ప‌లు హాలీవుడ్ చిత్రాల్లో అద్భుత‌మైన యాక్ష‌న్ స‌న్నివేశాల్లో న‌టించి మెప్పించిన హాలీవుడ్ న‌టి మిచెల్ లీ తాజాగా ‘టైగర్ 3’ చిత్రంలో మరోసారి వావ్ అనిపించే యాక్ష‌న్ సీక్వెన్స్‌లో మెప్పించ‌నుంది. బాలీవుడ్ సూప‌ర్ స్టార్ స‌ల్మాన్ ఖాన్‌, క‌త్రినా కైఫ్ జంట‌గా న‌టించిన యాక్ష‌న్ థ్రిల్లర్ ‘టైగర్ 3’. రీసెంట్‌గా ఈ సినిమా ట్రైల‌ర్ విడుద‌లైన సంగ‌తి తెలిసిందే. ఇందులో క‌త్రినా, మిచెల్ లీ మ‌ధ్య ఉన్న ట‌వ‌ల్ ఫైట్ క్లిప్ ఓ స‌న్నివేశంలో చూపించారు. ఆ సీన్ ఇంట‌ర్నెట్‌లో ఎంత వైర‌ల్ అయ్యిందో ప్ర‌త్యేకంగా చెప్ప‌న‌క్క‌ర్లేదు. ఈ ట‌వ‌ల్ ఫైట్ సీన్‌ని ట‌ర్కిష్‌లోని హామామ్‌లో చిత్రీక‌రించారు.

‘టైగర్ 3’లో చూపించిన ట‌వల్ ఫైట్‌లోని ఓ చిన్న స‌న్నివేశం నెట్టింట వైర‌ల్ కావ‌టంపై మిచెల్ ఆశ్చ‌ర్యపోవ‌టం లేదు. అందుకు కార‌ణం.. క‌త్రినాతో మిచెల్ స‌ద‌రు ఫైట్ సీన్‌ను ఎలా చేయాలి, ఎంత కొత్త‌గా చేస్తే ఆడియెన్స్‌కి అది క‌నెక్ట్ అవుతుంద‌నే దానిపై కొన్ని వారాల పాటు రీసెర్చ్ చేసిన‌ట్లు చెప్పుకొచ్చారు. ఇంకా మిచెల్ లీ మాట్లాడుతూ ‘‘కత్రినాతో నేను చేసిన టవల్ ఫైట్‌కి సంబంధించిన చిన్న స‌న్నివేశం గురించి ఇలా అంద‌రూ మాట్లాడుకోవ‌టంపై నేనేమీ ఆశ్చ‌ర్య‌పోవ‌టం లేదు. దీన్ని చిత్రీక‌రించే స‌మ‌యంలో దీని గురించి అంద‌రూ మాట్లాడుకునేంత డిఫ‌రెంట్‌గా ఉంటుంద‌ని న‌మ్మాను. ఈ ఫైట్‌ను చిత్రీక‌రించ‌టానికి ముందు నేను, క‌త్రినా క‌లిసి కొన్ని వారాల పాటు ప్రాక్టీస్ చేశాం. ఆ ఫైట్‌, దాన్ని డిజైన్ చేసిన తీరు అద్భుతం. ఇంట‌ర్నేష‌న‌ల్ స్టాండ‌ర్డ్స్‌లో దీన్ని రూపొందించారు.’’ అన్నారు.

ఇంకా ఆమె మాట్లాడుతూ ‘‘మేం శరీరాలకు టవల్స్ చుట్టుకుని యాక్ష‌న్ సీక్వెన్స్‌లో పాల్గొన్నాం. ఇలాంటి యాక్ష‌న్ సీక్వెన్స్ చేయ‌టానికి క‌చ్చిత‌మైన యాక్ష‌న్ కొరియోగ్ర‌ఫీ అవ‌స‌రం. దాన్ని ఎంతో అందంగా డిజైన్ చేశారు. ఇది ఛాలెంజింగ్‌గా అనిపించింది. ఒక‌రినొక‌రు గాయ‌ప‌రుచుకోకుండా ఓ క‌చ్చిత‌మైన దూరాన్ని పాటిస్తూ ఫైట్ సీక్వెన్స్‌లో పాల్గొన‌టం కూడా ఓ ఛాలెంజింగ్ విష‌య‌మే. కత్రినా, నేను ఎంతో ప్రొఫెష‌న‌ల్‌గా ఉండ‌టం వ‌ల్ల ఎలాంటి గాయాలు కాలేదు’’ అన్నారు.

య‌ష్ రాజ్ ఫిలిమ్స్ స్పై యూనివ‌ర్స్‌లో భాగంగా టైగ‌ర్ 3 సినిమాను ఆదిత్య చోప్రా నిర్మించారు. మ‌నీష్ శ‌ర్మ ద‌ర్శ‌క‌త్వంలో తెర‌కెక్కిన ఈ సినిమా దీపావ‌ళి సంద‌ర్బంగా న‌వంబ‌ర్ 12న హిందీ, తెలుగు, త‌మిళ భాష‌ల్లో రిలీజ్ కానుంది.