Home  
Analytical

ఒక పరాజయం 100 తప్పులు.. కోడికత్తి టీడీపీకే దిగిందా?

  ఒకప్పుడు రాజకీయాల్లో ప్రత్యర్థుల మీద రాజకీయపరమైన విమర్శలు మాత్రమే ఉండేవి. కానీ ఇప్పుడు అలా కాదు. నాయకులు ఒక్కరిపై ఒకరు వ్యక్తిగత విమర్శలు చేసుకుంటున్నారు. దీనికి టీడీపీ కూడా మినహాయింపు కాదు. ఓ రకంగా టీడీపీ ఘోర పరాజయానికి ఈ వ్యక్తిగత విమర్శలు కూడా కారణమని చెప్పవచ్చు. టీడీపీ అధికారంలో ఉన్న సమయంలో అప్పుడు ప్రతిపక్ష నేతగా ఉన్న వైఎస్ జగన్ మీద పదేపదే వ్యక్తిగతంగా విమర్శలు చేస్తుండేది. అదే టీడీపీ కొంపముంచింది. జగన్ అప్పటికే అవినీతి ఆరోపణల కేసుల కేసులో ఏడాదికి పైగా జైలులో ఉన్నారు. జగన్ ని అప్పటి కేంద్ర ప్రభుత్వం అన్యాయంగా జైలుకి పంపిందని అప్పటికే వైసీపీ శ్రేణుల్లో అభిప్రాయం ఉంది. దానికి తోడు.. తరువాత ఆయన అధికారంలోకి వచ్చేవరకు యాత్రల పేరుతో ప్రజల్లోనే ఉన్నారు. ఇలాంటి సమయంలో ఆయన్ను 'ఏ1' అంటూ పదేపదే టీడీపీ వ్యక్తిగతంగా టార్గెట్ చేసి విమర్శలు చేయడంతో.. ప్రజల్లో జగన్ మీద తెలీకుండానే సానుభూతి ఏర్పడింది. అదేవిధంగా విశాఖ ఎయిర్ పోర్ట్ లో జగన్ పై జరిగిన కోడి కత్తి దాడి విషయంలో కూడా టీడీపీ నోరు పారేసుకుంది. బాబూ రాజేంద్ర ప్రసాద్ వంటి నేతలైతే.. జగన్ మీద ఆయన తల్లో, చెల్లెలో దాడి చేసి ఉంటారంటూ వివాదాస్పద వ్యాఖ్యలు చేసారు. అంతేకాదు మిగతా టీడీపీ నేతలు కూడా 'కోడి కత్తి.. కోడి కత్తి' అంటూ జోకులేసారు. అక్కడ దేనితో దాడి జరిగిందనేది కాదు.. ఎవరి మీద దాడి జరిగిందనేది ముఖ్యం. ఓ ప్రతిపక్ష నేత దాడి మీద జరిగితే.. అధికార పార్టీ నేతలు మాట్లాడాల్సిన మాటలేనా అవి?. అలా కోడి కత్తి అంటూ నోరు పారేసుకుని, జగన్ మీద సానుభూతి పెంచారు. తమ పార్టీ మీద వ్యతిరేకత పెంచుకున్నారు. ఓ రకంగా గత ఐదేళ్లల్లో టీడీపీ తమ ప్రభుత్వం చేస్తున్న, చేయబోతున్న అభివృద్ధి గురించి చెప్పడం కంటే.. జగన్ మీద విమర్శలు చేయడానికే ఎక్కువ సమయం వెచ్చించింది. ఇప్పుడు ఫలితం అనుభవిస్తుంది.

హోదాని అటక ఎక్కించారు.. కనీసం ఇప్పుడైనా పోరాడతారా జగన్?

