English | Telugu
సైలెంట్ గా వైఎస్ వివేకా బయోపిక్ పూర్తి.. రాజకీయ ప్రకంపనలేనా!
Updated : Mar 20, 2024
ఆంధ్రప్రదేశ్ లో గత ఎన్నికలకు ముందు వైఎస్ వివేకానంద రెడ్డి హత్య సంచలనం సృష్టించింది. మొదట ఇది గుండెపోటుగా ప్రచారం పొందింది. ఆ తర్వాత ఆయనను గొడ్డలితో దారుణంగా హత్య చేశారనే విషయం బయటపడింది. అయితే ఈ దారుణ హత్య వెనుక అయినవాళ్లే ఉన్నారంటూ వివేకా కుమార్తె సునీత చాలారోజులుగా న్యాయ పోరాటం చేస్తున్నారు. కానీ హత్య జరిగి ఐదేళ్లు అవుతున్నా ఇంతవరకు దోషులకు శిక్ష పడలేదు. ఈ క్రమంలో వైఎస్ వివేకా బయోపిక్ తెరమీదకు రావడం సంచలనంగా మారింది.
'వివేకం' పేరుతో వైఎస్ వివేకా బయోపిక్ రూపొందింది. ఈ చిత్ర దర్శక నిర్మాతలు ఎవరనే విషయం రివీల్ కాలేదు కానీ.. 'వివేకా బయోపిక్' అనే యూట్యూబ్ ఛానల్ లో ట్రైలర్ ను విడుదల చేశారు. వైఎస్ వివేకానందరెడ్డి కేసులో సీబీఐ దాఖలు చేసిన ఛార్జిషీట్ ఆధారంగా ఈ సినిమాను రూపొందించినట్లు ట్రైలర్ కింద డిస్క్రిప్షన్ లో పేర్కొన్నారు. వివేకా హత్యకు ముందు తర్వాత జరిగిన సంఘటనలను చూపిస్తూ ట్రైలర్ ను రూపొందించారు. అంతేకాదు ఈ సినిమాను మార్చి 22న విడుదల చేయనున్నట్లు తెలిపారు. అయితే ఈ సినిమా థియేటర్లలో విడుదల కావడంలేదు. 'www.vivekabiopic.com' అనే వెబ్ సైట్ ద్వారా స్ట్రీమింగ్ చేయనున్నట్లు ప్రకటించారు. మరి ఎన్నికలకు ముందు ఈ బయోపిక్ ఎలాంటి రాజకీయ ప్రకంపనలు సృష్టిస్తుందో చూడాలి.