నటసింహం నందమూరి బాలకృష్ణ (Nandamuri Balakrishna) తన 109వ సినిమాని బాబీ కొల్లి దర్శకత్వంలో చేస్తున్న సంగతి తెలిసిందే. ఇందులో బాలయ్య పవర్ ఫుల్ మాఫీయా డాన్ రోల్ లో కనిపించనున్నాడని తెలుస్తోంది. అందుకు తగ్గట్టుగానే ఇప్పటిదాకా విడుదలైన ప్రచార చిత్రాల్లో ఆయన లుక్ ఎంతో పవర్ ఫుల్ గా ఉంది. అలాంటిది తాజాగా బాలకృష్ణ పంచె కట్టులో సాంప్రదాయంగా, పద్ధతిగా దర్శనమివ్వడం ఆసక్తికరంగా మారింది.

సెప్టెంబర్ 20న 'పైలం పిలగా' అనే సినిమా విడుదల కానుంది. తాజాగా ఈ చిత్రం బృందం సెట్స్ లో బాలకృష్ణను కలిసి ఆయన నుంచి బెస్ట్ విషెస్ అందుకుంది. ఈ సందర్భంగా విడుదల చేసిన ఫొటోలలో బాలయ్య లుక్ ప్రత్యేక ఆకర్షణగా నిలిచింది. పంచె కట్టుతో.. ఒక చేతికి వాచ్, మరో చేతికి కడియం ధరించి.. ఎంతో అందంగా, హుందాగా బాలకృష్ణ కనిపిస్తున్నారు. 'NBK 109' నుంచి ఇప్పటిదాకా విడుదలైన ప్రచార చిత్రాల్లో మాస్ గా కనిపించిన ఆయన.. ఇప్పుడు పంచె కట్టుతో క్లాస్ కనిపించి సర్ ప్రైజ్ చేస్తున్నారు. చూస్తుంటే దర్శకుడు బాబీ 'NBK 109' సినిమాతో బిగ్ ట్రీట్ ఇవ్వబోతున్నాడని అనిపిస్తోంది.