English | Telugu
ఎన్నాళ్లకెన్నాళ్లకు.. ఓటీటీలోకి అఖిల్ 'ఏజెంట్'!
Updated : Sep 22, 2023
ఈమధ్య జయాపజయాలతో సంబంధం లేకుండా మెజారిటీ సినిమాలు థియేటర్లలో విడుదలైన నాలుగు వారాలకే ఓటీటీలో దర్శనమిస్తున్నాయి. కానీ 'ఏజెంట్' మాత్రం థియేటర్లలో విడుదలై ఐదు నెలలు అవుతున్నా, ఇంతవరకు ఓటీటీలోకి రాలేదు. అసలు ఈ సినిమా ఓటీటీలో విడుదలవుతుందా లేదా అనే అనుమానాలు వ్యక్తమయ్యాయి. అయితే ఎట్టకేలకు ఈ సినిమా ఓటీటీ విడుదలకు ముహూర్తం ఖరారైంది.
అక్కినేని అఖిల్, మమ్ముట్టి, సాక్షి వైద్యా ప్రధాన పాత్రల్లో సురేందర్ రెడ్డి దర్శకత్వంలో రూపొందిన సినిమా 'ఏజెంట్'. ఏకే ఎంటర్టైన్మెంట్స్ నిర్మించిన ఈ సినిమా ఈ ఏడాది ఏప్రిల్ 28న థియేటర్లలో విడుదలై పరాజయం పాలైంది. అయినప్పటికీ థియేటర్లలో మిస్ అయినవారు.. ఈ సినిమాని ఓటీటీలో చూడటానికి బాగానే ఆసక్తి చూపారు. కానీ ఏవో కారణాల వల్ల ఓటీటీ విడుదల ఆలస్యమవుతూ వచ్చింది. నెలలు గడిచిపోవడంతో ఈమధ్య అసలు ఆ సినిమా ఊసే లేదు. దాదాపు అందరూ మర్చిపోతున్న సమయంలో సడెన్ గా 'ఏజెంట్' ఓటీటీ రిలీజ్ డేట్ ప్రకటన వచ్చింది. ఈ సినిమాని సెప్టెంబర్ 29 నుంచి స్ట్రీమింగ్ చేయనున్నట్లు తాజాగా సోనీ లివ్ ప్రకటించింది. మరి ఇంత ఆలస్యంగా ఓటీటీ ఎంట్రీ ఇస్తున్న ఏజెంట్ కి ఎలాంటి ఆదరణ లభిస్తుందో చూడాలి.