Home  
Latest News

జగన్ సర్కారుకు మరో గట్టి ఎదురుదెబ్బ... 10రోజుల్లో నివేదిక కోరిన హైకోర్టు

సాధారణంగా ఏ పార్టీ అధికారంలోకి వస్తే ఆ పార్టీ పాలసీలకు అనుగుణంగా యంత్రాంగం నడుచుకోవడం కామన్. అయితే, తమ పార్టీ అధికారంలో ఉందని చెప్పుకోవడానికి ఆ పార్టీ రంగులను అక్కడక్కడా కనిపించేలా వేయడం కూడా సర్వసాధారణమే. కానీ అది శృతిమించినప్పుడే విమర్శలు వస్తాయి. ఆంధ్రప్రదేశ్ లో ఇప్పుడు అదే జరుగుతోంది. బడి, గుడి అని తేడా లేకుండా అన్నింటినీ వైసీపీ రంగులతో నింపేస్తున్నారు. దాంతో, ఏ ప్రభుత్వ భవనాన్ని చూసినా నీలం, ఆకుపచ్చ, తెలుపు రంగులే కనిపిస్తున్నాయి. చివరికి చెత్త కుండీలను కూడా వదలకుండా వైసీపీ రంగులతో నింపేస్తున్నారు. అయితే, ఇలా ప్రభుత్వ భవనాలను వైసీపీ రంగులతో నింపేయడంపై విమర్శలు వస్తున్నాయి. ప్రతిపక్ష టీడీపీయే కాదు సామాన్య ప్రజానీకం కూడా ఈ రంగుల రాజకీయాన్ని తీవ్రంగా వ్యతిరేకిస్తున్నారు. అయితే, ఇలా ప్రభుత్వ భవనాలను వైసీపీ రంగులతో నింపేయడంపై జగన్ ప్రభుత్వానికి గట్టి ఎదురుదెబ్బ తగిలింది. ప్రభుత్వ భవనాలకు వైసీపీ రంగులు వేయడంపై హైకోర్టు  తీవ్ర ఆగ్రహం వ్యక్తంచేసింది.   గుంటూరు జిల్లా వట్టిచెరుకూరు మండలం పల్లపాడు పంచాయతీ కార్యాలయానికి వైసీపీ రంగులు వేయడాన్ని వ్యతిరేకిస్తూ హైకోర్టులో పిటిషన్ దాఖలైంది. ఈ పిల్ పై విచారణపై జరిపిన ఉన్నత న్యాయస్థానం తీవ్రంగా స్పందించింది. ప్రభుత్వ భవనాలకు పార్టీ రంగులు ఎలా వేశారంటూ ప్రశ్నించింది. పంచాయతీ కార్యాలయానికి వైసీపీ రంగులు వేయడంపై పది రోజుల్లో నివేదిక ఇవ్వాలని గుంటూరు జిల్లా కలెక్టర్ ను హైకోర్టు ఆదేశించింది.  

భీమిలిలో గంటా వర్గం ఖాళీ... వైసీపీలో కొత్త టెన్షన్!!

విశాఖ జిల్లా భీమిలి నియోజక వర్గం 2019 సార్వత్రిక ఎన్నికల్లో హాట్ టాపిక్ గా మారిన విషయం విదితమే. అక్కడ టిడిపి తరపున పోటీ చెయ్యడానికి అప్పుడు ఎంపిగా ఉన్న అవంతి శ్రీనివాస్ అదే సమయంలో మంత్రిగా ఉన్న గంటా శ్రీనివాసరావులు తీవ్రంగా పోటీ పడ్డారు. చివరకు అవంతి శ్రీనివాస్ వైసీపీ గూటికి చేరి భీమిలిలో విజయం సాధించారు. మరోవైపు గంటా శ్రీనివాసరావు ఎప్పట్లాగే నియోజకవర్గం మారారు. విశాఖ ఉత్తర నియోజక వర్గం నుంచి అని గెలుపొందారు. భీమిలిలో విజయం సాధించిన అవంతి శ్రీనివాస్ కు వైఎస్ జగన్ మోహన్ రెడ్డి మంత్రి వర్గంలో స్థానం దక్కింది. అప్పటి నుంచి ఆయన మాజీ మంత్రి గంటాపై విమర్శనాస్త్రాలు సంధించడం మొదలు పెట్టారు. కానీ ఆయన మాత్రం మంత్రి అవంతి మాటలకు ఎక్కడ ప్రతిస్పందించడం లేదు. నిజానికి మాజీ మంత్రి గంటా శ్రీనివాసరావు భీమిలి నియోజకవర్గంలో ఉన్నపుడు ఆయన వెనక చాలా మంది నాయకులుండేవారు. అయితే భీమిలి నియోజక వర్గం నుంచి విశాఖ ఉత్తర నియోజకవర్గానికి గంట వెళ్లడంతో ఆయన వెనకున్న కొంతమంది అవంతి వైపు చేరారు. మరికొందరు మాత్రం ఎన్నికల సమయంలో సబ్బం హరి అక్కడి నుంచి పోటీ చేసినప్పటికీ గంట వర్గీయులుగానే కొనసాగుతున్నారు. ఈనేపధ్యంలో గంటాపై మంత్రి అవంతి వరుసగా విమర్శనాస్త్రాలు సంధిస్తుండడం వాటికైన స్పందించకపోవటం జరుగుతుంది. ఇక ఇలాగైతే లాభం లేదని మంత్రి అవంతి కొత్త పంథాను ఎంచుకున్నారు. ఇందులో భాగంగానే భీమిలి నియోజకవర్గంలో గంటా వర్గీయులుగా ఉన్న వారిని వైసీపీలో చేర్చుకున్నారు. అవంతి పిలవగానే గంట వర్గీయులు వైసీపీలో చేరడానికి కారణమేంటని ఆరా తీస్తే అసలు సంగతి బయటపడిందని స్థానిక రాజకీయ వర్గాల్లో చర్చ జరుగుతోంది. భీమిలిలో గంటా వర్గం లోని ప్రతి నాయకుడికి మంత్రి అవంతినే స్వయంగా ఫోన్ చేశారు అధికారంలో ఉన్న పార్టీ అందులో మంత్రి తమకు అన్నిసార్లు ఫోన్ చేయడంతో భీమిలిలోని గంటా వర్గీయులు ఆగలేకపోయారు. ఇప్పటికే టిడిపి నేతలను వేధించడం ఇబ్బంది పెట్టడం వంటి ఘటనలు రాష్ట్ర వ్యాప్తంగా జరుగుతున్నాయి. తమపై వేధింపులు మొదలయ్యే అవకాశం ఉందని భావించి వైసీపీలో చేరారు. కొందరేమో ఇప్పటికే చిన్న చిన్న నామినేటెడ్ పదవుల్లో ఉన్నారు. తాము ఆ పదవుల్లో అలాగే కొనసాగాలంటే అధికార పార్టీ అండదండలు తప్పనిసరని వారు కూడా పార్టీ మారారు. మరికొందరు భీమిలికి టిడిపి ఇంచార్జిగా ఉన్న సబ్బం హరి పార్టీని పూర్తి స్థాయిలో పట్టించుకోవడం లేదని ఈ క్రమంలో మంత్రే స్వయంగా పిలవడంతో వైసీపీలోకి వెళ్లామని అంటున్నట్లు సమాచారం.  ఇదిలా వుంటే అవంతి శ్రీనివాస్ వైయస్ఆర్ కాంగ్రెస్ పార్టీలో గంట వర్గీయుల చేరిక పై మరోలా చెబుతున్నారు. ఎందుకండీ వాళ్ళని పార్టీలో చేర్చుకున్నారు అని అవంతిని ఎవరైనా అడిగితే ఆ ఒకప్పుడు నేను ఎమ్మెల్యేగా పని చేసినప్పుడు వాళ్ళంతా నా అనుచరులే నా వెనకు తిరిగే వారు నేను చెబితేనే వారంతా గంటా వెనుక నడిచారు నేను మళ్లీ ఈ నియోజకవర్గానికి రావడంతో వారంతా ఒక్కొక్కరుగా వచ్చేస్తున్నారని అంటున్నారు. తాను ఎవరిని పిలవలేదు అని ఆయన బయటకు చెబుతున్నారు. తన మాటలకు గంట నుంచి స్పందన లేకున్నా ఆయన వర్గీయులను తన వైపు తిప్పుకున్నాననే సంతృప్తిలో అవంతి ఉన్నారు. మరోవైపు భీమిలి వైయస్ఆర్ కాంగ్రెస్ పార్టీలో కొత్త గుబులు మొదలైంది. ఇక్కడ ఇప్పటికే చాలా చోట్ల ఆ పార్టీ నాయకులు రెండు వర్గాలుగా ఉన్నారు. ఈ క్రమంలో టిడిపి నుంచి వలస వచ్చిన వారిని చూసి ఇప్పుడు మూడో వర్గం కూడా తయారవుతుందని అనుకుంటున్నారు. మొత్తం మీద గంట మీద పై చేయి సాధించేందుకు మంత్రి అవంతి శ్రీనివాస్ వేసిన ఎత్తులు మున్ముందు భీమిలి వైయస్ఆర్ కాంగ్రెస్ పార్టీలో ఎలాంటి సెగలు రేపుతాయో చూడాలి.

తెలంగాణపైకి బ్రహ్మాస్త్రాన్ని ప్రయోగిస్తున్న బీజేపీ...

