టాలీవుడ్‌లో ఇప్పుడు రీరిలీజ్‌ల హడావిడి పెరిగిపోయింది. గ్యాప్‌ లేకుండా ఎప్పుడూ ఏదో ఒక సినిమా రీ రిలీజ్‌ అవుతూనే ఉంది. ఒకప్పుడు బ్లాక్‌బస్టర్స్‌గా నిలిచిన సినిమాలు ఇప్పుడు రిలీజ్‌ అయి మళ్ళీ కలెక్షన్ల వర్షం కురిపిస్తున్నాయి. దాంతో పాత సినిమాలను మళ్ళీ బయటికి తీసి థియేటర్స్‌లో రిలీజ్‌ చేసేందుకు కొందరు నిర్మాతలు ఆసక్తి చూపిస్తున్నారు. ఇటీవలికాలంలో రీ రిలీజ్‌ అయిన సినిమాలన్నీ తెలుగులో రూపొందినవే. కానీ, దానికి భిన్నంగా ఇప్పుడు ఓ డబ్బింగ్‌ సినిమాను రీ రిలీజ్‌ చేసేందుకు సన్నాహాలు చేశారు. సెప్టెంబర్‌ 14న ఈ సినిమాను విడుదల చేస్తున్నారు. ఇప్పటికే అడ్వాన్స్‌ బుకింగ్స్‌ కూడా స్టార్ట్‌ అయ్యాయి. 

ఇంతకీ ఆ సినిమా ఏదంటే.. ధనుష్‌, శృతిహాసన్‌ జంటగా ఐశ్వర్యా రజినీకాంత్‌ దర్శకత్వంలో తమిళ్‌లో రూపొందిన ‘3’ మూవీ. ఈ సినిమా తమిళ్‌లో చాలా సూపర్‌హిట్‌ అయి రూ.45 కోట్లు కలెక్ట్‌ చేసింది. అప్పటికి ఇది భారీ కలెక్షన్‌ అనే చెప్పాలి. కానీ, తెలుగులో మాత్రం డిజాస్టర్‌గా నిలిచింది. అయితే ఈ సినిమాలో ధనుష్‌ పాడిన ‘వై దిస్‌ కొలవరి’ సాంగ్‌ ప్రపంచవ్యాప్తంగా ఎంతో పాపులర్‌ అయింది. అనిరుధ్‌ రవిచందర్‌ సంగీత దర్శకత్వంలో రూపొందిన ఈ పాటకు యూ ట్యూబ్‌లో ఇప్పటికి 470 మిలియన్‌ వ్యూస్‌ రావడం విశేషం. 

తెలుగులో ఫ్లాప్‌ అయిన ఈ సినిమాని ఇప్పుడు రీ రిలీజ్‌ చెయ్యడం వెనుక ఉన్నది ‘వై దిస్‌ కొలవెరి’ సాంగ్‌ అనేది స్పష్టంగా తెలుస్తోంది. ఎందుకంటే ఈ పాట సంవత్సరం పాటు దేశాన్ని ఉర్రూతలూగించింది. ఆ పాట కోసమైనా జనం థియేటర్లకు వస్తారన్న నమ్మకంతోనే రీ రిలీజ్‌ చేస్తున్నారని అర్థమవుతోంది. ధనుష్‌కి తెలుగులో ఉన్న మార్కెట్‌ తక్కువనే చెప్పాలి. తమిళ్‌లో అతను నటించిన సినిమాలు పెద్ద హిట్‌ అయినా తెలుగులో మాత్రం ఏవరేజ్‌ మూవీస్‌గా నిలిచాయి. ఈ సినిమాను తెలుగు రాష్ట్రాల్లోని ముఖ్యమైన పట్టణాల్లో మాత్రమే రిలీజ్‌ చేస్తున్నారు. హైదరాబాద్‌, తిరుపతి, భీమవరం వంటి ప్రాంతాల్లో  అడ్వాన్స్‌ బుకింగ్స్‌ చెప్పుకోదగ్గ స్థాయిలోనే ఉన్నట్టు తెలుస్తోంది. ‘3’ చిత్రం రీ రిలీజ్‌లో మంచి కలెక్షన్స్‌ రాబడితే.. ఇక మరిన్ని డబ్బింగ్‌ సినిమాలు రీ రిలీజ్‌ అయ్యే అవకాశం కనిపిస్తోంది.