English | Telugu
'రౌడీ జనార్దన్'గా విజయ్ దేవరకొండ.. మాస్ కమ్ బ్యాక్ లోడింగ్!
Updated : Oct 11, 2025
'రాజావారు రాణిగారు' ఫేమ్ రవి కిరణ్ కోలా దర్శకత్వంలో విజయ్ దేవరకొండ ఓ సినిమా చేస్తున్న సంగతి తెలిసిందే. శ్రీ వెంకటేశ్వర క్రియేషన్స్ బ్యానర్ పై దిల్ రాజు, శిరీష్ నిర్మిస్తున్న ఈ సినిమాకి 'రౌడీ జనార్దన్' అనే ఆసక్తికర టైటిల్ ను పెట్టారు. ఇందులో కీర్తి సురేష్ హీరోయిన్ గా నటిస్తోంది. విజయ్-కీర్తి జోడిగా నటిస్తున్న మొదటి సినిమా ఇదే కావడం విశేషం.
ఈ రోజు హైదరాబాద్ లో పూజా కార్యక్రమాలతో ఈ చిత్రం ఘనంగా ప్రారంభమైంది. ముహూర్తపు సన్నివేశానికి ప్రముఖ అల్లు అరవింద్ క్లాప్ ఇవ్వగా, ప్రొడ్యూసర్ నిరంజన్ రెడ్డి కెమెరా స్విచ్ఛాన్ చేశారు. దర్శకుడు హను రాఘవపూడి ఫస్ట్ షాట్ డైరెక్షన్ చేశారు.
రూరల్ యాక్షన్ డ్రామా నేపథ్యంతో తెరకెక్కనున్న 'రౌడీ జనార్దన్' ఈ నెల 16వ తేదీ నుంచి రెగ్యులర్ షూటింగ్ కు వెళ్లనుంది. సినిమాటోగ్రాఫర్ గా అనంద్ సి.చంద్రన్, ప్రొడక్షన్ డిజైనర్ గా డినో శంకర్ వ్యవహరిస్తున్న ఈ మూవీని వచ్చే ఏడాది ప్రేక్షకుల ముందుకు తీసుకురానున్నారు.
విజయ్ కొన్నేళ్లుగా సాలిడ్ సక్సెస్ కోసం ఎదురుచూస్తున్నాడు. భారీ అంచనాలతో విడుదలైన గత చిత్రం 'కింగ్డమ్' నిరాశపరిచింది. దీంతో 'రౌడీ జనార్దన్'తో అదిరిపోయే కమ్ బ్యాక్ ఇవ్వాలని చూస్తున్నాడు. దీంతో పాటు, రాహుల్ సాంకృత్యాన్ డైరెక్షన్ లోనూ ఓ సినిమా చేస్తున్నాడు.