టాలీవుడ్‌ మోస్ట్‌ ఎవైటెడ్‌ మూవీస్‌ లిస్ట్‌లో మంచు విష్ణు ‘కన్నప్ప’ కూడా ఉంది. ఈ చిత్రానికి సంబంధించిన వర్క్‌ శరవేగంగా జరుగుతోంది. ఈ చిత్రాన్ని డిసెంబర్‌లో విడుదల చెయ్యాలనుకున్నారు. అయితే ఈ సినిమాకి సంబంధించిన స్టిల్స్‌ లీక్‌ అవ్వడంతో టీమ్‌ షాక్‌ అయింది. దీనికి సంబంధించి ఒక అధికారిక ప్రకటనను విడుదల చేసింది. ఈ ప్రాజెక్ట్‌ కోసం 8 ఏళ్ళు తమ టీమ్‌ ఎంతో కష్టపడుతోందని, అందరూ ప్రాణం పెట్టి ఈ సినిమాకు పనిచేస్తున్నారని ఆ ప్రకటనలో పేర్కొంది. గత రెండేళ్ళుగా సినిమాను పూర్తి చేసేందుకు అవిశ్రాంతంగా కృషి చేస్తున్నామని తెలిపింది. తాజాగా లీక్‌ అయిన ఫోటో వల్ల తమ కష్టం మాత్రమే కాకుండా 2,000 మందికి పైగా విఎఫ్‌ఎక్స్‌ కళాకారుల జీవితాలు కూడా సంక్షోభంలో పడే ప్రమాదం ఉన్నట్లు వివరించింది. 

సినిమాకి సంబంధించి ఎంతో గోప్యంగా ఉండాల్సిన ఇలాంటివి అనధికారికంగా బయటకు రావడం పట్ల టీమ్‌ తమ ఆవేదనను వ్యక్తం చేసింది. ఇది ఎలా జరిగింది అనే విషయాన్ని తెలుసుకునే ప్రయత్నం చేస్తున్నామని, దీనికి కారణమైన వ్యక్తులను పట్టుకునేందుకు పోలీస్‌ కేసు పెట్టనున్నట్టు టీమ్‌ తెలిపింది. ఈ లీక్‌ వెనుక ఉన్న వ్యక్తులను కనుగొన్న వారికి రూ. 5 లక్షల బహుమానాన్ని ఇస్తామని కన్నప్ప టీమ్‌ ప్రకటించింది. ఆ వివరాలు తెలిస్తే 24 ఫ్రేమ్స్‌ ఫ్యాక్టరీ ట్విట్టర్‌ అకౌంట్‌ ద్వారా తెలపాలని కోరింది. దీని గురించి ఎలాంటి సమాచారం తెలిసినా ట్విట్టర్‌ ద్వారా తెలియజేయాలని అభిమానులకు విజ్ఞప్తి చేసింది యూనిట్‌.