ఇటీవల 'సరిపోదా శనివారం' చిత్రంతో ప్రేక్షకులను పలకరించిన న్యాచురల్ స్టార్ నాని (Nani).. తన నెక్స్ట్ మూవీని ప్రకటించాడు. అదే 'హిట్-3' (Hit 3). ఇది నాని కెరీర్ లో 32వ సినిమాగా రూపొందనుంది.  

నానికి చెందిన నిర్మాణ సంస్థ వాల్ పోస్టర్ సినిమా బ్యానర్ లో శైలేశ్ కొల‌ను దర్శకత్వంలో రూపొందే హిట్ ప్రాంఛైజ్ చిత్రాలకు మంచి క్రేజ్ ఉంది. ఈ ప్రాంఛైజ్ లో ఇప్పటిదాకా రెండు సినిమాలు రాగా, రెండూ మంచి విజయాలు సాధించాయి. మొదటి భాగంలో విశ్వక్ సేన్, రెండో భాగంలో అడివి శేష్ హీరోలుగా నటించారు. మూడో భాగంలో నాని నటిస్తున్నాడు. ఇప్పటికే హిట్-2 చివరిలో అర్జున్ సర్కార్ గా నాని పాత్ర పరిచయమై ప్రేక్షకులను మెప్పించింది. దీంతో హిట్-3 కోసం అందరూ ఎంతో ఆసక్తికరంగా ఎదురుచూస్తున్నారు.

"అర్జున్ టేక్స్ ఛార్జ్" అంటూ, నాని-శైలేశ్ కొల‌ను కాంబినేషన్ లో తెరకెక్కుతోన్న 'హిట్-3' ప్రయాణం మొదలైందని తెలుపుతూ తాజాగా మేకర్స్ ఒక పోస్టర్ ను వదిలారు. ఆ పోస్టర్ లో వెహికిల్ డ్రైవ్ చేస్తూ, చేతిలో నెత్తుటి మరకలతో ఉన్న గొడ్డలి, నోటిలో సిగర్ తో నాని లుక్ అదిరిపోయింది. అర్జున్ సర్కార్ లో పోలీస్ కంటే క్రిమికల్ షేడ్స్ ఎక్కువ ఉంటాయని రాసుకొచ్చారు. అంతేకాదు 2025 మే 1న బ్లడ్ గేట్స్ ఓపెన్ అవుతాయి అంటూ రిలీజ్ డేట్ ని కూడా అనౌన్స్ చేశారు.