రాఖీ ఔర్ రాణీ కీ ప్రేమ్ క‌హానీ సినిమాకు సీక్వెల్ రెడీ అవుతుంద‌నే ప్రచారం గ‌ట్టిగా జ‌రుగుతోంది. ర‌ణ్‌వీర్ సింగ్‌, ఆలియా జంటగా న‌టించిన సినిమా రాఖీ ఔర్ రాణీ కీ ప్రేమ్ క‌హానీ. ఏడేళ్ల గ్యాప్ త‌ర్వాత క‌ర‌ణ్ జోహార్ ఈ సినిమాను తెర‌కెక్కించారు. ఆయ‌న సినిమా ఇంట‌స్ట్రీలోకి అడుగుపెట్టి పాతికేళ్లు అయిన సంద‌ర్భంగా విడుద‌లైంది ఈ సినిమా. త‌న ఓన్ బ్యాన‌ర్ ధ‌ర్మ ప్రొడ‌క్ష‌న్స్ మీద తెర‌కెక్కించారు. రొమాంటిక్ డ్రామాగా రూపొందింది. టైటిల్ రోల్స్ లో ర‌ణ్‌వీర్‌, ఆలియా మెప్పించ‌బ‌ట్టి, మాసివ్ స‌క్సెస్ అందుకుంది. జులై 28న విడుద‌లైన ఈ సినిమా ఇంకా క‌లెక్ష‌న్లు రాబ‌డుతూనే ఉంది. ఈ నేప‌థ్యంలో రాఖీ ఔర్ రాణీ కీ ప్రేమ్ క‌హానీ సినిమాకు సీక్వెల్ ఉంటుంద‌నే ప్ర‌చారం జ‌రుగుతోంది. ఒక‌వేళ సీక్వెల్ ఉంటే, క‌థ ఏ మ‌లుపు తీసుకుంటుంద‌నే డిస్క‌ష‌న్స్ కూడా జ‌రుగుతున్నాయి. న‌టీన‌టులు, ద‌ర్శ‌కుడు కూడా ఈ సీక్వెల్‌కి సంబంధించి డిస్క‌స్ చేసుకుంటున్నారు. ప్ర‌స్తుతానికి ఈ ఐడియా బ‌డ్డింగ్ స్టేజ్‌లో ఉంద‌ని అంటున్నారు క‌ర‌ణ్ జోహార్‌.

దీని గురించి క‌ర‌ణ్‌ మాట్లాడుతూ ``రాఖీ, రాణీ పెళ్ల‌యిన త‌ర్వాత కుటుంబ‌స‌భ్యుల‌తో ఉంటార‌ని నేను అనుకోవ‌డం లేదు. వాళ్లిద్ద‌రూ విడిగా ఉన్న‌ప్ప‌టికీ, కుటుంబ‌స‌భ్యుల‌ను బాగా చూసుకుంటారు. దాన్ని బ‌ట్టి సీక్వెల్‌కి క‌థ‌ను అల్లుకోవాలి`` అని అన్నారు. పంజాబీ అబ్బాయికి, బెంగాలీ గ‌ర్ల్ కీ మ‌ధ్య ప్రేమ‌, ఆ ఇరువురి కుటుంబాల క‌ల‌యిక‌తో సాగుతుంది ఈ సినిమా. ధ‌ర్మేంద్ర‌, జ‌యా బ‌చ్చ‌న్‌, ష‌బానా ఆజ్మీ, టోటా రాయ్ చౌద‌రి, ఆమిర్ బ‌షీర్‌, చుర్ని గంగూలీ, క్షితీ జోగ్‌, అంజ‌లి ఆనంద్ కీల‌క పాత్ర‌ల్లో న‌టించారు.