భానుశ్రీ మెహ్రా.. ఈ పేరెక్కడో విన్నట్లుంది కదూ.. యస్.. అల్లు అర్జున్ హీరోగా గుణశేఖర్ రూపొందించిన 'వరుడు' సినిమా హీరోయిన్. అది హీరోయిన్‌గా ఆమె తొలి చిత్రం. అంటే ఆమె తొలి హీరో బన్నీ! అలాంటిది ఈరోజు బన్నీ కారణంగా ఆమె బాధపడింది. ట్విట్టర్లో తనను ఫాలో అవుతున్న భానుశ్రీని బన్నీ బ్లాక్ చేశాడు. దీనితో షాక్‌కు గురైన భానుశ్రీ.. బన్నీ తనను బ్లాక్ చేసిన పిక్చర్‌ను తన ట్విట్టర్ హ్యాండిల్ ద్వారా షేర్ చేసింది.

"మీకు ఎప్పుడైనా ఒక గాడిలో కూరుకుపోయారని అనిపించిందా? నేను అల్లు అర్జున్‌తో 'వరుడు'లో నటించాననీ, ఇప్పటికీ అవకాశాలు అందుకోలేకపోతున్నాననీ గుర్తుంచుకోండి. కానీ నేను నా స్ట్రగుల్స్‌లో సరదాగా ఉండటం నేర్చుకున్నాను- ప్రత్యేకించి ఇప్పుడు అల్లు అర్జున్ నన్ను ట్విట్టర్‌లో బ్లాక్ చేశాక." అని రాసుకొచ్చింది.

'వరుడు' సినిమా డిజాస్టర్ కావడంతో భానుశ్రీకి అవకాశాలు లేకుండా పోయాయి. నిజానికి ఆ మూవీలో ఆమెను చాలా అందంగా చూపించాడు దర్శకుడు గుణశేఖర్. అయితే ఆ సినిమా చేసే కాలంలోనే ఆమెకు వేరే చిత్రాల్లో అవకాశాలు వచ్చినా, గుణశేఖర్ సూచనతో ఆమె వాటిని ఒప్పుకోకుండా ఉండిపోయింది. వరుడు పెద్ద విజయం సాధించి, తనకు క్రేజ్ తీసుకు వస్తుందని ఆమె ఆశిస్తే, ఆ సినిమా విడుదలయ్యాక అందుకు పూర్తి విరుద్ధమైన ఫలితం వచ్చింది. ఆ తర్వాత కొన్ని చిన్న సినిమాల్లో నటించింది కానీ, అవేవీ ఆమె కెరీర్‌కు ఏమాత్రం బూస్ట్ ఇవ్వలేకపోయాయి. కొన్ని సినిమాలైతే విడుదలకే నోచుకోలేదు.

అలాంటి కెరీర్ పరంగా సంక్లిష్ట స్థితిని ఎదుర్కొంటూ కాలం నెట్టుకొస్తోన్న ఆమె, ఇప్పుడు తన తొలి హీరో ట్విట్టర్‌లో తన బ్లాక్ చేయడంతో ఖిన్నురాలైంది. ఆ బాధను బయటి ప్రపంచానికి చెప్పుకోలేకుండా ఉండలేకపోయింది. అయితే భానుశ్రీని బన్నీ ఎందుకు బ్లాక్ చేశాడనేది ప్రశ్నగా మిగిలింది.