టాలీవుడ్ కి చెందిన పలువురు స్టార్లు వ్యాపార రంగంలోనూ రాణిస్తున్నారు. ముఖ్యంగా మల్టీప్లెక్స్ బిజినెస్ పట్ల వారు ఆసక్తి చూపుతున్నారు. ఓ రకంగా తెలుగు స్టార్లు మల్టీప్లెక్స్ బిజినెస్ వైపు అడుగులు వేయడానికి కారణం ఏషియన్ సినిమాస్ అని చెప్పొచ్చు. స్టార్ల భాగస్వామ్యంతో ఏషియన్ సంస్థ పలు మల్టీప్లెక్స్ లు నిర్మిస్తోంది.

ఇప్పటికే ఏషియన్ సంస్థ.. హైదరాబాద్ లోని గచ్చిబౌలిలో మహేష్ బాబుతో కలిసి ఏఎంబీ సినిమాస్, అల్లు అర్జున్ తో కలిసి అమీర్ పేట్ లో ఏఏఏ సినిమాస్ ప్రారంభించింది. ఈ రెండింటికి విశేష ఆదరణ లభిస్తోంది. ఇక ఇప్పుడు రవితేజ వంతు వచ్చింది. దిల్‍సుఖ్‍నగర్ లో రవితేజతో కలిసి ఏఆర్టీ(ఏషియన్ రవితేజ) సినిమాస్ పేరుతో ఓ మల్టీప్లెక్స్ నిర్మిస్తోంది ఏషియన్ సంస్థ. ఇందులో ఆరు స్క్రీన్ లు ఉంటాయట. ఈ ఏడాదిలోనే ఈ మల్టీప్లెక్స్ ప్రారంభం కానుందని అంటున్నారు. ఏఎంబీ సినిమాస్, ఏఏఏ సినిమాస్ మాదిరిగానే.. ఏఆర్టీ సినిమాస్ కూడా సూపర్ సక్సెస్ అవుతుందేమో చూడాలి.