తెలుగు రాష్ట్రాల్లో ఎలాగైనా పాగా వేయాలన్నది బీజేపీ టార్గెట్. అందుకోసం శతవిధాలా ప్రయత్నాలు చేస్తోంది. అయితే, ఏపీతో పోల్చితే తెలంగాణలో పరిస్థితులు అనుకూలంగా ఉండటంతో అధికారం కోసం సకల అస్త్రాలను ప్రయోగిస్తోంది. ఇప్పటివరకు రకరకాల ప్రయోగాలు చేసిన బీజేపీ... ఇప్పుడు అత్యంత శక్తివంతమైన బ్రహ్మాస్త్రాన్ని బయటికి తీస్తోంది. తెలంగాణ జనాభాలో సగ భాగమున్న బీసీలే లక్ష్యంగా వ్యూహాలకు పదునుపెడుతోంది. బీసీలను ఆకట్టుకుంటే చాలు... అధికారం దక్కించుకోవచ్చన్న నిర్ణయానికి వచ్చిన బీజేపీ... బీసీ అస్త్రాన్ని ప్రయోగించి వచ్చే ఎన్నికల నాటికి బలపడాలనుకుంటోంది.  గతంలో టీడీపీకి బీసీలే వెన్నుముఖగా నిలిచారు. అయితే, తెలంగాణలో తెలుగుదేశం దాదాపు కనుమరుగు కావడంతో బీసీ వర్గాన్ని మొత్తం తమవైపు తిప్పుకోవాలని భావిస్తోంది. ముఖ్యమంత్రి కేసీఆర్ కూడా బీసీ వర్గంపైనే దృష్టిపెట్టి వివిధ సంక్షేమ పథకాలు అమలు చేస్తుండటంతో... అంతకు మించిన వ్యూహంతో బలహీనవర్గాలను తనవైపు తిప్పుకునేందుకు కాషాయ పార్టీ వ్యూహరచన చేస్తోంది. ముఖ్యంగా బీజేపీలో బీసీలకు కల్పిస్తోన్న ప్రాధాన్యతను ప్రజల ముందు పెట్టేందుకు సిద్ధమవుతోంది. స్వయంగా ప్రధాని నరేంద్రమోడీయే బీసీ కావడంతో దాన్ని ఎక్కువగా ప్రజల్లోకి తీసుకెళ్లాలనుకుంటోంది. ఇక, తెలంగాణ గవర్నర్ గా బీసీ అయిన తమిళిసైని నియమించామని, అలాగే, తెలంగాణ బీసీ అయిన దత్తాత్రేయను హిమాచల్‌ గవర్నర్‌గా పంపి... బీజేపీలో బీసీలకు పెద్దపీట వేశామని జనంలోకి వెళ్లనున్నారు. ఇక, తెలంగాణ బీజేపీ అధ్యక్షుడిగా బీసీ అయిన లక్ష్మణ్ నే కొనసాగించే అవకాశాలు కనిపిస్తున్నాయి. బీసీలకు పెద్దపీట పేరుతో అధికార టీఆర్ఎస్ తో అన్ని పార్టీల్లోని బీసీ నాయకులను పెద్దఎత్తున బీజేపీలోకి లాగాలనేది కాషాయదళం వ్యూహం తెలుస్తోంది. అంతేకాదు 2024లో బీసీ ముఖ్యమంత్రి నినాదంతో ఎన్నికలకు వెళ్లాలని దాదాపు నిర్ణయం తీసుకున్నట్లు తెలుస్తోంది. మరి, మున్సిపల్ ఎన్నికల్లోనే ఈ బీసీ మంత్రాన్ని ప్రయోగిస్తారో లేక అసెంబ్లీ ఎన్నికల నాటికి బీసీ జపం చేస్తారో... అసలు బీజేపీ బీసీ మంత్రం వర్కవుట్ అవుతుందో లేదో తెలియాలంటే కొద్దిరోజులు ఆగాల్సిందే.

కరీంనగర్ జిల్లా విభజనతో చీలిన క్యాడర్.. అయోమయంలో తండ్రి కొడుకులు

ఉమ్మడి కరీంనగర్ జిల్లాలో టిఆర్ఎస్ సీనియర్ నేత రాజ్యసభ సభ్యుడు కెప్టెన్ లక్ష్మీకాంతారావు ఒకప్పుడు జిల్లా రాజకీయాలను శాశించారు. ఉద్యమ కాలం నుంచి కేసీఆర్ వెంట నడిచిన సీనియర్ పొలిటీషియన్ కావడంతో సహజంగానే పార్టీ నేతలు ఆయనకు ఎక్కువ ప్రాధాన్యం ఇచ్చేవారు. తన రాజకీయ వారసుడిగా పరిచయమైన ప్రస్తుత హుస్నాబాద్ ఎమ్మెల్యే సతీష్ బాబుకు అలాంటి ప్రాధాన్యతనే పార్టీ శ్రేణులు ఇచ్చేవారు.   జిల్లాల విభజన తర్వాత సీన్ మారిపోయింది. హుస్నాబాద్ నియోజక వర్గం మూడు జిల్లాల పరిధిలోకి వెళ్ళిపోవడంతో ఈ తండ్రీ కొడుకులకు కొత్త సమస్యలు మొదలయ్యాయి. వారిని పట్టించుకునే వారే కరువైపోయారు అంటున్నారు. జిల్లాల విభజన తర్వాత కరీంనగర్ వరంగల్ అర్బన్ జిల్లా సిద్దిపేట జిల్లాల పరిధిలోకి హుస్నాబాద్ నియోజక వర్గం వెళ్లింది. కరీంనగర్ జిల్లా పరిధిలో కెప్టెన్ లక్ష్మీకాంతరావు, ఎమ్మెల్యే సతీష్ బాబు చెప్పిన వారికే పదవులు వరిస్తూ ఉండగా.. వరంగల్ అర్బన్ జిల్లా పరిధిలో మాత్రం భిన్నమైన పరిణామాలు ఎదురవుతున్నాయి. తమ అనుచరులకు పదవులు ఇప్పించుకోవటం కష్టమవుతుందని అంటున్నారు. అంతేకాదు కనీసం సమాచారం లేకుండా నామినేటెడ్ పదవులను ఆ జిల్లా నేతలు భర్తీ చేస్తూ ఉండడంతో వీరికి ఆగ్రహం తెప్పిస్తోందని చెప్తున్నారు. కుడాకు సంబంధించిన పదవుల్లో హుస్నాబాద్ నియోజకవర్గానికి చెందిన వారికి ప్రాధాన్యం కల్పించకపోవడంతో ఎల్కతుర్తిలో జరిగిన సమావేశంలో బహిరంగంగానే తండ్రీ కొడుకులు తమ ఆవేదన వ్యక్తం చేశారు. కరీంనగర్ జిల్లా వాళ్లు దగ్గరికి రానివ్వరు, వరంగల్ జిల్లా వాళ్లు పట్టించుకోరంటూ ఎమ్మెల్యే సతీష్ బాబు అసహనం వ్యక్తం చేస్తున్నారు.  వరంగల్ అర్బన్ జిల్లా పరిధిలోని కాకతీయ అర్బన్ డెవలప్ మెంట్ అథారిటీలో హుస్నాబాద్ నియోజకవర్గానికి చెందిన వారికి డైరెక్టర్ల పదవుల్లో ప్రాధాన్యం కల్పించకపోవడం లక్ష్మీకాంత రావుకు, సతీష్ బాబుకు కోపం తెప్పించిందని పార్టీలో అనుకుంటున్నారు. లోకల్ నేతలకు ఇచ్చిన ప్రాధాన్యం హుస్నాబాద్ నియోజక వర్గ పరిధి లోని ఎల్కతుర్తి, భీమదేవరపల్లి మండలాల నేతలకు కల్పించకపోవడం పై లక్ష్మీకాంతరావు చురకలేస్తున్నారు. హుస్నాబాద్ నియోజక వర్గం మూడు జిల్లాల పరిధిలోకి వెళ్లడంతో స్థానిక ఎమ్మెల్యే సతీష్ బాబు మూడు జిల్లాల అధికారులతో పాటు ప్రధాన నేతలతోనూ సంబంధాలను కొనసాగించడం కష్టం గా మారింది. ఒక జిల్లా వైపు రాజకీయ పరిణామాలను సరిదిద్దేలోపే మరో జిల్లా పరిధిలో ఇంకో సమస్య ఎదురవుతుంది. దీనివల్ల పార్టీ శ్రేణుల్లో కాస్త అసంతృప్తి వ్యక్తమవుతోందని అంటున్నారు. అసంతృప్తిని తగ్గించేందుకు నేరుగా లక్ష్మీకాంతరావు జోక్యం చేసుకుంటున్నారు. పార్టీ కోసం పని చేసిన వారికి తగిన ప్రాధాన్యం కల్పించాలంటూ మిగతా జిల్లాల నేతలకు కాస్త గట్టిగానే చెబుతున్నారు. కొడుకు కోసం తండ్రి.. క్యాడర్ కోసం ఎమ్మెల్యే చేస్తున్న ప్రయత్నాలు ఏ మేరకు ఫలిస్తాయో చూడాలి అంటున్నారు జనాలు.  