  2019-2020 ఆర్ధిక సంవత్సరానికి గాను కేంద్ర బడ్జెట్‌ను కేంద్ర ఆర్ధిక శాఖ మంత్రి నిర్మలా సీతారామన్ శుక్రవారం లోక్‌సభలో ప్రవేశపెట్టారు. ఎప్పటిలాగానే బడ్జెట్‌లో తెలుగు రాష్ట్రాలకు నిరాశే ఎదురైంది. ముఖ్యంగా ఏపీకి అన్యాయం జరిగిందని పలువురు అభిప్రాయపడుతున్నారు. వైసీపీ ఎంపీ విజయ సాయి రెడ్డి కూడా బడ్జెట్ పై అసంతృప్తి వ్యక్తం చేసారు. ఏపీకి కేంద్రం మొండిచేయి చూపించిందని విమర్శించారు. అయితే ఇప్పుడు కేంద్ర బడ్జెట్ పై ఏపీ సీఎం జగన్ ఎలా స్పందిస్తారోనన్న ఆసక్తి అందరిలో నెలకొంది. ఎన్నికలకు ముందు.. తమ పార్టీని గెలిపిస్తే ఏపీకి న్యాయం జరిగేలా చూస్తామని జగన్ చెప్పారు. కానీ ఇప్పుడు ఆ పరిస్థితులు కనిపించట్లేదు. ఇప్పటికే ప్రత్యేకహోదా విషయంలో.. బీజేపీకి పూర్తీ మెజారిటీ ఉందని, కాబట్టి బ్రతిమాలడం తప్ప చేసేదేమి లేదని జగన్ చేతులెత్తేశారు. మరోవైపు బీజేపీ నేతలేమో హోదా ముగిసిన అధ్యాయమని కుండబద్దలు కొట్టేసారు. మొత్తానికి అందరూ కలిసి హోదా విషయం అటక ఎక్కించారు. హోదా విషయంలో మొండిచేయి చూపిన కేంద్రం.. బడ్జెట్ లో కూడా ఏపీకి అన్యాయం చేసింది. ఏదో విజయ సాయి మీడియా ముందుకొచ్చి అన్యాయం జరిగిందని చెప్పారు సరే. మరి సీఎం జగన్ ఏం చేయబోతున్నారు?. గతంలో కేంద్ర బడ్జెట్ లో ఏపీకి అన్యాయం జరిగితే, అప్పుడు రాష్ట్రంలో అధికారంలో ఉన్న టీడీపీ మీద వైసీపీ తీవ్ర విమర్శలు చేసింది. టీడీపీ కేంద్రం మీద ఒత్తిడి తెచ్చి రాష్ట్రానికి ఏం తీసుకురాలేకపోతుందని వైసీపీ పదే పదే విమర్శలు చేసింది. కట్ చేస్తే.. ఇప్పుడు రోజులు మారాయి. ఏపీలో వైసీపీ అధికారంలోకి వచ్చింది. మళ్ళీ కేంద్ర బడ్జెట్ లో ఏపీకి అన్యాయం జరిగింది. మరి ఇప్పుడు జగన్ ఏం చేయబోతున్నారు?. కేంద్రం మెడలు వంచి ఏపీకి న్యాయం జరిగేలా చూస్తారా?. లేక హోదా విషయంలో వెనక్కి తగ్గినట్టే తగ్గి విమర్శలు పాలవుతారా?. ఏపీ ప్రజలు జగన్ ని నమ్మి వైసీపీకి 151 ఎమ్మెల్యే సీట్లు, 22 ఎంపీ సీట్లు కట్టబెట్టారు. 22 ఎంపీ సీట్లు అంటే మాములు విషయం కాదు. ప్రాంతీయ పార్టీలలో ఎంపీల సంఖ్యా పరంగా వైసీపీనే ముందు వరుసలో ఉంది. మరి జగన్ ఎలాంటి నిర్ణయం తీసుకోబోతున్నారు?. పార్లమెంట్ సాక్షిగా వైసీపీ ఎంపీలతో ఏపీకి న్యాయం జరిగేదాకా పోరాటం చేయిస్తారా? లేక బీజేపీని ఢీ కొట్టడం రిస్క్ ఎందుకని సైలెంట్ గా ఉంటారో కాలమే నిర్ణయిస్తుంది.

చేతులు కాలాకయినా ఆకులు పట్టుకున్నారు....థాంక్స్ లోకేష్ గారూ !

