"ఇట్స్ మై లవ్ స్టోరీ" రెండవ స్కెడ్యూల్ వైజాగ్ లో జరుగనుందని ఈ చిత్ర దర్శకులు మధుర శ్రీధర్ రెడ్డి తెలుగువన్ కు తెలియజేశారు. వివరాల్లోకి వెళితే మల్టీ డైమెన్షన్ ఎంటర్ టైన్ మెంట్స్ లిమిటెడ్ సమర్పణలో, అరవింద్ కృష్ణ ను హీరోగా, నిఖితను హీరోయిన్ గా పరిచయం చేస్తూ, మధురశ్రీధర్ రెడ్డి దర్శకత్వంలో, షిరిడీసాయి పతాకంపై, యమ్.వి.కె.రెడ్డి నిర్మిస్తున్న విభిన్నమైన ప్రేమకథా చిత్రం "ఇట్స్ మై లవ్ స్టోరీ". "ఇట్స్ మై లవ్ స్టోరీ" సినిమా మే నెల 9 వ తేదీన ప్రారంభమై తొలి స్కెడ్యూల్ విజయవంతంగా పూర్తిచేసుకుంది.

ప్రస్తుతం రెండవ స్కెడ్యూల్ జూన్ 25 వ తేదీ నుండి జూలై 10 వ తేదీ వరకూ విశాఖపట్టణంలో జరుగనుంది. ఈ స్కెడ్యూల్లో హీరో అరవింద్ కృష్ణ, హీరోయిన్ నిఖిత, సహజనటి జయసుధ, సీనియర్ నటులు శరత్ బాబు నటించబోతున్నారు. తదుపరి మూడవ స్కెడ్యూల్ జూలై 18 వ తేదీ నుండి సినిమా పూర్తయ్యే వరకూ హైదరాబాద్ లోనే "ఇట్స్ మై లవ్ స్టోరీ" సినిమా షూటింగ్ జరుపుతామని దర్శకులు మధుర శ్రీధర్ రెడ్డి తెలిపారు.

మధుర శ్రీధర్ రెడ్డి గతంలో "స్నేహగీతం" అనే చక్కని చిత్రాన్ని నిర్మించి విమర్శకుల ప్రశంసలు పొందారు. "ఇట్స్ మై లవ్ స్టోరీ" సినిమాకి పాటలు సిరాశ్రీ వ్రాస్తూండగా, సునీల్ కశ్యప్ సంగీతాన్ని అందిస్తుండగా, పి.జి.విందా సినిమాటోగ్రఫీని, ఎడిటింగ్ ను ప్రవీణ్ బోయిన నిర్వహిస్తున్నారు.