సంజయ్ లీలా భన్సాలీ దర్శకత్వంలో దీపికా పదుకొనే, షాహిద్ కపూర్, రణ్‌వీర్ సింగ్ నటించిన పద్మావతి సినిమా వివాదాస్పదమైన విషయం తెలిసిందే. చరిత్రను వక్రీకరించి ఈ సినిమా తీశారని.. ఎట్టి పరిస్థితుల్లోనూ అడ్డుకొని తీరుతామని రాజ్‌పుత్ కర్ణీసేనతో పాటు పలు హిందూ సంఘాలు కారాలు మిరియాలు నూరుతున్నాయి. షూటింగ్ సమయంలో ఎన్నోసార్లు వారు అడ్డుతగిలారు.. డైరెక్టర్ భన్సాలీపై దాడికి కూడా దిగారు.

దీంతో సినిమా విడుదల అవుతుందా లేదా అన్న సందేహాలు వ్యక్తమవుతున్నాయి. ఈ పరిస్థితుల్లో హాలీవుడ్ పద్మావతికి మద్ధతు తెలిపింది. ఈ సినిమా విషయంలో జరుగుతున్న ఆందోళనల గురించి తెలుసుకున్న నటి రూబీ ట్విట్టర్ ద్వారా స్పందించింది. నా ప్రియమైన స్నేహితురాలు నటించిన సినిమా వివాదాస్పదం కావడం నన్ను షాక్‌కు గురిచేసింది.. కానీ దీపిక దీనిని ధైర్యంగా ఎదుర్కోగలుగుతుంది. నాకు తెలిసిన ధైర్యవంతుల్లో దీపిక ఒకరు అని ట్వీట్ చేశారు. దీపిక నటించిన తొలి హాలీవుడ్ చిత్రం ట్రిపులెక్స్: ది రిటర్న్ ఆఫ్ జాండర్ కేజ్ చిత్రంలో దీపికకు స్నేహితురాలి పాత్రలో నటించింది. ఈ సినిమా షూటింగ్ టైంలో వీరిద్దరూ మంచి ఫ్రెండ్స్ అయ్యారు.