  టీడీపీ కార్యకర్తలు, మద్దతుదారులకు పార్టీ ఎప్పుడూ అండగా ఉంటుందని టీడీపీ నేత, ఎమ్మెల్సీ నారా లోకేష్ తెలిపారు. వైసీపీ నేతలు బెదిరించినా, దాడిచేసినా, సోషల్ మీడియాలో పోస్టులు పెట్టారంటూ కేసులు పెట్టి వేధించినా టీడీపీ ప్రత్యేక విభాగం నంబర్ 7306299999కు సమాచారం అందించాలని సూచించారు. ఎల్లవేళలా పార్టీకి అండగా ఉన్న కార్యకర్తలు, అభిమానులను రక్షించుకోవడం తమ బాధ్యత అని వ్యాఖ్యానించారు. అలాగే టీడీపీ కార్యకర్తలు, మద్దతుదారులను ఆదుకునేందుకు ప్రతీ జిల్లాకు లీగల్ సెల్ ఏర్పాటు చేశామని లోకేశ్ పేర్కొన్నారు.  టీడీపీ కార్యకర్తలు, మద్దతుదారులు తమపై ఎదురైన వేధింపులపై ఫిర్యాదు చేసేందుకు https://www.facebook.com/tdpsocialmedialegalcell  అనే ఫేస్ బుక్ పేజీని ప్రారంభించామని తెలిపారు. సోషల్ మీడియాలో ఎలాంటి అభ్యంతరకరమైన పోస్టులు కార్యకర్తల దృష్టికి వస్తే, ఈ పేజీ వేదికగా పంచుకోవాలని కోరారు. అలాంటి వ్యక్తులపై చట్టపరమైన పోరాటం చేస్తామనీ, చట్టపరమైన చర్యలు తీసుకుంటామని హెచ్చరించారు. పార్టీపై దుష్ప్రచారం చేస్తూ, పార్టీ నేతలపై అసభ్యకరమైన రీతిలో సోషల్ మీడియాలో పోస్టులు పెడుతున్న వారిపై కూడా చట్టపరమైన చర్యలు తీసుకుంటామని ఆయన సోషల్ మీడియా వేదికగా ప్రకటించారు.  దీని కోసం ప్రతి జిల్లాలో తెదేపా లీగల్ సెల్ ను ఏర్పాటు చేస్తున్నాం. ఎల్లవేళలా పార్టీకి అండగా ఉన్న కార్యకర్తలను, అభిమానులను రక్షించుకోవడం మా బాధ్యత అని లోకేష్ పేర్కొన్నారు.  అయితే ఈ పని ఎప్పుడో చేసి ఉండాల్సిందనే వాదన ఇప్పుడు వినిపిస్తోంది. దానికి కారణం మనం చేసిన మంచి పనులు జనాలకు తెలిస్తే జనానికి మనం నచ్చొచ్చు నచ్చకపోవచ్చు కానీ కానీ మనపై జరుగుతున్న దుష్ర్పచారాన్ని అడ్డుకోకపోతే ప్రతి ఒక్కరికి దూరమైపోతామని చాన్నాళ్ళగా తెలుగుదేశం సోషల్ మీడియాలో యాక్టివ్ గా ఉండే వారు ఎప్పటి నుండో మొత్తుకున్నా వారి మాట చెవిన పడేసుకున్న పాపాన పోలేదు పార్టీ.  కానీ అంతా అయిపోయి జరగాల్సిన నష్టం జరిగాక ఇప్పుడు ఆ విషయాన్ని గొప్పగా చేస్తున్నారు. తెలుగుదేశం పార్టీ తనకున్నంత మీడియా బలం వైకాపాకు లేదనే భ్రమలో ఉండింది కానీ అత్యంత ప్రభావవంతమైన సోషల్ మీడియాని వైకాపా ఆక్రమించింది అనే విషయాన్ని పార్టీ గ్రహించలేకపోయింది, తెలంగాణ, ఆంధ్రప్రదేశ్ రాష్ట్రాల్లో వైకాపా, టీఆర్ఎస్ కార్యకర్తలు చంద్రబాబును తిట్టని తిట్టు లేదు. బోల్లిబాబు అంటూ మొదలు పెట్టి రకరకాల పేర్లతో, ఫోటో మార్ఫింగ్ లతో చంద్రబాబు గురించి చేయని ప్రచారం, చెప్పని అబద్ధమూ లేదు.  కానీ అధికారంలో ఉన్న పార్టీని ఇంత ధైర్యంగా తిడుతున్నా, వ్యక్తిగత పరువుకు భంగం కలిగిస్తున్నా తెలుగుదేశం ప్రముఖులు అస్సలు పట్టించుకోలేదు. నవ్విన నాపచేను పండుతుంది అనుకున్నారో ఏమో అసలు ఖండన కూడా ఉండేది కాదు. ఏకంగా విజయసాయి రెడ్డి లాంటి వాళ్ళు వైకాపా అనఫీశియాల్ పెయిడ్ పేజెస్ లో లోకేష్, చంద్రబాబుల మార్ఫింగ్ ఫోటోలు పెట్టినా ఎవరూ పట్టించుకోలేదు. విజయసాయిరెడ్డి మొదట తన ట్విట్టరులో ఏదో ఒక ఆరోపణ చేస్తారు. ఆ ఆరోపణ చేసే విధానం కూడా చాలా అద్భుతంగా ఉంటుంది.  పార్టీలో ఆ స్థాయి వ్యక్తి రాతపూర్వకంగా చెప్పారు అంటే అది నిజమై ఉంటుంది కదా అని ఆ పార్టీ కార్యకర్తలు విస్తృత ప్రచారం చేసేవారు. కానీ ఏ ఒక్క ఆరోపణ మీద కూడా టీడీపీ పరువు నష్టం దావా వేయలేదు. కోర్టుకు వెళ్లలేదు, దీంతో ఆయన మళ్లీ మళ్లీ ఎప్పుడూ ఎవరూ చేయని ఆరోపణలు కూడా చేయడం మొదలుపెట్టారు. అలా రాష్ట్ర ప్రజల్లో చంద్రబాబు పనులను, అభివృద్ధిని అబద్ధమని నమ్మించడంలో వైసీపీ వంద శాతం సక్సెస్ అయ్యింది. దీనిని మొగ్గలోనే అడ్డుకుని ఉంటే టీడీపీకి ఇంత డ్యామేజ్ కచ్చితంగా జరిగేది కాదు. చివరకు ఈరోజు కృష్ణా జిల్లాకు తొలకరి కంటే ముందే నీరు అందిస్తున్న పట్టిసీమ కూడా చంద్రబాబు కట్టి తప్పు చేశాడు, అవసరం అయితే ఆ పట్టిసీమని కూడా కూలగొట్టాలి అని ఆ పార్టీ నేతలు అంటున్నారంటే బాబు చేసిన అభివృద్ధిని వైసీపీ ఎలా ప్రచారం చేసిందో అర్ధం అవుతోంది. మొత్తానికి చేతులు కాలాక అయినా ఆకులు పట్టుకుంటూ మంచి పనే చేస్తున్నారని ఆ పార్టీ శ్రేణులు లోకేష్ కి థాంక్స్ కూడా చెబుతున్నారు.   

