జుట్టు రకాన్ని బట్టి ఏ నూనెలు మంచివి.. ఏ నూనెలు ఎంచుకోవాలో తెలుసా!

నేటికాలంలో జుట్టు సంబంధిత సమస్యలు వేగంగా పెరుగుతున్నాయి. కొందరు ఎక్కువ  జుట్టు రాలే సమస్యతో బాధపడుతుంటే, మరికొందరు చుండ్రు , జిడ్డుగల తల చర్మంతో ఇబ్బంది పడుతున్నారు. చాలా మంది జుట్టు బాగా పొడిబారి, చిక్కుపడిపోతుంది, చాలామందికి జుట్టునుహెల్తీగా మెయింటైన్ చేయడం చాలా కష్టమవుతుంది.  ఎక్కువ శాతం మంది హెయిర్ కేర్ కోసం మార్కెట్లో లభించే వివిధ రకాల నూనెలను ఎంచుకుంటారు.   కానీ ప్రతి నూనె ప్రతి రకమైన జుట్టుకు సరైన ఫలితాలు ఇవ్వలేదు.  హెయిర్ కేర్  నిపుణుల అభిప్రాయం ప్రకారం జుట్టు రకాన్ని బట్టి  ఏ నూనె అత్యంత ప్రభావవంతంగా పనిచేస్తుందో నిర్ణయించుకోవాలి. తప్పుడు నూనెను ఉపయోగించడం వల్ల జుట్టు సమస్యలు తగ్గడానికి బదులుగా  మరింత తీవ్రమవుతాయి. అందువల్ల, ఏ జుట్టుకు ఎలాంటి నూనెను ఎంచుకోవాలి?  వివరంగా తెలుసుకుంటే..

పొడి, చిక్కుగా, గరుకుగా ఉండే జుట్టు..

 జుట్టు పొడిగా, పెళుసుగా , సులభంగా విరిగిపోయేదిగా ఉంటే చాలామంచి నూనెలు ఎంచుకోవాలి.  నువ్వుల నూనె, బాదం నూనె,  ఆముదం నూనె చాలా బాగా పనిచేస్తాయి.  ఈ నూనెలు జుట్టుకు లోతైన పోషణను అందించడంలో సహాయపడతాయి. వీటిలో ఉండే కొవ్వు ఆమ్లాలు , విటమిన్లు తేమను నిలుపుకోవడంలో సహాయపడతాయి, దీనివల్ల జుట్టు పొడిబారడం , విరిగిపోవడం తగ్గుతుంది.

పలుచగా ఉండి,  బాగా రాలిపోయే జుట్టుకు..

 చిన్న వయసులోనే ఎక్కువగా జుట్టు రాలడం, జుట్టు పలచబడటం లేదా తెల్ల జుట్టుతో బాధపడుతుంటే, మూడు రకాల నూనెలు ఉపయోగకరంగా ఉంటాయి. కొబ్బరి నూనె,  భృంగరాజ్ నూనె, ఉసిరి నూనె బాగా సహాయపడతాయి. ఈ నూనెలు తల చర్మానికి ఉపశమనం కలిగించి, జుట్టు కుదుళ్లను బలపరుస్తాయి. క్రమం తప్పకుండా మసాజ్ చేయడం వల్ల తల చర్మానికి రక్త ప్రసరణ మెరుగుపడుతుంది.

జిడ్డు,  చుండ్రు జుట్టుకు..

జిడ్డుగల తల చర్మం ఉన్నవారు తరచుగా జిగట, దురద , చుండ్రు వంటి సమస్యలను ఎదుర్కొంటారు. ఇలాంటి వారికి ఆవ నూనె, వేప నూనె, టీ ట్రీ ఇన్ఫ్యూజ్డ్ ఆయిల్ బాగా సహాయపడతాయి.  ఈ నూనెలలో తల చర్మాన్ని శుభ్రంగా ఉంచడానికి , అధిక నూనెను నియంత్రించడానికి సహాయపడే గుణాలు ఉంటాయి.

హెయిర్ ఆయిల్ రాసేటప్పుడు గుర్తుంచుకోవలసిన విషయాలు..

జుట్టుకు అధికంగా నూనె రాయకూడదు. నెత్తిని సున్నితంగా మసాజ్ చేయాలి, అంతే తప్ప రుద్ది రుద్ది తలకు నూనె పెట్టకూడదు.  తలకు నూనె పెట్టాక నూనెను ఎక్కువ సేపు అలాగే ఉంచకూడదు. చాలా మందికి వారానికి ఒకటి నుండి రెండు సార్లు నూనె రాసుకోవడం సరిపోతుందని అనుకుంటారు. అలాగే తల చర్మం ఎలా ఉందో దాన్ని బట్టి  నూనెను ఎంచుకోవాలి.

ఆహారం కూడా ముఖ్యం..

ఆరోగ్యకరమైన, దృఢమైన జుట్టుకు కేవలం తల నూనె మాత్రమే సరిపోదు. ప్రోటీన్, ఐరన్, బయోటిన్, విటమిన్ సి , ఒమేగా-3 ఫ్యాటీ యాసిడ్లు సమృద్ధిగా ఉండే సమతుల్య ఆహారం కూడా చాలా అవసరం.  తగినంత నీరు త్రాగడం, ఒత్తిడిని తగ్గించుకోవడం కూడా జుట్టు ఆరోగ్యానికి కీలక పాత్ర పోషిస్తాయి.

                               *రూపశ్రీ.