ఊపిరి సినిమా మొదలయ్యిన దగ్గర నుంచి సగటు ప్రేక్షకుడు ఎప్పుడెప్పుడు నాగార్జున కి కార్తీకి మధ్య గొడవ జరుగుతుందా అని ఎదురు చూశాడంటే అందులో అతని తప్పు ఏమన్నా ఉందా చెప్పండి. అలాగే నాగార్జున యాక్సిడెంట్ వెనక ఏదో ఫ్లాష్ బ్యాక్ వుండి వుంటుంది అనుకోవటం లో గాని, కార్తీ ఆ విలన్లని మట్టుపెడతాడని ఎదురు చూడటం లో కాని తప్పు ఏమన్నా ఉందా? చివరిలో క్లైమాక్స్ ఓ పెద్ద ట్విస్ట్ తో ఉంటుందని ఆశగా స్క్రీన్ వైపు చూడటం లో కూడా తప్పేమీ లేదు కదా .

ఎందుకంటే ఇవన్నీ లేనిదే ఒక తెలుగు సినిమాని ఊహించలేం. అది ఎలాంటి సినిమా అయినా కూడా అందులో ప్రేక్షకుడికి ఊహించని ట్విస్ట్ లు ఉంటేనే అది నిలబడుతుంది అని మన సినీ జనాల నమ్మకం. ఆ నమ్మకం తోనే ఫీల్ గుడ్ మూవీ అని చెబుతూ అందులో ఐదు ఫైట్ లు, నాలుగు ట్విస్ట్ లు, ముగ్గురు విలన్లని పెట్టి మన మీదకి వదులుతారు. ఓహో..ఫీల్ గుడ్ అంటే ఇదేనా అనుకుంటూ మనం సర్దుకు పోయి సినిమా చూసేస్తాం.

అలా మన నమ్మకాల్ని ఒక షేప్ లో ఫిక్స్ చేసారు మనోళ్లు. దానితో ఊపిరి చూసిన సగటు ప్రేక్షకుడు అదేంటి.. ఇదేం సినిమా? ఇద్దరు హీరోలు వున్నా ఒక్క ఫైటూ లేదేంటి? ఒక్క విలనూ లేడేంటి? కనీసం ఇద్దరు హీరోల మధ్యా ఒక్క అభిప్రాయ బేధం కూడా లేదేంటి అని వాపోతాడు. ఏమయ్యిందబ్బా మన తెలుగు ఇండస్ట్రీ కి అని దీర్గాలోచనలో పడతాడు.