జగన్ అభద్రతా భావం....అందుకే విజయసాయి తొలగింపు ?

  ఏపీ రాజకీయాల్లో ఒక ఘటన ఆసక్తికరంగా మారింది, అదే విజయసాయి రెడ్డి ప్రత్యేక ప్రతినిది హోదా నుండి తొలగింపు. నిజానికి ఇది మామూలుగా అయితే అంత పెద్ద ప్రాముఖ్యత లేని వార్తే అని చెప్పాలి. ఏదో పొరపాటున నియమించారు, ఇప్పుడు రూల్ తెలిసి తప్పించారని సరిపెట్టుకోవచ్చు. కానీ గత కొన్ని రోజులుగా విజయసాయి రెడ్డి గురించి జరుగుతున్న ప్రచారం మాత్రం అలా సరిపెట్టుకోనివ్వడం లేదు.  ఎందుకంటే ఇది జగన్ తీసుకున్న అనూహ్య నిర్ణయం. వైకాపాలో అత్యంత కీలకంగా వ్యవహరిస్తున్న వ్యక్తి విజయసాయి, అక్రమాస్తుల కేసులో కలిసి జైలుకి వెళ్లి వచ్చిన నాటి నుండి ఈయనను పార్టీలో నెంబర్ 2 స్థానానికి వచ్చేలా చేశారు జగన్. అసలు ఏ మాత్రం రాజకీయ అనుభవం లేని ఈయన ఏకంగా ఒక పార్టీలో నెంబర్ 2 అయ్యాడంటే అది మామూలు విషయం కాదు. ఆయన చదువు ప్రకారం ఆయన ఒక తెలివయిన వ్యక్తి అయ్యుండచ్చు, కానీ ఏమాత్రం రాజకీయ అనుభవం లేకున్నా జగన్ పుణ్యమా అంటూ ఏకంగా పీఎంవోలో గంటల తరబడి కూర్చునే స్థాయికి వచ్చారు.  ఆ మహత్యమో ఏమో కానీ 2019 ఎన్నికల్లో అయితే విజయసాయిరెడ్డి లేకుండా ఏ పనీ జరగలేదు. జగన్ ని కూడా అంతగా పట్టించుకోక క్యాడర్ మొత్తం ఆయన చుట్టూనే తిరిగింది. ఎంతో కీలకంగా కనిపించిన ఆయనకు ప్రచారం జరిగినట్టే ప్రాధాన్యత దక్కింది. మొన్నటి విజయం అనంతరం ఏకంగా 5 పదవులు జగన్ ఆయనకు కట్టబెట్టారు. అందులో అత్యంత కీలకమైన, కేబినెట్ ర్యాంకు కలిగిన పోస్టు ‘ఢిల్లీలో ఏపీ ప్రభుత్వ ప్రత్యేక ప్రతినిధి’ పదవి కూడా ఒకటి. అయితే ఈ పోస్టును రద్దు చేస్తూ నిన్న రాత్రి జగన్ ప్రభుత్వం ఉత్తర్వులు జారీ చేసింది.  దీనికి కారణంగా నిబంధనల పేరు చెబుతున్నారు. ఓ ఎంపి మరో లాభదాయక పదవిలో కొనసాగేందుకు వీలు లేదన్నది ప్రజా ప్రాతినిధ్య చట్టం ప్రకారం ఉన్న నిబంధన. ఇదే విషయంలో గతంలో కూడా సోనియా గాంధి వంటి వారి మీద చాలా వివాదాలు రేగాయి. అందుకే తప్పించామని చూచాయగా చెబుతున్నా ఈ కీలకమైన పోస్టును పీకేయడం వెనుక మరో పెద్ద కారణమే ఉండే అవకాశం ఉందని అంటున్నారు. ఈ మధ్య కాలంలో మోడీకి ఏపీ బీజేపీ నేతల కంటే సాయిరెడ్డి ఎక్కువ దగ్గరయ్యాడని విశ్లేషకుల భావన. ఈ విషయాన్ని ఆయనే చెప్పుకున్నాడు, మోడీ వచ్చి విజయ్ గారూ బాగున్నారా అని అన్నారని, ఇది జీవితంలో అత్యంత సంతోషకరమైన రోజు అని ఆయన పేర్కొన్నాడు.  నిజానికి విజయసాయి మీద ఆంధ్రా పళని స్వామి అంటూ ప్రచారం జరుగుతోంది. ఆయన సొంత పార్టీకి ఎలా హ్యాండ్ ఇచ్చి మోడీతో చేతులు కలిపి సీఎం పీఠాం అనుభవిస్తున్నాడో ఈయన కూడా అదే చేయబోతున్నాడనేది కొందరి వాదన. అదీ కాక ఏపీలో వైసీపీ వారిని చేర్చుకోడానికి బీజేపీ తలుపులు తెరిచింది, ఎటూ జగన్ గెలిచేందుకు మోడీ ఈవీఎంల ద్వారా సాయ పడ్డాడు అనే ప్రచారం ఉండనే ఉంది, ఈ క్రమంలో మెజారిటీ ఎమ్మెల్యేలను తప్పించి, విజయసాయి రెడ్డిని బీజేపీ సీఎం చేసినా ఆశ్చర్యం లేదని ప్రచారం జరిగింది. ఇలాంటి ప్రచారాల మధ్య సాయిరెడ్డిని తప్పించడం ఏపీ రాజకీయల్ల్లో కలకలం రేపుతోంది. ఈ ప్రచారాల వలన ఏర్పడిన అభద్రతా భావం వలనే జగన్ విజయసాయి రెడ్డిని తప్పించారనేది జరుగుతున్న ప్రచారం. చూడాలి ఈ వ్యవహారం ఎంతవరకూ దారితీస్తుందో ?  

