1998లో అమితాబ్‌ బచ్చన్‌, గోవింద హీరోలుగా డేవిడ్‌ ధావన్‌ డైరెక్షన్‌లో వచ్చిన ‘బడే మియా చోటే మియా’ సినిమా మంచి కామెడీ ఎంటర్‌టైనర్‌గా ఘనవిజయం సాధించింది. అప్పట్లో కామెడీ సినిమాలకు కేరాఫ్‌ అడ్రస్‌గా ఉన్న డేవిడ్‌ ధావన్‌ ఆ చిత్రంతో ఆడియన్స్‌ని నవ్వుల్లో ముంచెత్తారు. ఈ సినిమాలో రమ్యకృష్ణ, రవీనా టాండన్‌ హీరోయిన్లుగా నటించడం విశేషం. తెలుగులో వీరిద్దరూ హీరోయిన్లుగా నటించిన సినిమా ‘బంగారు బుల్లోడు’. ఇదే కాంబినేషన్‌ని హిందీలో రిపీట్‌ చేశారు. ఈ చిత్రాన్ని వశు భగ్నాని నిర్మించారు. ఇప్పుడు అదే టైటిల్‌తో పూర్తిగా రివర్స్‌ జోనర్‌లో మరో సినిమాని నిర్మించారు. ఈ చిత్రానికి సుల్తాన్‌, టైగర్‌ జిందా హై లాంటి బ్లాక్‌ బస్టర్స్‌ ఇచ్చిన అలీ అబ్బాస్‌ జాఫర్‌ దర్శకుడు. వశు భగ్నాని మరో ఇద్దరు నిర్మాతలతో కలిసి ఈ చిత్రాన్ని నిర్మించారు. 

అక్షయ్‌కుమార్‌, టైగర్‌ ష్రాఫ్‌ ‘బడే మియా ఛోటే మియా’ కొత్త వెర్షన్‌లో హీరోలుగా నటించారు. ఈ చిత్రానికి సంబంధించిన టీజర్‌ను విడుదల చేసింది చిత్ర యూనిట్‌.  ఇందులో అక్షయ్‌, టైగర్‌ ఇద్దరు సైనికుల పాత్రల్లో కనిపిస్తున్నారు. భారతదేశాన్ని నాశనం చేయడమే లక్ష్యంగా ఉన్న ఓ తీవ్రవాది విధ్వంసాన్ని బడే మియా చోటే మియా ఎలా అడ్డుకున్నారనేదే కథ. పాత సినిమాకి ఇది సీక్వెల్‌ కాకపోయినా ఆ టైటిల్‌తో వస్తున్న సినిమా కాబట్టి ఆడియన్స్‌లో క్యూరియాసిటీ అనేది క్రియేట్‌ అయింది. ఈ సినిమాలో సోనాక్షి సిన్హా, మానుషీ చిల్లర్‌ హీరోయిన్లుగా నటించారు. రంజాన్‌ కానుకగా ఏప్రిల్‌లో ఈ చిత్రాన్ని విడుదల చేయబోతున్నారు. గత కొంతకాలంగా హిట్స్‌లేక సతమతమవుతున్న అక్షయ్‌కుమార్‌కి ఈ సినిమా సూపర్‌హిట్‌ ఇస్తుందని ఆశిస్తున్నారు అభిమానులు.