ప్రకాష్ రాజ్ కు మళ్ళీ జాతీయ అవార్డ్ లభించింది. వివరాల్లోకి వెళితే విలక్షణ బహుభాషా నటుడు ప్రకాష్ రాజ్ ఎంతటి ప్రతిభ కలిగిన నటుడో మనందరికీ తెలిసిందే. "పుట్టక్కన హైవే" అనే కన్నడ సినిమాకు ఉత్తమ చిత్రంగా నిర్మాత ప్రకాష్ రాజ్ కు జాతీయ ఉత్తమ నిర్మాత అవార్డు లభించింది. ఈ చిత్రాన్ని నటుడు ప్రకాష్ రాజే నిర్మించారు. ఈ జాతీయ అవార్డుని తన గురువు కె.బాలచందర్ "దాదాసాహెబ్ ఫాల్కే" అవార్డు అందుకోబోయే వేదిక నుంచే ప్రకాష్ రాజ్ కూడా అందుకోవటం విశేషం. గతంలో 2009వ సంవత్సరానికి గాను "కాంజీవరం" అనే సినిమాలో నటించినందుకు, ఇంకా 1998 వ సంవత్సరంలో మణిరత్నం దర్శకత్వంలో వచ్చిన "ఇరువర్" అనే సినిమాలో అత్యుత్తమ నటనను ప్రదర్శించినందుకు గాను ప్రకాష్ రాజ్ కు జాతీయ ఉత్తమ నటుడి అవార్డులు లభించాయి.

ప్రకాష్ రాజ్ వంటి అద్భుతమైన నటుడికి ఇలాంటి అవార్డులు గీటురాయి కాకపోయినా జాతీయ స్థాయిలో అవార్డు రావటం ప్రకాష్ రాజ్ లోని నటుడి దాహార్తిని, అలాగే మంచి అభిరుచి ఉన్ననిర్మాత తపనని కొంతవరకూ సేదతీరుస్తుంది.ప్రతిసారీ ఉత్తమ నటుడిగా జాతీయ అవార్డునందుకునే ప్రకాష్ రాజ్ ఈసారి ఉత్తమ నిర్మాతగా జాతీయ అవార్డునందుకోబోతున్నారు. నటుడిగానైనా, నిర్మాతగానైనా  ప్రకాష్ రాజ్ ఉత్తముడేగా. ఈ సందర్భంగా తెలుగువన్ ప్రకాష్ రాజ్ కు శుభాభినందనలు తెలియజేస్తోంది.