వైసీపీలో రాజ్యసభ రేస్... ముగ్గురి పేర్లు దాదాపు ఖరారు

వైసీపీలో రాజ్యసభ రేస్ మొదలైంది. వచ్చే ఏడాది ఏపీ నుంచి నాలుగు రాజ్యసభ స్థానాలు ఖాళీ కానున్నాయి. అయితే, అసెంబ్లీలో పార్టీల బలాబలాల ప్రకారం ఆ నాలుగు సీట్లూ అధికార వైసీపీకే దక్కనున్నాయి. దాంతో, రాజ్యసభ సభ్యత్వాన్ని దక్కించుకునేందుకు పలువురు పోటీ పడుతున్నారు. అయితే, ఖాళీ అవుతోన్న ఆ నాలుగు స్థానాల్లో మూడింటికి ఆల్రెడీ అభ్యర్ధులు ఖరారైనట్లు తెలుస్తోంది. ఇటీవల పార్టీలో చేరిన బీద మస్తాన్ రావు, అలాగే గోకరాజు గంగరాజు తనయుడు గోకరాజు రంగరాజుకి రాజ్యసభ సభ్యత్వాలు దాదాపు ఫైనలైజ్ అయినట్లు చెబుతున్నారు. మూడో అభ్యర్ధిగా అయోధ్యరామిరెడ్డి పేరు వినిపిస్తోంది. ఇక, నాలుగో సీటును ఎస్సీలకు కేటాయించాలని వైసీపీ అధిష్టానం ఆలోచిస్తున్నట్లు పార్టీ వర్గాలు చెబుతున్నాయి.  అయితే, టీటీడీ ఛైర్మన్ వైవీ సుబ్బారెడ్డి కూడా రాజ్యసభ సభ్యత్వాన్ని ఆశిస్తున్నట్లు తెలుస్తోంది. సిట్టింగ్ ఎంపీ సీటు ఒంగోలును వదులుకున్నప్పుడు వైవీ సుబ్బారెడ్డికి రాజ్యసభ సీటు ఇస్తానని జగన్ హామీ ఇచ్చినట్టు చెబుతున్నారు. పైగా వైవీ సుబ్బారెడ్డి స్వయానా జగన్ కు బాబాయ్ కావడం, ఇఫ్పటికే టీటీడీ ఛైర్మన్ పదవి ఇచ్చి ఉండటంతో... మళ్లీ రాజ్యసభకు పంపుతారో లేదో కచ్చితంగా చెప్పలేని పరిస్థితి. అయితే, రెడ్డి కమ్యూనిటీ నుంచి ఒక్కరికే అవకాశమివ్వాలని జగన్ భావిస్తుండటంతో... అయోధ్యరామిరెడ్డి లేదా వైవీల్లో ఎవరో ఒకరికి మాత్రమే ఛాన్స్ దక్కే అవకాశముందంటున్నారు. ఎందుకంటే, వైసీపీకి ప్రస్తుతం ఇద్దరు రాజ్యసభ ఎంపీలు ఉండగా, వాళ్లిద్దరూ రెడ్డి సామాజికవర్గమే. దాంతో, వచ్చే ఏడాది వైసీపీకి దక్కనున్న నాలుగు రాజ్యసభ స్థానాల్లో రెండింటిని రెడ్డి కమ్యూనిటీ ఇచ్చే సాహసం చేయకపోవచ్చని అంటున్నారు. మొత్తానికి వచ్చే ఏడాది రాజ్యసభలో వైసీపీ బలం పెరగనుంది. ప్రస్తుతం ఇద్దరు రాజ్యసభ సభ్యులు ఉండగా, మరో నలుగురు జత కలవనున్నారు. దాంతో, రాజ్యసభలో వైసీపీ సభ్యుల సంఖ్య ఆరుకి పెరగనుంది. అలాగే, రాజ్యసభలో వైసీపీకి ప్రాధాన్యత దక్కనుంది.

151మంది ఒకవైపు... చంద్రబాబు ఒక్కరే ఒకవైపు...

ఏపీ అసెంబ్లీ శీతాకాల సమావేశాలు యుద్ధాన్ని తలపిస్తున్నాయి. అధికారపక్షం వైపు 151మంది ఎమ్మెల్యేలు ఉంటే... ప్రతిపక్షం వైపు 22మంది మాత్రమే ఉన్నారు. అయితే, ఈ 22మందిలోనూ సగమంది అసలు ఉలుకూ పలుకూ లేకుండా కూర్చుంటున్నారు. కొందరైతే అసలు సభకే రావడం లేదు. కొంతమంది వచ్చినా ఏ మూలనో దూరంగా కూర్చుంటున్నారు. దాంతో, చంద్రబాబు దాదాపు ఒంటరి పోరాటం చేస్తున్నారు. అధికారపక్షం అణ్వస్త్రాల్లాంటి బాంబులను విసురుతుంటే... వాటిని తట్టుకుంటూ ధీటుగా తిప్పికొడుతున్నారు. చంద్రబాబు అన్నట్లుగా పాతికేళ్ల యువకుడిలాగే 151మంది వైసీపీ ఎమ్మెల్యేలను ఎదుర్కొంటున్నారు. అయితే అంతోఇంతో అచ్చెన్నాయుడు, రామానాయుడు మాత్రమే చంద్రబాబు సపోర్టుగా నిలబడుతున్నారు. గొంతు కలుపుతున్నారు. అయితే, అచ్చెన్నాయుడు, రామానాయుడుని కూడా అధికారపక్షం దాదాపు నియంత్రిస్తుండటంతో... చంద్రబాబు ఒక్కరే ఒంటరి పోరాటం చేస్తున్నారు. అందుకే 50 మంది కాదు... 150మంది ఒకేసారి వచ్చినా తాను ఎదుర్కోగలనంటూ పంచ్ డైలాగులు విసరడమే కాకుండా, తన సామర్ధ్యాన్ని అధికారపక్షానికి రుచిచూపిస్తున్నారు చంద్రబాబు. అయితే, అధికారపక్షం చంద్రబాబునే టార్గెట్ చేయడం... మాటలతో కించపర్చుతుంటే... వాళ్లను ఎదుర్కోవడంలో చంద్రబాబు ఒంటరి పోరాటం చేస్తున్నారు. టీడీపీ ఐదేళ్ల పాలనపైనా, తనయుడు లోకేష్ పైనా విమర్శలు చేస్తుంటే... ఎప్పటికప్పుడు చంద్రబాబు లేచి తిప్పికొట్టాల్సి వస్తోంది. ప్రతిదానికీ చంద్రబాబే లేవాల్సి వస్తోంది. అచ్చెన్నాయుడు, రామానాయుడు, బుచ్చయ్యచౌదరిలు బాబుకి తోడుగా చెలరేగానికి ట్రై చేస్తున్నా... వైసీపీ నేతల దాడిని సమర్ధంగా తిప్పికొట్టలేకపోతున్నారని అంటున్నారు. ముఖ్యంగా అచ్చెన్నాయుడు మాట్లాడకుండా అధికారపక్షం కంట్రోల్ చేస్తోంది. ఒకవేళ లేచినా, మాటలతో కించపరుస్తూ కూర్చునేలా చేస్తున్నారు. దాంతో, అధికారపక్షాన్ని ధాటిగా ఎదుర్కొనేందుకు వాగ్ధాటి కలిగిన తెలుగు తమ్ముళ్లు చంద్రబాబుకి కరవయ్యారనే మాట వినిపిస్తోంది. ఇక, వల్లభనేని వంశీ... టీడీపీ నుంచి వేరుపడి ప్రత్యేక సీటును దక్కించుకున్నారు. మిగతా 22మంది ఎమ్మెల్యేల్లో సగం మంది పక్క చూపులు చూస్తుండటంతోనే చంద్రబాబుతో కలిసి ధాటిగా అధికారపక్షంపై విరుచుకుపడటం లేదని అంటున్నారు. అయితే, తన వెనుక ఎంతమంది ఉన్నారనేది పట్టించుకోని చంద్రబాబు వన్ మేన్ ఆర్మీలాగా అధికారపక్షంపై పోరాడుతున్నారు.  

పవన్ పై రాపాక సంచలన వ్యాఖ్యలు.. డౌట్ లేదు.. వైసీపీలో చేరడం ఖాయం!!

2019 ఏపీ అసెంబ్లీ ఎన్నికల్లో జనసేన గెలిచిందే ఒక్క ఎమ్మెల్యే సీటు అంటే... అసలు గెలిచిన ఆ ఒక్క ఎమ్మెల్యే తమ వైపు ఉన్నాడో లేడో అర్థంగాక అటు జనసేనాని పవన్ కళ్యాణ్, ఇటు జన సైనికులు తలలు పట్టుకుంటున్నారు. జనసేన ఒక్కగానొక్క ఎమ్మెల్యే రాపాక వరప్రసాద్‌ తీరు ఆ పార్టీని కలవరపెడుతోంది. ఎమ్మెల్యే రాపాక పేరుకి జనసేనలో ఉన్నా... ఆయన వ్యాఖ్యలు మాత్రం పూర్తిగా అధికార పార్టీ వైసీపీకి లాభం చేకూర్చేలా ఉంటున్నాయి. ఒకసారి అసెంబ్లీ సాక్షిగా సీఎం వైఎస్ జగన్ ని దేవుడు అని ఆకాశానికెత్తారు. మరోసారెమో జగన్ ఫోటోకి పాలాభిషేకం చేసారు. ఈ చర్యలతో రాపాక పార్టీ మారతారని అప్పట్లో ప్రచారం జరిగింది. అయితే రాపాక పార్టీ మారలేదు, ఆయన తీరూ మార్చుకోలేదు. ప్రభుత్వ పాఠశాలల్లో ఇంగ్లీష్ మీడియాన్ని ప్రవేశ పెడుతూ జగన్ సర్కార్ నిర్ణయం తీసుకున్న సంగతి తెలిసిందే. దీనిని పవన్ కళ్యాణ్ తీవ్రంగా వ్యతిరేకిస్తున్నారు. ఇంగ్లీష్ మీడియం పెడితే ఓకే.. కానీ తెలుగు మీడియంని పూర్తిగా తొలగించడం ఏంటని పవన్ మండిపడుతున్నారు. తెలుగు బాషని కాపాడాలంటూ.. పవన్ ప్రభుత్వానికి వ్యతిరేకంగా పోరాడుతున్నారు. అయితే రాపాక మాత్రం.. అసెంబ్లీలో ఇంగ్లీష్ మీడియంపై చర్చ  సందర్భంగా.. జగన్ సర్కార్ నిర్ణయాన్ని స్వాగతించారు. దీంతో ఉన్న ఒక్క ఎమ్మెల్యే కూడా పవన్ కి మద్దతు ఇవ్వట్లేదంటూ విమర్శలు మొదలయ్యాయి. ఇక తాజాగా రాపాక చేసిన కామెంట్స్ మరింత హాట్ టాపిక్ అయ్యాయి. పవన్ తాజాగా రైతుల కోసం దీక్ష చేసిన సంగతి తెలిసిందే. అయితే.. అసెంబ్లీ సమావేశాల కారణంగా పవన్ సభకు హాజరు కాలేదని గతంలో చెప్పిన రాపాక.. తాజాగా అసెంబ్లీ సమావేశాలకు హాజరయ్యే ముందు మీడియాతో మాట్లాడుతూ.. ఇతర కారణాల వల్ల పవన్‌ సభకు వెళ్లలేదని చెప్పారు. అంతేకాదు, పవన్‌ ఏ కార్యక్రమం చేసినా.. పదిమంది మాత్రమే వస్తారని సంచలన వ్యాఖ్యలు చేశారు. చిన్న చిన్న విషయానికి ధర్నాలు, సభలు పెట్టడం సరికాదని రాపాక సూచించారు. ముందుముందు పవన్‌ సభలకు ఇంకా ఆదరణ తగ్గిపోతుందని షాకింగ్ కామెంట్స్ చేసారు. మొత్తానికి రాపాక తీరు చూస్తుంటే జనసేనకి మరింత దూరం జరుగుతున్నారని అర్థమవుతోంది. వైసీపీలో చేరేందుకు ఆయన ఉత్సాహంగా ఉన్నారన్న ఊహాగానాలు జోరందుకున్నాయి. మరి రాపాక పార్టీ మారతారో లేక తన తీరుని మార్చుకుంటారో చూడాలి.

