కళారవి

                                           పి. యస్. నాగరాజు

    'శ్రమైక జీవన సౌందర్యానికి
    సమానమైనది లేనేలేదు' (శ్రీశ్రీ)

    సిరిసిరి మువ్వ చైతన్యానికి
    అసాధ్యమున్నది ఉండబోదు
    ప్రజాకవి ! మన మహాకవి !
    కష్టజీవుల కళారవి !                                                                 || శ్రమైక ||    

    పిడికిలెత్తిన విప్లవానికి
    ఆకలిపొత్తిలి అమ్మఅని
    మంటలతో మాట్లాడించి
    రక్తంతో రాగాలెత్తి
    అక్షరాలలో ఉదయబింబాన్ని
    తూర్పుకెత్తిన ప్రజాకవి
    ప్రజాకవి ! మన మహాకవి !
    కష్టజీవుల కళారవి !                                                                  || శ్రమైక ||

    శతాబ్దాలకు తరగని వెలుగు
    ప్రజలభాషలో పొంగే తెలుగు
    అభ్యుదయం ఆశయంగా
    ఆచరణే నిప్పుల నడకగ
    కవన కుతూహల పోరుబాటలో
    మడమ తిప్పని కలం యోధుడు
    ప్రజాకవి ! మన మహాకవి !
    కష్టజీవుల కళారవి !                                                                   || శ్రమైక ||