2019 ‘ఉరి: The Surgical Strike’ చిత్రంతో దర్శకుడుగా పరిచయమైన ఆదిత్యధర్.. మొదటి సినిమాతోనే అందరి ప్రశంసలు అందుకున్నారు. ఉత్తమ దర్శకుడుగా జాతీయ అవార్డు కూడా దక్కించుకున్నారు. ఆరేళ్ల గ్యాప్ తీసుకొని ఇటీవల ‘దురంధర్‌’ చిత్రంతో మరోసారి ప్రేక్షకుల ముందుకు వచ్చారు. గత ఏడాది డిసెంబర్ 5న విడుదలైన ఈ సినిమా బ్లాక్‌బస్టర్‌గా నిలిచి భారీ కలెక్షన్స్ సాధిస్తోంది. ఇప్ప్పుడు ‘దురంధర్‌2’ చిత్రాన్ని ప్లాన్ చేస్తున్నారు.

2021లో ‘పుష్ప’ చిత్రంతో జాతీయ స్థాయిలో అల్లు అర్జున్‌కి మంచి పేరు వచ్చింది. అంతేకాదు, ఉత్తమ నటుడుగా జాతీయ అవార్డు కూడా అందుకున్నారు. దాంతో బాలీవుడ్‌కి చెందిన భారీ చిత్ర నిర్మాణ సంస్థలు బన్నీతో సినిమా చేసేందుకు ఆసక్తి చూపించాయి. అందులో భాగంగానే ఆదిత్య ధర్ తన డ్రీమ్ ప్రాజెక్ట్‌ని సెట్స్‌పైకి తీసుకెళ్లాలనుకున్నారు. బన్నీకి స్టోరీ కూడా నేరేట్ చేశారని తెలుస్తోంది. అశ్వత్థామ ప్రధాన పాత్రగా రాసుకున్న కథ అది. మొదట విక్కీ కౌశల్‌తో ఆదిత్య ఈ సినిమా చేస్తారని ప్రచారం జరిగింది.

ఆదిత్య మాత్రం అల్లు అర్జున్‌తో ఆ ప్రాజెక్ట్ చెయ్యాలని ప్రయత్నించారు. బన్నీకి కథ నచ్చి సినిమా చేసేందుకు ఓకే చెప్పారు. అయితే అదే సమయంలో ప్రభాస్, అమితాబ్, కమల్‌హాసన్ వంటి స్టార్స్‌తో నాగ్ అశ్విన్ ‘కల్కి 2898ఎడి’ చిత్రాన్ని ఎనౌన్స్ చేశారు. దాంతో అల్లు అర్జున్, ఆదిత్య ధర్ ప్రాజెక్ట్ ఆగిపోయింది. ఎందుకంటే ‘కల్కి’ పురాణాలను ఫ్యూచర్ వరల్డ్‌తో లింక్ చేస్తూ రూపొందించిన ఫిక్షనల్ సినిమా. అందులో కర్ణుడు, అర్జునుడు, కష్ణుడు వంటి పాత్రలతోపాటు అశ్వత్థామ పాత్ర ప్రధానంగా ఉంటుంది. 2024లో విడుదలైన ఈ సినిమా బ్లాక్‌బస్టర్ హిట్ అయింది. ఇప్ప్పుడు ‘కల్కి2’ని తెరకెక్కించే పనిలో ఉన్నారు నాగ్ అశ్విన్.

అశ్వత్థామ కథను ‘కల్కి’లో ప్రేక్షకులు చూసేశారు. మళ్ళీ అదే కథతో సినిమా చేయడం కరెక్ట్ కాదని భావించిన ఆదిత్య, బన్నీ ఆ ప్రాజెక్ట్‌ని పక్కన పెట్టేశారని తెలుస్తోంది. తాజాగా ‘దురంధర్‌’ చిత్రం విడుదలైన తర్వాత ఆదిత్య ధర్ తన నెక్స్‌ట్ సినిమాను బన్నీ చేస్తారనే వార్త సోషల్ మీడియాలో వినిపిస్తోంది. అయితే ‘దురంధర్‌2’ తర్వాత వీరి కాంబినేషన్‌లో సినిమా ఉంటుందా, లేదా అనే విషయంలో క్లారిటీ వస్తుంది. బన్నీ కూడా తను కమిట్ అయిన ప్రాజెక్ట్స్‌తో బిజీగా ఉన్నారు. ఆదిత్య, బన్నీ తమ ప్రాజెక్టులు పూర్తి చేసిన తర్వాత కలిసి సినిమా చేస్తారేమో చూడాలి.