ఒక పరాజయం 100 తప్పులు.. టీడీపీకి పెద్ద దెబ్బ వేసిన పెద్ది!

  టీడీపీ ఘోర పరాజయంలో పెద్ది రామారావు కూడా కీలక పాత్ర పోషించారని చెప్పవచ్చు. నారా లోకేష్ ప్రసంగాలు మెరుగు పరచాలనే ఉద్దేశంతో పెద్ది రామారావును శిక్షకుడిగా ఎంపిక చేసారు. లోకేష్ కి శిక్షణ ఇవ్వడం ఏమో కానీ, ఆయన పార్టీకి పరోక్షంగా శిక్ష విధించారనే అభిప్రాయం వ్యక్తమవవుతోంది. పెద్ది రామారావు రచయిత. పలు నాటకాలు, సీరియల్స్ రచించారు. మరి ఈయన లోకేష్ దృష్టిలో ఎలా పడ్డారో తెలీదు కానీ.. లోకేష్ ప్రసంగాలు మెరుగుపరిచే బాధ్యత పెద్దికి అప్పగించారు. బహుశా పెద్దికి తెలుగు మీద పట్టు ఉండటం వల్ల ఎంపిక చేశారేమో?. అయితే ఆ ఎంపికే తరువాత వారి కొంపముంచింది. పెద్ది వైసీపీ సానుభూతి పరుడనే ప్రచారం కూడా ఉంది. మరి అలాంటి పెద్దిని లోకేష్ తన దగ్గర ఎలా పెట్టుకున్నారో అర్థంకాని ప్రశ్న. పెద్ది మూలంగా లోకేష్ ప్రసంగాలలో పెద్దగా మార్పేమీ లేదు. అదే తడబాటు, అదే నవ్వులపాలు. కానీ పెద్ది జీవితం ఈ నాలుగేళ్లలో చాలా మారిపోయిందనే ఆరోపణలు కూడా ఉన్నాయి. ఆయన ఆర్థికంగా చాలా బలపడ్డారట. అంతేకాదు ఈయన పార్టీ డేటాని కూడా లీక్ చేసారని కూడా ఆరోపణలు ఉన్నాయి. అలాగే, ప్రభుత్వం మీద ప్రజల్లో ఎలాంటి అభిప్రాయం ఉందన్న విషయంలో బాబుకి ఈయన తప్పుడు రిపోర్టులు కూడా ఇచ్చారు అంటారు. మొత్తానికి పెద్దిని పక్కన పెట్టుకొని.. బాబు, లోకేష్ లు పార్టీకి పెద్ద నష్టమే చేశారనే అభిప్రాయం వ్యక్తమవుతోంది.  

సీఎం జగనే...కానీ పాలన మాత్రం ఆయనదా ?

