బాలీవుడ్ లో సీరియల్ కిస్సర్ గా, ముద్దుల వీరుడుగా పేరు తెచ్చుకున్నాడు ఇమ్రాన్ హష్మి. అతని సినిమా వచ్చిందంటే చాలు, అందులో ఒక్క కిస్ సీనైనా ఉంటుందనే ముద్ర పడిపోయింది. తాజాగా, జీవితం తనకిచ్చిన ముద్దుల తనయుడి గురించి, తాను ఎదుర్కొన్న కష్టనష్టాలు, బాధల గురించి వివరిస్తూ కిస్ ఆఫ్ లైఫ్ అంటూ పుస్తకాన్ని రాశాడు. తొమ్మిదేళ్ల క్రితం ఇమ్రాన్ హష్మికి పర్వీన్ సహానీతో పెళ్లి జరిగింది. వీరికి అయాన్ అనే కొడుకున్నాడు.

కొడుకు పుట్టాడన్న సంబరాలు ఇమ్రాన్ జంటకు ఎక్కువ కాలం నిలవలేదు. అయాన్ కు క్యాన్సర్ వచ్చిందన్న విషయం తెలిసి తల్లడిల్లిపోయాడు. ఎలాగోలా తన బిడ్డను దాని బారి నుంచి  కాపాడుకోగలిగాడు. అందుకే క్యాన్సర్ ను జయించిన తన కొడుకు గురించి ముఖ్యంగా ప్రస్తావిస్తూ, " ద కిస్ ఆఫ్ లైఫ్, హౌ ఎ సూపర్ హీరో అండ్ మై సన్ డిఫీటెడ్ క్యాన్సర్ " అని పేరు పెట్టాడు. ఈ ఏడాది చివరికల్లా, మార్కెట్ లో అందుబాటులోకి రానుందీ పుస్తకం. ప్రస్తుతం అజారుద్దీన్ జీవితకథతో తెరకెక్కుతున్న అజార్ సినిమాలో నటిస్తున్నాడు ఇమ్రాన్.