English | Telugu
సర్దార్... వాళ్లని కొనేశాడా?
Updated : Apr 8, 2016
ఓ సినిమా విడుదల అవుతోందంటే చాలు.. చిత్రబృందమంతా ఎలెర్ట్ అయిపోతుంది. పాజిటీవ్ రివ్యూలు ఎలా రాబట్టుకోవాలా అని స్కెచ్చులు గట్రా గీస్తుంటుంది. టాలీవుడ్ లోని వెబ్ మీడియాలో కొంతమందిని బాగానే కంట్రోల్ చేసి, త్రీ స్టార్స్, ఫోర్ స్టార్స్ సంపాదించేస్తుంటారు. అయితే... ఈమధ్య ఆ స్ట్రాటజీ మారింది. బాలీవుడ్ విమర్శకుల్ని కూడా మెప్పించి, వాళ్లను ఏదోలా ఒప్పించి.. సినిమాకి ముందు రోజే పాజిటీవ్ రివ్యూలు తెచ్చుకోవడమనే ఆనవాయితీ మొదలైంది. బాహుబలికి అదే జరిగింది. బాహుబలి రేపు రిలీజ్ అనగా.. ఈరోజు నుంచే అక్కడి విమర్శకులు సినిమా సూపర్, కేక అదిరిపోయింది అంటూ సోషల్ మీడియాలో స్టేట్మెంట్లు గుప్పించడం మొదలెట్టారు. దాంతో.. పాజిటీవ్ టాక్ బాగా పెరిగి.. ఓపెనింగ్స్ అదరిపోయాయి.
ఇప్పుడు సర్దార్ గబ్బర్ సింగ్కీ అదే స్ట్రాటజీ వాడేశారు. సినిమా రిలీజ్కి రెండ్రోజుల ముందే..అక్కడి విమర్శకులు సర్దార్ను ప్రత్యేకంగా చూపించారు. వాళ్లేమో.. ఇంతోటి సినిమా బాలీవుడ్లోనే రాలేదు, ఈ సినిమా వంద కోట్లు దాటేస్తుంది... రికార్డులు బద్దలు కొట్టేస్తుందని ట్వీట్లు చేసి హోరెత్తించారు. అవి చూసిన వాళ్లంతా నిజంగా సర్దార్లో అంత విషయం ఉండే ఉంటుంది అని భ్రమపడి ముందే అడ్వాన్స్ బుకింగ్లు చేయించుకొన్నారు.
తీరా ఇప్పుడు సినిమా చూస్తే.. సగటు పవన్ అభిమాని సైతం.. ఇదేం సినిమారా బాబూ.. అంటూ తలబాదుకొంటున్నాడు. ఇలాంటి కళాఖండాన్నా బాలీవుడ్ వాళ్లు అద్భుతం అమోఘం అంటూ పొగిడేశారు అనిపిస్తోంది. ఇదంతా చూస్తుంటే.. కావాలని, బాలీవుడ్ విమర్శకుల్ని కూడా మేనేజ్ చేయగలిగారా అన్న అనుమానాలు వ్యక్తం అవుతున్నాయి. ఏదోలా పాజిటీవ్ టాక్ తెచ్చేస్తే.. తొలి మూడు రోజులూ వసూళ్లతో గట్టెక్కేసేద్దామన్న ఉద్దేశంతో బాలీవుడ్ విమర్శకుల్ని సర్దార్ టీమ్ కొన్నా కొనేయొచ్చు... అన్న మాటలూ వినిపిస్తున్నాయి. వీటిలో నిజం ఎంతో తెలీదుగానీ... తొలిసారి అక్కడి విశ్లేషకులపై అనుమానాల మేఘాలు కమ్ముకొన్నాయి. మున్ముందూ ఇలాంటి పిచ్చి పిచ్చి పాజిటీవ్ బచ్లు ఇస్తుంటే వాళ్ల మాటల్నీ ఎవ్వరూ నమ్మరిక.