  ఏపీలో ఆగ‌స్ట్ 15వ తేది నుంచి గ్రామ సేవ‌కుల వ్య‌వ‌స్థ అమ‌లులోకి రానుంది. దీంతో ఇక‌ ప్ర‌భుత్వ ప‌థ‌కాల‌న్నీ వారి చేతుల మీదుగానే పంపిణీ కానున్నాయి. ఆఖ‌రికి రేష‌న్ స‌రుకుల‌ను సైతం గ్రామ సేవ‌కులే ఇంటింటికి చేరుస్తారని సీఎం జగన్ ప్రకటించారు. ఈ క్రమంలో ఇప్పటి దాకా రేష‌న్ అందిస్తున్న డీల‌ర్ల వ్య‌వ‌స్థ ర‌ద్దు కానుంది. వేలాది మంది రేష‌న్ డీల‌ర్లు రోడ్డున ప‌డ‌నున్నారు, అయితే ప్ర‌భుత్వానికి ఇప్ప‌టికే వారంతా త‌మ రేష‌న్ డీల‌ర్ల వ్య‌వ‌స్థ‌ను రద్దు చేయ‌వ‌ద్ద‌ని కోరుతూ ప‌లు విన్న‌పాలు చేశారు.  అయినా ప్ర‌భుత్వం నుంచి ఎటువంటి స్పంద‌న లేని నేప‌థ్యంలో ఎపీ ముఖ్య‌మంత్రి జ‌గ‌న్ కు ఆధ్యాత్మిక గురువు స్వ‌రూపానందేంద్ర స‌ర‌స్ప‌తిని ఈ రేష‌న్ డీల‌ర్లు ఆశ్రయించారు. ఈ వ్య‌వ‌స్థ ర‌ద్దు కాకుండా త‌మ‌రే త‌మ‌ను ర‌క్షించాల‌ని ఈరోజు స్వామిజీ అభ్య‌ర్ధించారు. ఇప్పుడు ఇదే విషయం రాజకీయ వర్గాల్లో సంచలనంగా మారింది. నిజానికి స్వాములు ఆధ్యాత్మిక దీవెనలు ఇస్తారు తప్ప ప్రభుత్వాలు, మంత్రులు, సీఎంల మాదిరిగా సమస్యలు పరిష్కరించరు కదా. మరి అలాగైతే.. రేషన్ డీలర్లు తమ సమస్యల పరిష్కారం కోసం స్వరూపానంద వద్దకు ఎందుకు వచ్చినట్టు ? అంటూ నెటిజన్లు ఆడుకుంటున్నారు. ఏపీలో ఏ పని కావాలన్నా స్వరూపానంద ఆశీస్సులు ఉంటే చాలని, స్వయంగా ముఖ్యమంత్రి హోదాలో ఉన్న జగన్ నిత్యం స్వామి వారి పాద సేవ చేస్తుంటే స్వామి వారి నోట నుంచి వచ్చే మాటను పెడచెవిన పెట్టరని, ఈ లాజిక్ గ్రహించిన రేషన్ డీలర్లు ఇలా తమ సమస్యల పరిష్కారం కోసం సీఎం జగన్ ను ఆశ్రయించడానికి బదులుగా నేరుగా స్వరూపాందన వద్దకు వచ్చారని ప్రచారం జరుగుతోంది.  గతంలో తెలంగాణలోనూ చిన్నజీయర్ స్వామిని కలిసి రెవెన్యూ ఉద్యోగులు ఆ శాఖను ప్రక్షాళన చేయకుండా కేసీఆర్ కు చెప్పాలని వినతిపత్రం ఇవ్వడం అప్పట్లో సంచలనంగా మారింది. ఇప్పుడు జగన్ విషయంలో కూడా రేషన్ డీలర్ లు అలాగే ప్రవర్తిస్తున్నారు. అయితే ఇదంతా కావాలని చేసిందని వైసీపీ అనుకూల వెబ్ మీడియా కధనాలు ప్రచురించింది. స్వామీజీని కలసిన రేషన్ డీలర్ల వర్గం అసలు యూనియన్ లో ఒక భాగం మాత్రమేనని కేవలం జగన్ ని టార్గెట్ చేయడం కోసమే వారు ఈ పనిచేసినట్టు తెలుస్తోందని కధనాలు ప్రచురించింది.  గతంలో జగన్ స్వామీజీని కలిసినప్పుడు టీడీపీ నేతలు నానా హంగామా చేసి స్వరూపానంద పవర్ సెంటర్ గా మారుతున్నారని ఆరోపించారని ఆ ఆరోపణలకి తగ్గట్టే మంత్రివర్గ కూర్పు సమయంలో చాలామంది ఆశావహులు స్వరూపానంద దర్శనానికి ఎగబడ్డారు కూడా. ఆ తర్వాత జగన్ నుంచి సూచనలు వెళ్లాయో లేక స్వామీజీయే అవగతం చేసుకున్నారో తెలియదు కానీ ఇటీవల రాజకీయ తాకిడి శారదా పీఠానికి కాస్త తగ్గిందని, కానీ ఇప్పుడు కావాలనే ఇలా రేషన్ డీలర్ లు చేశారని అంటున్నారు.  ముందుగా ఒక వినతి పత్రం ఇవ్వడానికి వస్తున్నామని చెబితే శారదా పీఠం నిర్వాహకులు ఒప్పుకోలేదని, అందుకే భక్తుల ముసుగులో ఆ డీలర్లు స్వామీజీని కలిశారని, ఎక్కడా డీలర్లనే ప్రస్తావనే రాకుండా, అసలు సమస్య ఏమిటో కూడా స్వరూపానందకు చెప్పకుండా దర్శనం చేసుకుని, ఆశీర్వాదం తీసుకుంటున్న ఫొటోలు తీసుకుని వైరల్ చేశారనేది ఆ మీడియా సారాంశం. అయితే ఇందులో నిజం ఎంత అనేది ఆ స్వరూపానంద స్వాముల వారికే ఎరుక.  

