English | Telugu
సిమ్రాన్ సెకండ్ ఇన్నింగ్స్ !!
Updated : Jun 14, 2013
ఓ దశాబ్ధంపాటు తెలుగు, తమిళ వెండితెరలపై వేడి పుట్టించి.. ప్రస్తుతం బుల్లితెర ప్రేక్షకులకు కాలక్షేపం అందిస్తున్న సిమ్రాన్.. త్వరలోనే సినిమాలో సెకండ్ ఇన్నింగ్స్కు శ్రీకారం చుట్టేందుకు సన్నాహాలు చేస్తుంది. తెలుగులో "సమరసింహారెడ్డి", "నరసింహనాయుడు", నువ్వు వస్తావని", "కలిసుందాం రా" వంటి బ్లాక్బస్టర్ హిట్స్ కలిగిన సిమ్రాన్కు.. తమిళంలోనూ అంతే స్థాయిలో హిట్స్ ఉన్నాయి.
కమల్హాసన్తో కొన్నాళ్లు "సహజీవనం" చేసిన సిమ్రాన్.. ఆ తర్వాత ఓ వ్యాపారవేత్తను పెళ్లి చేసుకుని.. సినిమాలకు "కామా" పెట్టింది. ఆ మధ్య ఒకటీ, అర చిత్రాల్లో నటించినప్పటికీ, అవి సిమ్రాన్ రేంజ్కి తగినవి కాకపోవడంతో ఆమె అభిమానులకు రుచించలేదు. ప్రస్తుతానికి తెలుగు, తమిళ భాషల్లోని కొన్ని రియాలిటీ షోలకు న్యాయనిర్ణేతగా వ్యవహరిస్తున్న సిమ్రాన్.. అతి త్వరలో ఓ లేడి ఓరియంటెడ్ చిత్రం ద్వారా సినిమాల్లోకి రీ-ఎంట్రీ ఇచ్చేందుకు తహతహలాడుతోంది. ఈ మేరకు ఇప్పటికే పరిశ్రమ వర్గాలకు సంకేతాలు పంపిన సిమ్రాన్.. తన రూప లావణ్యాలకు సైతం మునుపటి వైభవం అద్దేందుకు అవసరమైన చర్యలు (వ్యాయామాలు, యోగా వంటివి) చేపట్టిందని తెలుస్తోంది. మరి సిమ్రాన్ ఫ్యాన్స్కు ఇంతకు మించి ఏం కావాలి చెప్పండి!