత గ్లోబల్ లెవెల్ లో సత్తా చాటగలిగే తెలుగు సినిమా 'కల్కి' అనే అభిప్రాయాలు ఉన్నాయి. అయితే అత్యంత భారీ బడ్జెట్ తో రూపొందుతోన్న సైన్స్ ఫిక్షన్ ఫిల్మ్ కావడంతో ఈ సినిమా ఆలస్యమవుతూ వస్తోంది. ఈ ఏడాది సంక్రాంతికి విడుదల చేయాలి అనుకున్నారు.. కానీ కుదరలేదు. మే 9న విడుదల చేయనున్నట్లు ఆమధ్య ప్రకటించారు. ఇప్పుడు ఆ తేదీకి విడుదల కావడం కూడా అనుమానమే అంటున్నారు. పోస్ట్ ప్రొడక్షన్ వర్క్ కి అనుకున్న దానికంటే ఎక్కువ సమయం పడుతుందట. ముఖ్యంగా వీఎఫ్ఎక్స్ వర్క్ కి మరింత సమయం తీసుకోవాలని దర్శకుడు నాగ్ అశ్విన్ భావిస్తున్నాడట. అందుకే ఈ సినిమా మరోసారి వాయిదా పడినట్లు తెలుస్తోంది. త్వరలోనే కొత్త విడుదల తేదీని ప్రకటించనున్నారని సమాచారం.

ఒకవేళ 'పుష్ప-2' వాయిదా పడితే.. ఆగస్టు 15వ తేదీకి 'దేవర' రావాలని చూస్తోంది. అప్పుడు అక్టోబర్ 10కి 'కల్కి' వచ్చే అవకాశముంది. 'పుష్ప-2' వాయిదా పడకపోతే మాత్రం.. సెప్టెంబర్ లేదా డిసెంబర్ లో కల్కి రిలీజ్ అయ్యే ఛాన్స్ ఉంది.