అన్నదమ్ముల రగడ.. అయ్యన్నపాత్రుడు ఇంటిపై వైసీపీ జెండా

చింతకాయల అయ్యన్న పాత్రుడు టిడిపి సీనియర్ నేత, మాజీ మంత్రి. ఈయనకు ఒక తమ్ముడు ఉన్నారు. ఆయన పేరు చింతకాయల సన్యాసిపాత్రుడు. మొన్నటి వరకు అన్నదమ్ములిద్దరూ టిడిపిలో ఉండేవారు. 2019 ఎన్నికల్లో నర్సీపట్నం నుండి పోటీ చేసి అయ్యన్న పాత్రుడు ఓడిపోయారు. అయితే ఇప్పుడు ఆయన ఇంట్లో పొలిటికల్ లొల్లి మొదలైంది. అయ్యన్న పాత్రుడు ఇంటిపై ఇంతకు ముందు టిడిపి జెండా ఉండేది. అయితే ఇప్పుడు అదే ఇంటి పై వైసీపీ జెండా ఎగురుతోంది. ఈ జెండాల లొల్లే ఇప్పుడు ఇంట్లో చిచ్చుపెట్టింది.  అయ్యన్నపాత్రుడి తమ్ముడు సన్యాసిపాత్రుడు ఇటీవలై వైసిపిలో చేరారు. అయ్యన్నపాత్రుడు తన కొడుకు విజయ్ కు ప్రాధాన్యత ఇస్తున్నారని సన్యాసిపాత్రుడు తన దారి తాను చూసుకున్నారు. సరిగ్గా అయ్యన్నపాత్రుడి బర్త్ డే రోజే మెడలో కండువా మార్చారు. ఇక్కడ వరకు వివాధం లేదు. కానీ ఇప్పుడు ఇంటి పై జెండా ఎగరడమే ఇంట్లో గొడవకు కారణమైంది. అయ్యన్న పాత్రుడు సన్యాసిపాత్రుడు ఇద్దరు ఒకే ఇంట్లో ఉంటున్నారు. పై ఫ్లోర్ లో సన్యాసిపాత్రుడు ఉంటే కింద గ్రౌండ్ ఫ్లోర్ లో అయ్యన్న పాత్రుడు ఉంటున్నారు. ఇంతకు ముందు టిడిపి జెండా ఇంటి పై ఉండేది. అయితే సన్యాసిపాత్రుడు ఇంటి పై వైసీపీ జెండా కూడా పెట్టటంతో ఇంట్లో వాళ్ల మధ్య గొడవ జరిగింది. ఈ విషయం పై మాటా మాటా పెరిగి అయ్యన్నపాత్రుడు పిన్ని బీపీ పెరిగి ఆస్పత్రిలో చేరింది. తమ ఇంటి పై వైసీపీ జెండా ఎలా ఎగుర వేస్తారనేది అయ్యన్న ప్రశ్న. అయితే తన ఇంటి పై తాను తన పార్టీ జెండా ఎగురవేశానని సన్యాసి అంటున్నారు. మొత్తానికి ఈ వివాదం పోలీసు స్టేషన్ కు చేరింది.  

పవన్ తిడితే.. చిరు ఆలింగనం... జగన్ విషయంలో పొంతనలేని మెగా బ్రదర్స్ ప్రవర్తన

వైసీపీ ప్రభుత్వంపై విపరీతమైన దూకుడుతో ముందుకు వెళ్తున్నారు జనసేనాని పవన్ కల్యాణ్. సీఎం జగన్ పై తీవ్రస్థాయిలో విరుచుకుపడుతున్నారు. ప్రభుత్వ విధానాలకు వ్యతిరేకంగా ధర్నాలు చేస్తున్నారు. రైతుల సమస్యలు, ఇసుక కొరతపై ఆందోళనలు చేశారు. అసలు సీఎంగా జగన్ ని తాను గుర్తించనంటూ ప్రకటించేశారు. సీఎం అన్యమత ప్రచారాన్ని ప్రోత్సహిస్తున్నారని ఆరోపించారు. ఇంగ్లిష్ మీడియం అమలుపై కూడా తీవ్రంగా మండిపడ్డారు. ఒక దశలో పవన్ కామెంట్స్ పై స్పందించిన సీఎం జగన్ కూడా పవన్ కల్యాణ్ ని వ్యక్తిగతంగా విమర్శించారు. పవన్ మూడు పెళ్లిల్లు చేసుకున్నారని విమర్శించారు. దీంతో సీఎం జగన్ కి పవన్ కల్యాణ్ కు మధ్య వివాదం పీక్ స్టేజ్ కు చేరింది. ఒక దశలో బిజెపి అమిత్ షా అంటే జగన్ కు భయం అంటూ బిజెపికి దగ్గరయ్యే ప్రయత్నాలు చేశారు. ఇంకా ముందుకెళ్లి తాను బిజెపికి ఎప్పుడూ దూరంగా లేనని చెప్పారు.  పవన్ తీరు అలా ఉంటే ఆయన సోదరుడు మెగాస్టార్ చిరంజీవి ఇందుకు పూర్తి భిన్నంగా ఉన్నారు. తనకి తమ్ముడికి అస్సలు సంబంధం లేదన్న ధోరణిలో ఉన్నారు. సైరా సినిమా విడుదలకు సీఎంని కుటుంబ సమేతంగా కలిసిన చిరంజీవి సిఎంను కొనియాడారు. అలాగే చిరంజీవి భార్య సీఎం సతీమణికి చీర పెడితే తిరిగి భారతి కూడా ఆమెకు చీర పెట్టారు. పోనీ అది సినిమా ప్రమోషన్ లో భాగం కదా అనుకుంటే తాజాగా మహిళలపై అత్యాచార నిందితులకు ఉరిశిక్ష ఖరారు చేస్తూ సీఎం జగన్ చేసిన దిశా చట్టాన్ని ప్రశంసిస్తూ కామెంట్ చేశారు చిరంజీవి. ఆయన తీసుకున్న నిర్ణయాన్ని సమర్థించారు. ఒక వైపు ప్రభుత్వానికి వ్యతిరేకంగా రైతు సమస్యల పై తమ్ముడు కాకినాడలో దీక్ష చేస్తున్న రోజు అన్న జగన్ ప్రభుత్వాన్ని కొనియాడారు. దీంతో చిరంజీవి వైసీపీకి దగ్గరవుతున్నారా అనే ప్రచారం జరుగుతోంది. మరోవైపు మరో మెగా బ్రదర్ నాగబాబు కూడా తమ్ముడు పవన్ వెంటే ఉంటారు. జనసేన బలోపేతానికి కృషి చేస్తున్నారు. మెగా ఫ్యాన్స్ అందరినీ ఒక్కతాటిపైకి తీసుకువచ్చి జనసేన వైపు మళ్లించడానికి కృషి చేస్తున్నారు. అయితే మరోవైపు చిరంజీవి జగన్ కి దగ్గరవుతున్నారా లేక తమ్ముడికి జగన్ కి మధ్య ఉన్న గ్యాప్ ను పూడ్చే ప్రయత్నాలు చేస్తున్నారా అనే చర్చ జరుగుతోంది. మొత్తం మీద కొణిదెల కుటుంబ కహాని ఎంటో అర్థం కాక మెగా ఫాన్స్ తలలు పట్టుకుంటున్నారు.

