English | Telugu
వాసూ వర్మ దర్శకత్వంలో అల్లు అర్జున్
Updated : May 4, 2011
వాసూ వర్మ దర్శకత్వంలో అల్లు అర్జున్ హీరోగా, దిల్ రాజు ఒక సినిమా నిర్మిస్తున్నట్టు వినికిడి. వివరాల్లోకి వెళితే స్టైలిష్ స్టార్ అల్లు అర్జున్ హీరోగా, వాసూవర్మ దర్శకత్వంలో, దిల్ రాజు ఒక చిత్రాన్ని నిర్మించేందుకు సన్నాహాలు చేస్తున్నారు. వాసూ వర్మ అంటే అక్కినేని వంశం మూడో తరం హీరో అయిన నాగచైతన్య హీరోగా, సీనియర్ నటి రాధ కూతురు కార్తీక హీరోయిన్ గా తొలిసారి నటించగా, దిల్ రాజు నిర్మించిన "జోష్" సినిమాకి దర్శకత్వం వహించిన దర్శకుడు.
ఆ చిత్రం ఆశించిన స్థాయిలో విజయం సాధించకపోయినా దిల్ రాజు అతనికి మరో సినిమా అవకాశం ఇస్తున్నాడు. గతంలో అల్లు అర్జున్ హీరోగా "ఆర్య", "పరుగు" వంటి రెండు చిత్రాలను నిర్మించాడు దిల్ రాజు. ఇది వాసూ వర్మతో దిల్ రాజు నిర్మిస్తున్న రెండవ చిత్రం కావటం విశేషం. దిల్ రాజు గతంలో "మున్నా" అనే చిత్రాన్ని ఫ్లాప్ చేసినా, "బృందావనం" చిత్రాన్నిచ్చాడు వంశీ పైడిపల్లికి. అతను ఆ అవకాశాన్ని సద్వినియోగం చేసుకుని "బృందావనం" చిత్రాన్ని హిట్ చేశాడు. అలాగే వాసూవర్మ కూడా ఈ చిత్రాన్ని హిట్ చేస్తాదని ఆశిద్దాం.