ఓ వైపు థియేటర్ కి వచ్చే ప్రేక్షకులు రోజురోజుకి తగ్గిపోతున్నారని నిర్మాతలు ఆవేదన వ్యక్తం చేస్తుంటారు. మరోవైపు, అదే నిర్మాతలు తమ సినిమాలను మూడు, నాలుగు వారాలకే ఓటీటీలో విడుదల చేస్తుంటారు. ఇప్పుడు 'కూలీ' కూడా నాలుగు వారాలకే ఓటీటీలోకి వచ్చేస్తోంది. (Coolie On OTT)

సూపర్ స్టార్ రజినీకాంత్, డైరెక్టర్ లోకేష్ కనగరాజ్ కాంబినేషన్ లో రూపొందిన మూవీ 'కూలీ'. సన్ పిక్చర్స్ నిర్మించిన ఈ యాక్షన్ థ్రిల్లర్ లో నాగార్జున, సౌబిన్ షాహిర్, ఉపేంద్ర ముఖ్య పాత్రలు పోషించారు. భారీ అంచనాలతో ఆగస్టు 14న థియేటర్లలో అడుగుపెట్టిన ఈ చిత్రం.. డివైడ్ టాక్ ని సొంతం చేసుకుంది. అయినప్పటికీ వరల్డ్ వైడ్ గా రూ.500 కోట్ల గ్రాస్ తో సత్తా చాటింది. అయితే ఈ మూవీ నెల కూడా తిరగకుండానే ఓటీటీలోకి అడుగుపెడుతోంది.

'కూలీ' డిజిటల్ రైట్స్ ని ప్రముఖ ఓటీటీ వేదిక అమెజాన్ ప్రైమ్ వీడియో భారీ ధరకు సొంతం చేసుకుంది. ఈ సినిమాని సెప్టెంబర్ 11 నుంచి స్ట్రీమింగ్ చేయనున్నట్లు తాజాగా ప్రైమ్ వీడియో ప్రకటించింది. తమిళ, తెలుగు, కన్నడ, మలయాళ భాషల్లో స్ట్రీమింగ్ కానుంది. హిందీ వెర్షన్ మాత్రం ఎనిమిది వారాల తర్వాత అందుబాటులోకి రానుంది.

'కూలీ' లాంటి భారీ సినిమాలను కూడా నాలుగు వారాలకే ఓటీటీలో రిలీజ్ చేయడంపై నెటిజెన్లు రకరకాలుగా స్పందిస్తున్నారు. ఈ ట్రెండ్ ఇలాగే కొనసాగితే.. భవిష్యత్ లో స్టార్ హీరోల సినిమాలకు కూడా బ్లాక్ బస్టర్ టాక్ రాకపోతే.. ఫస్ట్ వీకెండ్ కే సర్దేసుకోవాల్సిందే అని అభిప్రాయపడుతున్నారు.