పైసా వసూల్.. బీజేపీలో కార్పొరేటర్ టిక్కెట్ కి కూడా కోట్లు పలుకుతుంది

నిజామాబాద్ కమలంలో వసూళ్ల దందా అంశం కలకలం రేపుతోంది. బల్దియా ఎన్నికల నగారా మోగక ముందే బిజెపిలో టిక్కెట్ల లొల్లి రచ్చకెక్కింది. పార్లమెంట్ ఎన్నికల్లో విజయం సాధించి ఊపుమీదున్నారు బీజేపీ నేతలు. నిజామాబాద్ కమలంలో తాజాగా ఓ అంశం రాజకీయ వర్గాల్లో చర్చనీయాంశమైంది. కార్పొరేటర్ టికెట్లు, కౌన్సిలర్ టికెట్లు ఇప్పిస్తామని కొందరు నాయకులు వసూళ్ల దందాకు తెర లేపడం విమర్శలకు దారి తీసింది. నిజామాబాద్ లో జరిగిన బిజెపి నగర కమిటీ సమావేశంలో ఈ వ్యవహారం పై ఫిర్యాదు రావడంతో పార్టీలో ఒక్కసారిగా కలకలం రేగింది. తమకు రాష్ట్ర స్థాయి నాయకులతో పరిచయాలు ఉన్నాయని, జాతీయ స్థాయి నేతలు కూడా తెలుసు అని చెప్పి కొందరు డబ్బులు వసూలు చేస్తున్నట్టు ద్వితీయ శ్రేణి నాయకుల్లో ఆశావహులు ఫిర్యాదు చేశారు. నిజామాబాద్ కార్పొరేషన్ లో కార్పొరేటర్, ఆర్మూర్ భీమ్ గల్ మునిసిపాలిటీల్లో కౌన్సిలర్ టిక్కెట్ల కోసం ఆ పార్టీ ఆశావహుల సంఖ్య పెరుగుతోంది. వారి ఉత్సాహాన్ని కొందరు నేతలు క్యాష్ చేసుకునే పనిలో పడిపోయారు. బిజెపి నిజామాబాద్ జిల్లా అధ్యక్షుడు పల్లె గంగారెడ్డి ఈ విషయంలో బహిరంగ ప్రకటన విడుదల చేశారు. కార్పొరేషన్ మున్సిపల్ ఎన్నికల్లో టికెట్లిస్తామని, పదవులు ఇప్పిస్తామని కొందరు డబ్బులు తీసుకుంటున్నట్లు జిల్లా పార్టీకి ఫిర్యాదులు అందాయి. అలాంటి వ్యక్తులు మీ వద్దకు వస్తే జిల్లా పార్టీకి ఫిర్యాదు చేయండి అంటూ ప్రకటించారు.  బీజేపీలో కార్పొరేటర్ టికెట్లు ఇప్పిస్తామని డబ్బులు వసూలు చేస్తున్నట్లు తమ దృష్టికి వచ్చిందని ఆ పార్టీ జిల్లా అధ్యక్షుడే స్వయంగా బహిరంగ ప్రకటన చేయడంతో ఆ వసూల్ రాజాలు ఎవరు అనే చర్చ పార్టీ వర్గాల్లో ప్రారంభమైంది. కేవలం నిజామాబాద్ కార్పొరేషన్ లోనే ఈ వ్యవహారం కొనసాగిందా, మిగిలిన మునిసిపాలిటీల్లోనూ ఇలాంటి దందాలు ఏమైనా సాగుతున్నాయా అనే అంశంపై పార్టీ అప్రమత్తమైంది. అమాయక కార్యకర్తలు, నాయకులు నష్టపోవద్దనే ఉద్దేశం తోనే ముందస్తుగా క్యాడర్ ను జిల్లా అంతటా అప్రమత్తం చేసేలా బహిరంగ ప్రకటన చేసినట్టు నేతలు కూడా చెప్తున్నారు. మొత్తానికి ఈ వ్యవహారం పార్టీ పరువు పోయిందని పార్టీ వర్గాలే అంటున్నాయి.

తప్పుడు డబ్బులతో తాము పేపర్లు, ఛానల్స్ పెట్టలేదు.. జగన్ పై బాబు ఫైర్!!

ఏపీ అసెంబ్లీలో ఇంగ్లీష్ మీడియంపై చర్చ సందర్భంగా సీఎం వైఎస్ జగన్, ప్రతిపక్ష నేత చంద్రబాబు మధ్య మాటల యుద్ధం నడిచింది. ఇంగ్లిష్‌ మీడియానికి టీడీపీ వ్యతిరేకం కాదని బాబు స్పష్టం చేశారు. జగన్‌ వల్లే ఇంగ్లీష్ మీడియం వచ్చిందనడం సరికాదని అన్నారు. గతంలో మున్సిపల్ పాఠశాలల్లో తమ హయాంలో ఇంగ్లిష్‌ మీడియాన్ని ప్రవేశపెట్టామని గుర్తు చేసారు. మీరే ఇంగ్లిష్‌ను కనిపెట్టినట్టు మాట్లాడొద్దని ఎద్దేవా చేసారు. తాము మున్సిపల్‌ స్కూళ్లలో ఇంగ్లిష్‌ను ప్రవేశపెడితే మీరు వ్యతిరేకించలేదా అని బాబు ప్రశ్నించారు. అంతేకాదు, మున్సిపల్‌ స్కూళ్లలో ఇంగ్లీష్ మీడియం ప్రవేశపెట్టిన సందర్భంలో సాక్షి పత్రికలో వచ్చిన వ్యతిరేక కథనాలను బాబు చదివి వినిపించారు. ఇంగ్లీష్ పై రెండు నాలుకల ధోరణితో జగన్ వ్యవహరిస్తున్నారని.. విపక్షంలో ఉన్నప్పుడు ఒకలా, అధికారంలో ఉన్నప్పుడు మరోలా వ్యవహరిస్తున్నారని బాబు మండిపడ్డారు.  చంద్రబాబు మాటలు.. వైసీపీకి ఆగ్రహం తెప్పించాయి. ముఖ్యంగా సీఎం జగన్ అసహనానికి గురయ్యారు. సాక్షిలో ఏం రాశారో చర్చించడానికి అసెంబ్లీ లేదని.. మీరేం చేశారో, నేనేం చేశానో చర్చిద్దామని చెప్పారు. అసలు తాను ఏనాడు ఇంగ్లీష్ ని వ్యతిరేకించలేదని స్పష్టం చేశారు. ఇంగ్లీష్ ను వ్యతిరేకించానని మీరు నిరూపించగలరా అని సవాల్ చేశారు. మీకు దమ్ము, ధైర్యం ఉంటే… నేను ఇంగ్లీష్ ను వ్యతిరేకించినట్టు నిరూపించమని జగన్ సవాల్ చేశారు. ప్రైవేట్ స్కూల్స్‌కు మేలు చేయడం కోసం మొత్తం ప్రభుత్వ పాఠశాలల విధానాన్ని భ్రష్టు పట్టించిన మీరు మాట్లాడుతున్నారంటే సిగ్గుతో తలదించుకోవాలని బాబుని ఉద్దేశించి జగన్ కామెంట్స్ చేశారు.   జగన్ వ్యాఖ్యలపై స్పందించిన బాబు.. తాను సిగ్గుతో తలంచుకోవడం కాదని, జగన్ సిగ్గుతో తలదించుకోవాలని వ్యాఖ్యానించారు. సాక్షి పేపర్ మిమ్మల్ని మోసం చేసిందని ప్రజలకు క్షమాపణ చెప్పి, తాను మోసం చేయలేదని జగన్ చెప్పుకోవాలని బాబు అన్నారు. సాక్షిలో రాస్తే తనకు సంబంధం లేదనట్టుగా జగన్ మాట్లాడుతున్నారని బాబు ఎద్దేవా చేసారు. ఈ సమయంలో అసహనానికి గురైన జగన్.. ఈ మనిషికి ఏమన్నా బుద్ధి, జ్ఞానం ఉందా అని బాబును ఉద్దేశించి ఘాటు వ్యాఖ్యలు చేసారు. సాక్షి అనేది ఒక మీడియా వ్యవస్థ అని, ఎవరి అనుకూల ఛానల్స్, పేపర్స్ వాళ్లకుంటాయని.. వాటిలో రాసినవి తీసుకొచ్చి మాట్లాడితే ఎలా కుదురుతుందని జగన్ ప్రశ్నించారు. ఈ వ్యాఖ్యలపై బాబు స్పందిస్తూ.. మీ పేపర్‌కు విశ్వసనీయత లేదా? అని ప్రశ్నించారు. మీ పేపర్ ఒక చెత్త పేపర్ అని బాబు ఫైర్ అయ్యారు. తనను బుద్ధి, జ్ఞానం లేదని సీఎం అన్నారని.. మరి సాక్షికి బుద్ధి, జ్ఞానం ఉందా? అని నిలదీశారు. తప్పుడు డబ్బులతో తాము పేపర్లు, ఛానల్స్ పెట్టలేదని బాబు తీవ్రస్థాయిలో విరుచుకుపడ్డారు.  

13మంది ఎమ్మెల్యేలుగా రెడీగా ఉన్నారు... జగన్ ఒక్క మాట చెబితే చాలు..!

మీ శాసనసభ్యత్వానికి ఢోకా లేదని జగన్మోహన్ రెడ్డి ఒక్క మాట చెబితే చాలు.... 13మంది టీడీపీ ఎమ్మెల్యేలు... తెలుగుదేశాన్ని వీడటానికి సిద్ధంగా ఉన్నారంటూ అసెంబ్లీ లాబీల్లో కోటంరెడ్డి శ్రీధర్ రెడ్డి మరోసారి సంచలన కామెంట్స్ చేశారు. ఎమ్మెల్యే పదవికి రాజీనామా చేస్తేనే పార్టీలో చేర్చుకుంటామన్న జగన్ షరతులతోనే టీడీపీ ఎమ్మెల్యేలు ఆగుతున్నారని, లేదంటే ఎప్పుడు టీడీపీ ఖాళీ అయ్యేదంటూ కోటంరెడ్డి బాంబు పేల్చారు. అయితే, షరతులు పెట్టినా కొందరు టీడీపీ ఎమ్మెల్యేలు వైసీపీలో చేరేందుకు సిద్ధంగా ఉన్నారని, తనతో 8మంది టచ్ లో ఉన్నారని చెప్పుకొచ్చారు. అయితే, ఇప్పటికే టీడీపీ నుంచి ఒక ఎమ్మెల్యే వల్లభనేని వంశీ బయటికి రాగా, తనతోపాటు మిగిలిన 22మందితోనే చంద్రబాబు... అసెంబ్లీలో అధికారపక్షాన్ని ముప్పుతిప్పలు పెడుతున్నారు. 67మంది ఎమ్మెల్యేలు ఉన్నప్పుడు కూడా జగన్ చేయలేనిది... కేవలం 22మంది ఎమ్మెల్యేలతో అధికార పక్షానికి బాబు చుక్కలు చూపిస్తున్నారు. 40 ఇయర్స్ ఇండస్ట్రీ అంటే ఏంటో చూపిస్తున్నారు. 40ఏళ్ల తన రాజకీయ అనుభవంతో జగన్ అండ్ టీమ్ ను ధీటుగా ఎదుర్కొంటున్నారు. ఒక్కరిని కాదు షేర్ ఖాన్... వంద మందిని ఒకేసారి పంపించు అన్న సినీ డైలాగ్ మాదిరిగా జగన్ టీమ్ పై చంద్రబాబు నిప్పులు చెరుగుతున్నారు. యాభై మంది కాదు... నూట యాభైమంది ఒకేసారి వచ్చినా ఎదుర్కొనే దమ్ము... సమాధానం చెప్పే సామర్ధ్యం తనకుందంటూ వైసీపీపై చంద్రబాబు విరుచుకుపడుతున్నారు. ఏపీ అసెంబ్లీ శీతాకాల సమావేశాలను గమనిస్తే... 151మంది వైసీపీ ఎమ్మెల్యేలకు చంద్రబాబు ఒక్కరే ధీటుగా సమాధానం చెబుతుండటం చూస్తుంటే... వన్ మేన్ ఆర్మీలా కనిపిస్తున్నారని తెలుగుదేశం శ్రేణులు సంబరపడుతున్నారు.  