ఒక పరాజయం 100 తప్పులు.. బాబుని కార్యకర్తలకు దూరం చేసింది ఆ 'చౌదరే'నా?

  మన దగ్గర ఏమీ లేనప్పుడు అందరితో మంచిగా ఉండటం గొప్ప కాదు.. మన దగ్గర అన్నీ ఉన్నప్పుడు అందరితో ఉండటం గొప్ప. అలాగే రాజకీయాల్లో.. పార్టీ క్రియాశీల కార్యకర్తగా ఉన్నప్పుడు మిగతా కార్యకర్తలతో మంచిగా ఉండటం గొప్పకాదు, పార్టీలో తగిన గుర్తింపు వచ్చి మంచి స్థాయికి వెళ్ళాక కూడా కార్యకర్తలతో మంచిగా ఉండటం గొప్ప. ఇది లేకనే టీడీపీలో ఒక నేత తీవ్ర విమర్శలు ఎదుర్కొన్నారు. ఓ రకంగా టీడీపీ ఓటమికి కూడా కారణమయ్యారు. ఆయనే టీడీపీ ప్రోగ్రామ్స్ కమిటీ చైర్మన్ వీవీ చౌదరి. వీవీ చౌదరి అప్పట్లో తెర వెనుక నుండి టీడీపీ కోసం క్రియాశీల కార్యకర్తగా తన వంతు కృషి చేసారు. మరి ఈయన బాబు తనయుడు లోకేష్ దృష్టిలో ఎలా పడ్డారో తెలీదు కానీ.. ఆయనకు బాగా దగ్గరయ్యారు. ఎంతలా అంటే ఫోను చేసి స్వేచ్ఛగా మాట్లాడే అంత. తరువాత పార్టీ ఆఫీస్ లో కూడా వీవీ చౌదరి హవా కొనసాగింది. ఆయన హవానే నిజమైన కార్యకర్తలను పార్టీకి దూరమయ్యేలా చేసింది. దురుసుగా ప్రవర్తించడం, ఎవర్ని లెక్క వేయకుండా మాట్లాడం, కార్యకర్తలు ఏదైనా సమస్యను పార్టీ దృష్టికి తీసుకొస్తే పట్టించుకోకపోవడం. ఇలా సొంత పార్టీ కార్యకర్తలని ఇబ్బంది పెట్టారు. పార్టీలో అంతా నేనే అన్నట్లుగా లోకేష్, బాబులకు దగ్గరైన ఈయన.. కార్యకర్తలను దూరం చేసాడు. దీన్ని గుర్తించడంలో బాబు విఫలమయ్యారు. అందుకే ఇప్పుడు ఫలితాన్ని అనుభవిస్తున్నారు.

