అఖిల్ అక్కినేని హీరోగా సురేందర్ రెడ్డి దర్శకత్వంలో తెరకెక్కిన సినిమా 'ఏజెంట్'. ఏకే ఎంటర్టైన్మెంట్స్ బ్యానర్ లో రూపొందిన ఈ చిత్రం ఏప్రిల్ 28న విడుదలైంది. మొదటి షో నుంచే ఫ్లాప్ టాక్ ని సొంతం చేసుకున్న ఈ మూవీ.. రెండో రోజుకే పూర్తిగా చేతులెత్తేసింది. దాదాపు రూ.37 కోట్ల థియేట్రికల్ బిజినెస్ చేసిన ఈ చిత్రం ఏకంగా రూ.30 కోట్ల నష్టాలను మిగిల్చే అవకాశముంది. టాలీవుడ్ చరిత్రలో అత్యధిక నష్టాలను మిగిల్చిన సినిమాల్లో ఒకటిగా నిలవనుంది. ఈ క్రమంలో ఈ సినిమా పరాజయం పట్ల నిర్మాత అనిల్ సుంకర ట్విట్టర్ వేదికగా ఆసక్తికర వ్యాఖ్యలు చేశారు.

ఏజెంట్ ఫలితంపై పూర్తి బాధ్యత తమదేనని అనిల్ సుంకర అన్నారు. ఇది పెద్ద టాస్క్ అని తెలిసి కూడా, గెలుస్తామనే ఆలోచనతో ముందడుగు వేశామని తెలిపారు. బౌండ్ స్క్రిప్ట్ లేకుండా ప్రాజెక్ట్‌ను ప్రారంభించడం తాము చేసిన పెద్ద తప్పని, దాంతో పాటు కోవిడ్ సహా పలు సమస్యలు చుట్టుముట్టాయని చెప్పారు. ఈ ఖరీదైన తప్పు నుంచి పాఠాలు నేర్చుకున్నామని, భవిష్యత్తులో ఇలాంటి తప్పులు పునరావృతం కాకుండా చూసుకుంటామని అన్నారు. మాపై నమ్మకం ఉంచిన వారందరికీ మా హృదయపూర్వక క్షమాపణలు. సరైన ప్రణాళికతో, బాగా కష్టపడి భవిష్యత్తులో మంచి ప్రాజెక్ట్ లు అందిస్తామని అనిల్ సుంకర చెప్పుకొచ్చారు.

ఏకే ఎంటర్టైన్మెంట్స్ బ్యానర్ లో మెగాస్టార్ చిరంజీవి హీరోగా 'భోళా శంకర్' చిత్ర రూపొందుతోంది. ఈ సినిమా ఆగస్టు 11 న ప్రేక్షకుల ముందుకు రానుంది. మరి ఏజెంట్ మిగిల్చిన చేదు జ్ఞాపకాల నుంచి భోళా శంకర్ బయట పడేస్తాడేమో చూడాలి.