రఘురామకృష్ణంరాజు రూటే సెపరేటు... ఢిల్లీ విందు వెనుక రాజకీయం...!

నరసాపురం వైసీపీ ఎంపీ రఘురామకృష్ణంరాజు మరోసారి తన ప్రత్యేకతను చాటుకున్నారు. వైసీపీ అధినేత వైఎస్ జగన్మోహన్ రెడ్డి ఎన్ని ఆంక్షలు పెట్టినా... తన వైఖరి మారదని, స్వతంత్రంగానే వ్యవహరిస్తానని మరోసారి చాటిచెప్పారు. మిగతా వైసీపీ ఎంపీల్లాగా తాను గిరితీసుకుని ఉండలేనని తేల్చిచెప్పారు. పార్లమెంట్ శీతాకాల సమావేశాల సందర్భంగా ప్రధాని మోడీని, అలాగే కేంద్ర మంత్రి అమిత్ షాను రఘురామకృష్ణంరాజు కలవడం వైసీపీలో కలకలానికి దారి తీసింది. ఇక, ఇప్పుడు ఏకంగా కేంద్ర మంత్రులకు, ఎంపీలకు భారీ విందే ఇచ్చారు రఘురామకృష్ణంరాజు.  సబార్డినేట్ లేజిస్లేచర్ కమిటీ అధ్యక్షుడి హోదాలో విందు ఇచ్చినప్పటికీ... ఇది కూడా వైసీపీ కలవరం పుట్టిస్తోంది. ఈ విందుకు ప్రధాని మోడీ, కేంద్ర మంత్రి అమిత్ షాతోపాటు కేంద్ర మంత్రులు, వివిధ పార్టీల ఎంపీలు, వీవీఐపీలను ఆహ్వానించినా... కేంద్ర మంత్రుల్లో రాజ్ నాథ్ సింగ్ మాత్రమే హాజరయ్యారు. ఇక, టీడీపీ నుంచి రామ్మోహన్ నాయుడు... టీఆర్ఎస్ నుంచి నామా నాగేశ్వర్రావు... వైసీపీ నుంచి మిథున్ రెడ్డి అటెండ్ అయ్యారు. అయితే, కేంద్ర మంత్రులకు, ఎంపీలకు  రఘురామకృష్ణంరాజు ఇచ్చిన విందుపై వైసీపీలో హాట్ హాట్ చర్చ జరుగుతోంది. ఇప్పటికే పార్టీ అనుమతి లేకుండా మోడీ, అమిత్ షా, కేంద్ర మంత్రులను రఘురామకృష్ణంరాజు కలవడంపై సీఎం జగన్ గుర్రుగా ఉన్నారనే ప్రచారం నేపథ్యంలో... ఈ విందుపై ఎలా స్పందిస్తారోనన్నది చర్చనీయాంశమైంది.  అయితే, కేంద్ర పెద్దలను బుట్టలో వేసుకునేందుకు, అలాగే బీజేపీని ప్రసన్నం చేసుకునేందుకే రఘురామకృష్ణంరాజు ఈ భారీ విందును ఇచ్చారనే గుసగుసలు కూడా వినిపిస్తున్నాయి. ఏదేమైనా, వైసీపీ ఎంపీల్లో తన దారి సెపరేట్ అని మరోసారి నిరూపించుకున్నారు  రఘురామకృష్ణంరాజు.

ఏపీ అసెంబ్లీలో వివాదాస్పదంగా వంశీ తీరు... వైసీపీకి వంశీ స్లిప్స్

ఏపీ అసెంబ్లీలో గన్నవరం ఎమ్మెల్యే వల్లభనేని వంశీ తీరు హాట్ టాపిక్ గా మారుతోంది. టీడీపీతో విభేదించిన వంశీ ...తనను ప్రత్యేక సభ్యుడిగా గుర్తించాలని స్పీకర్ ను కోరారు. వంశీ వినతి మేరకు ప్రత్యేక సభ్యుడిగా గుర్తించి సీటు కేటాయించారు. అయితే, ఇతరులకు కేటాయించిన సీట్లలో ఎక్కడైనా కూర్చోవచ్చని స్పీకర్ చెప్పడంతో... నాలుగో రోజు టీడీపీ సభ్యులు కూర్చునే మొదటి వరుసలోనే  కూర్చున్నారు. టీడీపీ ఎమ్మెల్యే బాలవీరాంజనేయస్వామి పక్క సీట్లో కూర్చున్న వల్లభనేని వంశీ... వైసీపీ ఎమ్మెల్యే అంబటికి స్లిప్స్ పంపిస్తూ వివాదాస్పదంగా వ్యవహరించారు. 2430 జీవో, మీడియాపై ఆంక్షలు విధించారంటూ తెలుగుదేశం ఆందోళన చేస్తున్న సమయంలో వంశీ... అంబటికి స్లిప్స్ పంపించడం చర్చనీయాంశమైంది. అయితే, టీడీపీ సభ్యుల పక్కనే కూర్చుంటూ పక్కలో బల్లెంలా వ్యవహరిస్తోన్న వంశీ తీరుపై చంద్రబాబు ఆగ్రహంగా ఉన్నట్లు తెలుస్తోంది.

ఏపీలో మహిళలకు అభయం.. కఠినమైన చట్టాలను ప్రవేశపెట్టనున్న ప్రభుత్వం

దిశ ఘటన తర్వాత మహిళల భద్రత పై ఆందోళనలు పెరుగుతున్నాయి. కఠిన చట్టాలు తీసుకురావాలంటూ దేశవ్యాప్తంగా పెద్ద ఎత్తున ఉద్యమాలు జరుగుతున్నాయి. ఈ నేపథ్యంలో ఏపీలోని వైసీపీ ప్రభుత్వం ఒక అడుగు ముందుకేసింది. మహిళలకు భరోసా ఇచ్చే ప్రయత్నం చేస్తోంది. మహిళల పై నేరాలకు పాల్పడే వారిని కఠినంగా శిక్షించేలా చట్టం తీసుకొస్తుంది. ముసాయిదా బిల్లుకు ఏపీ కేబినెట్ ఆమోదం తెలిపింది. అసెంబ్లీలో ఇప్పటికే మహిళా భద్రత పై చర్చకు పెట్టిన ఏపీ ప్రభుత్వం చారిత్రాత్మక బిల్లు కూడా తీసుకురానుంది. ఆంధ్రప్రదేశ్ క్రిమినల్ లా చట్ట సవరణ బిల్లు 2019ని ఏపీ క్యాబినెట్ ఆమోదించింది. దీంతో పాటు ఏపీ స్పెషల్ కోర్ట్ ఫర్ సెట్ స్పెసిఫైడ్ అఫెన్స్ ఎగైనెస్ట్ ఉమెన్ అండ్ చిల్డ్రన్ యాక్ట్ 2019 కి కూడా రాష్ట్ర మంత్రి వర్గం ఆమోదం తెలిపింది. కొత్తగా అమల్లో కి వస్తున్న ఈ చట్ట ప్రకారం అత్యాచారానికి పాల్పడితే నిందితులకు మరణ శిక్ష పడుతుంది. నేరాన్ని నిర్థారించే ఆధారాలుంటే 21 రోజుల్లోనే తుది తీర్పు వస్తుంది. వారంరోజుల్లో దర్యాప్తు పూర్తి చేసి 14 రోజుల్లోనే కోర్టు విచారణ పూర్తి చేస్తారు. 21 రోజులల్లో శిక్షలు ఖరారు అవుతాయి. అంటే ప్రస్తుతమున్న 4 నెలల విచారణ కాలాన్ని 21 రోజులకు తగ్గించారు. అంతేకాదు మహిళలు చిన్నారులపై నేరాలు విచారించేందుకు జిల్లాల్లో ప్రత్యేక కోర్టుల ఏర్పాటు చేస్తారు.  ఇక సోషల్ మీడియాలో మహిళలను చిన్నారులను కించపరిచేలా అసభ్య పోస్టులు పెట్టిన వారిపై సెక్షన్ 354 ఈ కింద చర్యలు తీసుకుంటారు. మొదటి సారి తప్పు చేస్తే రెండేళ్ల, రెండోసారి పోస్టులు పెడితే నాలుగేళ్ల జైలు శిక్ష విధిస్తారు. పిల్లల పై లైంగిక దాడులకు పాల్పడితే ప్రస్తుతమున్న చట్టాల ప్రకారం కేవలం మూడు నుంచి ఐదేళ్ల వరకు శిక్ష పడుతుంది. దీనిని పది నుంచి పద్నాలుగేండ్ల వరకూ పొడిగిస్తూ చట్టంలో చేర్చారు. నేరాల్లో తీవ్రత ఉంటే జీవిత ఖైదు విధిస్తారు. ఏపీ ప్రభుత్వం తీసుకొస్తున్న చట్టాన్ని మహిళా సంఘాలు స్వాగతిస్తున్నాయి. మహిళలకు భద్రత పై ఇలాంటి కఠిన చట్టాలు భరోసా కల్పిస్తాయంటున్నారు. ఇతర రాష్ట్రాలు కూడా ఇలాంటి కఠిన చట్టాలు తీసుకు రావాలని కోరుతున్నారు. నిర్భయ చట్టం కంటే మరింత కఠినంగా ఉండే చట్టాలను కేంద్రం కూడా తీసుకురావాలని మహిళలు కోరుతున్నారు.

