చిన్నతనంలోనే ‘సిసింద్రీ’తో టాలీవుడ్‌లో ఎంట్రీ ఇచ్చి అందర్నీ ఆకట్టుకున్న అఖిల్‌ అక్కినేని ఆ తర్వాత హీరోగా నిలదొక్కుకోవడంలో సక్సెస్‌ అవ్వలేకపోయాడు. ఏ జోనర్‌లో సినిమా చేసినా ప్రేక్షకుల్లోకి వెళ్ళలేకపోయాడు, వారికి దగ్గర కాలేకపోయాడు. ఇప్పటివరకు తను చేసిన సినిమాలు ఒక్కొక్కటి ఒక్కో జోనర్‌లో చేసినా ఫలితం లేకపోయింది. చివరికి సురేందర్‌రెడ్డి దర్శకత్వంలో చేసిన ‘ఏజెంట్‌’పై ఎన్నో ఆశలు పెట్టుకున్నాడు. అది కూడా అతన్ని నిరాశపరచింది. దాంతో ఆరు నెలలుగా ఏ సినిమా కమిట్‌ అవ్వకుండా మంచి కథల కోసం ఎదురుచూస్తున్నాడు.

సాయిధరమ్‌తేజ్‌తో ‘విరూపాక్ష’ వంటి సూపర్‌హిట్‌ మూవీ చేసిన కార్తీక్‌ దండుతో సినిమా చేసేందుకు సిద్ధమయ్యాడు అఖిల్‌. ఈసారి థ్రిల్లర్‌ సబ్జెక్ట్‌తో తన అదృష్టాన్ని మరోసారి పరీక్షించుకునేందుకు రంగం సిద్ధం చేసుకుంటున్నాడు. అఖిల్‌కి సరిపోయే కథని కార్తీక్‌ చెప్పడం, ఆ కథ అఖిల్‌కి నచ్చడంతో ఈ ప్రాజెక్ట్‌ ఓకే చెప్పాడు. ఈ చిత్రాన్ని యు.వి. క్రియేషన్స్‌ సంస్థ నిర్మిస్తుందని సమాచారం. ఈ దసరాకి లాంఛనంగా ఈ సినిమాను ప్రారంభించేందుకు సన్నాహాలు జరుగుతున్నాయి. కథ ఓకే, డైరెక్టర్‌ ఓకే, హీరో ఓకే.. ఇప్పుడు హీరోయిన్‌ కోసం అన్వేషణ మొదలుపెట్టారట. టాలీవుడ్‌లోని యంగ్‌ హీరోయిన్లతో సినిమాలు చేసేసిన అఖిల్‌ ఈసారి బాలీవుడ్‌ హీరోయిన్‌ని ట్రై చేద్దామకుంటున్నాడట. మరి ఈ సినిమాలో హీరోయిన్‌గా నటించే ఆ బాలీవుడ్‌ హీరోయిన్‌ ఎవరో తెలియాలంటే కొంతకాలం ఆగాల్సిందే. ఈ సినిమాకి సంబంధంచిన పూర్తి వివరాలను మేకర్స్‌ త్వరలోనే వెల్లడిస్తారని తెలుస్తోంది.