దిశ నిందితుల ఎన్‌‌కౌంటర్ పై సుప్రీం కీలక నిర్ణయం

దిశ నిందితుల ఎన్‌కౌంటర్‌పై సుప్రీంకోర్టు కీలక నిర్ణయం తీసుకుంది. మాజీ న్యాయమూర్తి వీఎస్ సిర్పూర్‌కర్ నేతృత్వంలో ముగ్గురు సభ్యుల విచారణ కమిటీని ఏర్పాటు చేసింది. సిర్పూర్‌కర్ తో పాటు వీఎన్ రేఖ, సీబీఐ మాజీ అధికారి కార్తికేయన్ సభ్యులుగా ఉంటారు. ఆరునెలల్లో విచారణను పూర్తిచేయాలని సుప్రీం ఆదేశించింది. సుప్రీంకోర్టు ప్రధాన న్యాయమూర్తి జస్టిస్ ఎస్ఏ బోబ్డే నేతృత్వంలోని ధర్మాసనం ఈ మేరకు ఆదేశాలు జారీచేసింది. దిశ ఎన్‌కౌంటర్‌పై అన్నికోర్టులలో దాఖలైన పిటిషన్లపై సుప్రీం కోర్టు స్టే విధించింది.   తెలంగాణ ప్రభుత్వం తరఫున మాజీ అడ్వకేట్ జనరల్ ముకుల్ రోహత్గి వాదనలు వినిపించారు. కమిటీ ఏర్పాటును ఆయన తీవ్రంగా వ్యతిరేకించారు. ఎన్‌కౌంటర్ వెనక ఎలాంటి దురుద్దేశం లేదని తెలిపారు. సీన్ రీ కన్‌స్ట్రక్షన్ చేసే సమయంలో నిందితులు పారిపోయే ప్రయత్నం చేశారని వివరించారు. దిశ మొబైల్ ఇస్తామని చెప్పి రాళ్లతో దాడి చేశారని.. ఆ తరువాత తుపాకీ తీసుకొని కాల్పులు జరిపారని, దీంతో పోలీసులు కాల్పులు జరపడంతో నిందితులు చనిపోయారని పేర్కొన్నారు. ఘటనపై ఇప్పటికే జాతీయ మావన హక్కలు కమిషన్ విచారణ జరిపిందని రోహత్గి గుర్తుచేశారు. తెలంగాణ ప్రభుత్వం సిట్‌తో దర్యాప్తు జరిపిస్తోందని చెప్పారు. ఈ సమయంలో మరో విచారణ కమిటీ అవసరం లేదని సూచించారు. కానీ సీజేఐ బాబ్డే.. ఈ వాదనలను అంగీకరించలేదు. నిజానిజాలు ప్రజలకు తెలియాల్సి ఉందని.. ఎన్‌కౌంటర్ జరిగిన తీరుపై అనుమానాలు తొలగించాల్సిన అవసరం ఉందని సీజేఐ వ్యాఖ్యానించారు. తాము ఏర్పాటుచేసిన  విచారణ కమిటీకి తెలంగాణ ప్రభుత్వం, పోలీసులు సహకరించాల్సిన అవసరం ఉందన్నారు. సిట్ దర్యాప్తుతో పాటు సమాంతరంగా విచారణ జరుగుతుందని తెలియజేసింది. సిట్ తన దర్యాప్తు వివరాలను విచారణ కమిటీతో పంచుకోవాలని సుప్రీం కోర్టు సూచించింది.

జగన్ హామీలకే దిక్కు లేదా? మాట తప్పం...మడం తిప్పమనేది ఉత్తుత్తి మాటలేనా?

రాజకీయ నాయకులు ఎన్నికల్లో గెలిచేందుకు ఎన్ని హామీలైనా ఇస్తారు... గెలిచాక ముఖం చాటేస్తారు... ఎన్నికల సమయంలో రాజకీయ పార్టీల ప్రకటనలను... నేతల హామీలను నమ్మి... ప్రజలు మోసం పోవడం కామన్... అదే, పరిస్థితి రాజకీయ నేతలకు ఎదురైతే... అప్పుడు తెలుస్తుంది ఆ బాధేంటో... వైసీపీలో కొందరు పరిస్థితి ఇప్పుడు అలాగే ఉంది... తొమ్మిదేళ్లుగా వైసీపీ ప్రతిపక్షంలో ఉన్నప్పుడు పార్టీ కోసం కష్టపడిన కొందరిని వివిధ హామీలిస్తూ జగన్మోహన్ రెడ్డి టికెట్ నిరాకరించారు. అధికారంలోకి వస్తే ఎమ్మెల్సీ ఇస్తానని... లేదా నామినేటెడ్ పోస్ట్ కట్టబెడతానని హామీ ఇచ్చారు. ఇక కొందరికైతే ఏకంగా మంత్రి పదవినే ఆఫర్ చేశారు. వీళ్లలో కొందరికి వ్యక్తిగతంగా చెప్పగా, మరికొందరికైతే బహిరంగంగా ప్రజలు ముందే హామీ ఇచ్చారు.  జగన్ అనుకున్నట్లే వైసీపీ అధికారంలోకి వచ్చింది. జగన్మోహన్ రెడ్డి ముఖ్యమంత్రి అయ్యారు. అప్పుడే ఆర్నెళ్లు కూడా గడిచిపోయాయి. కానీ, జగన్ నుంచి హామీలు పొందినవాళ్ల పరిస్థితే అగమ్యగోచరంగా మారింది. కనీసం వాళ్లకు అపాయింట్ మెంట్ కూడా ఇవ్వడం లేదని అంటున్నారు. ఇలాంటి బాధితుల బాధితుల జాబితా వైసీపీలో ఎక్కువగానే ఉంది. ఈ లిస్ట్ లో  గుంటూరు జిల్లా చిలకలూరిపేట నేత మర్రి రాజశేఖర్ ఒకరు. ఎన్నికలకు ముందువరకు మర్రి రాజశేఖరే చిలకలూరిపేట వైసీపీ అభ్యర్ధిగా ఉన్నారు. గత ఎన్నికల్లో ఒకసారి పోటీచేసి ఓడిపోయారు. అయితే, ఎన్నికలకు ముందు అనూహ్యంగా మర్రిని తప్పించి ఎన్నారై విడదల రజనీకి టికెట్ ఇచ్చారు. ఎన్నికల ప్రచారంలో బహిరంగంగా మర్రికి మంత్రి పదవి ఇస్తానని హామీ ఇచ్చారు. అయితే, కేబినెట్ లో చోటు దక్కలేదు. అయితే, రెండున్నరేళ్ల తర్వాత 90శాతం కేబినెట్ ను మార్చేస్తానని జగన్ చెప్పడంతో.. మరి రెండో విడతలో అవకాశమిస్తారో లేక ఆ హామీనే పక్కనబెడతారో చూడాలి.  ఇక, గుంటూరు వెస్ట్ లేళ్ల అప్పిరెడ్డిదీ ఇదే పరిస్థితి. అప్పిరెడ్డికి కూడా ఎమ్మెల్సీ లేదా నామినేటెడ్ పదవి ఇస్తామని జగన్ హామీ ఇచ్చారు. కానీ ఇప్పటివరకు కనీసం జగన్ నుంచి పిలుపే రాలేదు. అదేవిధంగా టీడీపీ అధినేత చంద్రబాబుపై కుప్పంలో పోటీచేసి ఓడిపోయిన చంద్రమౌళి పరిస్థితి మరీ దారుణంగా ఉందంటున్నారు. చంద్రబాబుపై పోటీ అంటే ఆశలు వదులుకుని బరిలోకి దిగాల్సిందే. అయితే, వైసీపీ అధిష్టానం చంద్రమౌళిని టెంప్ట్ చేసి పెద్దఎత్తున నిధులు ఖర్చు పెట్టించిందని అంటున్నారు. ఎన్టీఆరే ఓడిపోయిన సందర్భాలున్నాయని, నీవు కూడా చంద్రబాబును ఓడిస్తావంటూ భారీగా డబ్బు ఖర్చు పెట్టించారని, దాంతో చంద్రమౌళికి దాదాపు రోడ్డునపడిన పరిస్థితి వచ్చిందంటున్నారు. ఓడిపోయినాసరే, ఎమ్మెల్సీని చేసి మంత్రి పదవి ఇస్తానని చంద్రమౌళికి కూడా జగన్ హామీ ఇచ్చారట. కానీ, ఇప్పుడు జగన్ దర్శన భాగ్యం కూడా దొరకడం లేదని వాపోతున్నట్లు తెలుస్తోంది. ఇక, చంద్రబాబు తనయుడు నారా లోకేష్ పై అనూహ్య విజయం సాధించిన మంగళగిరి వైసీపీ ఎమ్మెల్యే ఆళ్ల రామకృష్ణారెడ్డిదీ ఇదే పరిస్థితి. ఆర్కేను గెలిపిస్తే మంత్రిని చేస్తానంటూ బహిరంగంగా ప్రజల ముందే జగన్ ప్రకటించారు. తీరా చూస్తే కేబినెట్లో ఆర్కేకి చోటు దక్కలేదు. ఇక, ప్రకాశం జిల్లా పర్చూరులో గొట్టపాటి భరత్ దీ కూడా ఇదే పరిస్థితి. చివరి నిమిషంలో దగ్గుబాటి వెంకటేశ్వర్రావుకి టికెట్ కేటాయిండంతో... గొట్టిపాటి భరత్ కు ఎమ్మెల్సీ ఇస్తానంటూ హామీ ఇఛ్చారు. అయితే, ఇప్పుడు జగన్ అపాయింట్ మెంట్ కూడా దొరకడం లేదని అంటున్నారు. వీళ్లందరి పరిస్థితి కక్కలేక మింగలేక అన్నట్లు ఉందంటున్నారు. తమకిచ్చిన హామీలపై జగన్ ను నిలదీయలేక... కనీసం తమకు ఎప్పుడు న్యాయం చేస్తారని అడగలేక... తమలో తామే కుమిలిపోతున్నారని చెప్పుకుంటున్నారు. అయితే, జగన్ మాటిస్తే తప్పడని, కొంచెం ఆలస్యమైనా, తమకిచ్చిన హామీని నిలబెట్టుకుంటారనే ఆశతో ఎదురుచూస్తూ గడిపేస్తున్నారు. మరి వీళ్ల టైమెప్పుడు వస్తుందో... ఎప్పుడు పదవులు దక్కుతాయో చూడాలి.   

2020 ఫిబ్రవరి నుండి ఆ ఫోన్లలో వాట్సాప్ పని చేయదు

2020 ఫిబ్రవరి నుంచి కొన్ని ఫోన్లలో వాట్సాప్ పనిచేయదు. ఆండ్రాయిడ్, ఐవోఎస్ మీద నడిచే కొన్ని స్మార్ట్ ఫోన్ లకు ఇక పై వాట్సప్ నిలిచిపోనున్నట్లు ప్రకటించింది సంస్థ. విండోస్ ఫోన్లకైతే పూర్తిగా ఈ సపోర్టు నిలిచిపోనుంది. వీటికి సంబంధించిన వివరాలు వెబ్ సైట్ లో తెలిపింది. అంతేకా కుండా ఆయా స్మార్ట్ ఫోన్లలో కొత్త వాట్సప్ ఖాతాను సృష్టించటం కానీ దాన్ని వెరిఫై చేసే అవకాశం కూడా ఉండదు. ఇంతకీ ఏ ఏ స్మార్ట్ ఫోన్లకు వాట్సాప్ నిలిచిపోతుందంటే ఐవోఎస్ 8 లేదా దానికంటే పాత ఐఓఎస్ ఆపరేటింగ్ సిస్టమ్ మీద పని చేసే ఆపిల్ ఫోన్లలో 2020 ఫిబ్రవరి 1 తర్వాత వాట్సాప్ పనిచేయదు. అప్పటి వరకూ వీరు ఈ ఆపరేటింగ్ సిస్టం పై నడిచే స్మార్ట్ ఫోన్లలో వాట్సప్ ను ఉపయోగించుకోవచ్చు.  ఆండ్రాయిడ్ ఫోన్ల విషయానికొస్తే ఆండ్రాయిడ్ 2,3,7 అంతకన్నా పాత ఆండ్రాయిడ్ ఆపరేటింగ్ సిస్టం మీద నడిచే అన్ని స్మార్ట్ ఫోన్లకు వాట్సాప్ సపోర్ట్ నిలిచిపోనుంది. ఫిబ్రవరి 1,2020 వరకు మాత్రమే ఈ ఫోన్లలో వాట్సప్ పనిచేస్తుందనీ తర్వాత పని చేయదని సంస్థ ప్రకటించింది. ఒకవేళ ఈ ఆపరేటింగ్ సిస్టమ్ ల పై మాత్రమే నడిచే స్మార్ట్ ఫోన్లలో వాట్సప్ వాడాలనుకుంటే ఒకటే దారి, ఇప్పుడు మీ స్మార్ట్ ఫోన్ లలో ఇన్ స్టాల్ అయిన వాట్సాప్ ను అప్ డేట్ చెయ్యకూడదు, అన్ ఇన్ స్టాల్ చేయకూడదు, అప్పుడు మాత్రమే మీరు ఈ ఫోన్లలో వాట్సాప్ ను వాడగలరు. ఇక విండోస్ ఆపరేటింగ్ సిస్టం పై నడిచే ఫోన్లన్నింటికీ ఈ సపోర్టు నిలిచిపోనుంది. ఐవోఎస్, ఆండ్రాయిడ్ ఫోన్లకు ఫిబ్రవరి 1,2020 నుంచి వాట్సాప్ సేవలు నిలిపివేస్తూ వుంటే విండోస్ ఫోన్లకు కాస్త ముందుగానే అంటే 2019 డిసెంబర్ 31 తరువాత వీరికి వాట్సప్ అప్ డేట్స్ రావు. జియో ఫోన్ వినియోగదారులకు ఈ అప్ డేట్స్ గురించి ఎక్కువగా ఆలోచించాల్సిన అవసరం లేదు. ఎందుకంటే ఆపరేటింగ్ సిస్టం 251 పైన నడిచే అన్ని మొబైల్స్ లోనూ వాట్సప్ పనిచేయనుంది. వీటిలో జియో ఫోన్ జియో ఫోన్ 2 కూడా ఉన్నాయి కాబట్టి ఆయా ఫోన్లలో వాట్సప్ ను ఎప్పటికప్పుడు అప్ గ్రేడ్ చేసుకోవచ్చు.

జగన్ పై మందకృష్ణ ఫైర్.. రెడ్డి కులానికి ఓ న్యాయం, వేరే కులాలకు ఓ న్యాయమా?

ఏపీ సీఎం జగన్మోహన్ రెడ్డిపై ఎమ్మార్పీఎస్ అధ్యక్షుడు మందకృష్ణ నిప్పులు చెరిగారు. పైకి ఎస్సీ ఎస్టీ బీసీ మైనారిటీ వర్గాలకు పెద్దపీట వేస్తున్నామని చెబుతున్నా... సొంత సామాజికవర్గం కోసమే పనిచేస్తున్నారని మందకృష్ణ ఆరోపించారు. ఎస్సీ ఎస్టీ బీసీ మైనారిటీలకు డమ్మీ పదవులు కట్టబెట్టి... ప్రభుత్వ యంత్రాంగాన్ని మొత్తం రెడ్డి సామాజికవర్గంతో నింపేస్తున్నారని విమర్శించారు. ఎస్సీ ఎస్సీ, బీసీ మైనారిటీలకు అన్యాయం జరిగితే పట్టించుకోని సీఎం జగన్.... తన సొంత సామాజికవర్గానికి అన్యాయం జరిగినప్పుడు మాత్రం ఆగమేఘాల మీద స్పందిస్తున్నారని విమర్శించారు. రాజ్యాంగం మీద ప్రమాణంచేసి ముఖ్యమంత్రి పదవి చేపట్టిన జగన్మోహన్ రెడ్డి... న్యాయ వ్యవస్థకు, చట్టానికి వ్యతిరేకంగా జరిగిన ఎన్ కౌంటర్ ను అసెంబ్లీ సాక్షిగా సమర్ధించమేంటని ప్రశ్నించారు. బాధితురాలు దిశ... జగన్ సామాజికవర్గం కాబట్టే నిందితుల ఎన్ కౌంటర్ ను సమర్ధించారని, అలాగే కేసీఆర్ కు హ్యాట్సాప్ చెప్పారని.... మరి హాజీపూర్ లో ముగ్గురు బీసీ బాలికలను హత్యాచారం చేసి మృతదేహాలను బావిలో పూడ్చేసిన శ్రీనివాస్ రెడ్డిని.... అలాగే జడ్చర్లలో బాలికపై అత్యాచారం చేసిన చంపేసిన నవీన్ రెడ్డిని ఎందుకు ఎన్ కౌంటర్ చేయమని కోరలేదని మందకృష్ణ నిలదీశారు. ఒక రెడ్డిని చంపిన నలుగుర్ని ఎన్ కౌంటర్ చేసినప్పుడు... నలుగురు అమ్మాయిలను చంపిన మరో రెడ్డికి అదే శిక్ష ఎందుకు వేయమని కోరడం లేదని మందకృష్ణ ప్రశ్నించారు. ఇక, వైఎస్ హయాంలో 11మంది గిరిజన మహిళలపై పోలీసులు అత్యాచారానికి పాల్పడి చంపేసినా.... ఆయేషామీరాను రేప్ అండ్ మర్డర్ చేసినా... ఇప్పటివరకూ న్యాయం జరగలేదని మందకృష్ణ గుర్తుచేశారు. తెలంగాణ సీఎం కేసీఆర్.... ఏపీ ముఖ్యమంత్రి జగన్మోహన్ రెడ్డి... ఇద్దరూ కూడా తమ తమ సొంత సామాజికవర్గాలకు అన్యాయం జరిగితే ఒకలా... ఇతర సామాజిక వర్గాలకు అన్యాయం జరిగితే మరోలా స్పందిస్తున్నారని మందకృష్ణ ఆరోపించారు. అయినా, ఆర్ధిక నేరగాళ్లపై వేగంగా న్యాయ విచారణ జరిపించి, నేరం రుజువైతే ఉరిశిక్ష విధించేవిధంగా వైసీపీ ప్రభుత్వం చట్టం చేయగలదా అంటూ మందకృష్ణ ప్రశ్నించారు. ఒకవేళ అలాంటి చట్టాన్ని కేంద్రం చేస్తే సమర్ధించే దమ్ము జగన్ కి ఉందా అంటూ మందకృష్ణ నిలదీశారు.