కృష్ణా నది మీద నింద మోపుతున్న బీజేపీ మాజీ ఎంపీ

  హనుమంతుడు దళిత వర్గానికి చెందినవాడు  - "బీజేపీ" నేత, యూపీ సీఎం యోగి ఆదిత్యనాథ్ హనుమంతుడు ‘జాట్’ కులానికి చెందినవాడు - "బీజేపీ" నేత, యూపీ మంత్రి లక్ష్మీ నారాయణ చౌదరి  మహాభారత కాలం నుంచే భారత్‌లో ఇంటర్‌నెట్ -  "బీజేపీ" నేత, త్రిపుర సీఎం బిప్లవ్‌కుమార్  మహాభారత కాలం నుంచే జర్నలిజం ఉంది -   "బీజేపీ" నేత, యూపీ డిప్యూటీ సీఎం దినేశ్ శర్మ తొలి విమానాన్ని కనిపెట్టింది భారతీయుడే -   "బీజేపీ" నేత, కేంద్ర మంత్రి సత్యపాల్‌సింగ్    ప్లాస్టిక్ సర్జరీ దేవుడు-వినాయకుడు - "బీజేపీ" నేత, ప్రధాని నరేంద్ర మోడీ కృష్ణానది మా భూమిని ఆక్రమించింది - "బీజేపీ" నేత, మాజీ ఎంపీ గోకరాజు గంగరాజు ఇవన్నీ చూస్తోనే నవ్వొస్తోందా మీకు, నవ్వుకోండి నవ్వుకోండి. మిగతా విషయాలు పాతవే కాబట్టి వాటి సంగతి ప్రస్తుతం ప్రస్తావానర్హం కాదు. ఇక గోకరాజు గంగరాజు గారి గురించి మనం మాట్లాడాల్సి వస్తే, ప్రస్తుతం ఏపీ మొత్తం మీద అక్రమ కట్టడాల కూల్చివేతల అంశం ఏపీ రాజకీయాల్లో హాట్ టాపిక్ గా మారింది. కృష్ణా నది కరకట్టపై ఉన్న కట్టడాలను అక్రమ కట్టడాలుగా తేల్చిన సీఆర్డీఏ అధికారులు ఆయా యజమానులకు కూల్చివేత నోటీసులు ఇచ్చిన సంగతి తెలిసిందే.  అందరితో పాటే బీజేపీ నేత, మాజీ ఎంపీ గోకరాజు గంగరాజు గెస్ట్ హౌస్ కి కూడా అధికారులు నోటీసులు ఇచ్చారు. అయితే ఈ నోటీసుల మీద గోకరాజు గారి స్పందనే ఆసక్తికరంగా మారంది. కరకట్టను తాము ఆక్రమించుకోలేదన్న ఆయన కృష్ణా నదే తమ భూములను ఆక్రమించిందని చెప్పిన లాజిక్ కి మైండ్ బ్లాక్ కావడం విలేఖరుల వంతు అయింది. నదీ భూములను తాము ఆక్రమించలేదని నిజానికి తమ భూములను కృష్ణా నదే కబ్జా చేసిందని అంటున్నారు.  25 ఏళ్ల క్రితం నుంచి ఉండవల్లిలో 25 ఎకరాల భూమి ఉందని చెప్పుకొచ్చారు. తాను కట్టిన గెస్ట్ హౌస్ కు వైఎస్సార్ హయాంలో మల్లాది విష్ణు ఉడా చైర్మన్ గా ఉండగానే ఉడా, ఇరిగేషన్ శాఖల అనుమతి తీసుకునే కట్టానని గంగరాజు చెప్పారు. బీపీఎస్ వచ్చిన తర్వాత అనుమతి కోసం దరఖాస్తు చేశామని, అనుమతి రాలేదని చెప్పారు. దీంతో గతంలో ఇరిగేషన్ అధికారులు 30 అడుగులు మాత్రం వదిలి భవనం నిర్మించుకోమని పర్మిషన్ ఇచ్చినట్లుగా గోకరాజు తెలిపారు. నదిలో కూడా‌ మాకు ఇంకా ల్యాండ్ ఉందని వరద వచ్చినప్పుడల్లా మా ల్యాండ్ కొంత కోల్పోతున్నామని ఆయన అంటున్నారు. ఫాంహౌస్ కట్టుకున్న తర్వాత నదికి 100 మీటర్ల లోపల కట్టకూడదని జీవో వచ్చిందని గోకరాజు చెప్పారు. ప్రజావేదికను కూల్చిన విధంగా అన్నీ కూల్చాలంటే రాష్ట్ర వ్యాప్తంగా నది వెంబడి ఉన్నటువంటివి ఎన్నో కూల్చాల్సి ఉంటుందని ఆయన అభిప్రాయపడ్డారు.  తాను కట్టిన భవంతి విలాసవంతమైనది కాదని కేవలం ఫాం హౌస్ మాత్రమే అని వివరించారు. చిన్న చిన్న పొరపాట్లు అందరూ చేస్తారన్న గోకరాజు అందరి మీద చర్యలు తీసుకున్న తర్వాత తన మీద తీసుకున్నా తనకు అభ్యంతరం లేదని అంటున్నారు. గోకరాజు చేసిన వ్యాఖ్యలు ఏపీలో చర్చకు దారితీశాయి. ఆయన మాటలతో అంతా అవాక్కవుతున్నారు.    

చేతులు కాల్చుకుని ఆకులు పట్టుకున్న బీజేపీ

  ప్రస్తుతం తెలుగు రాష్ట్రాల మీద ఫోకస్ పెట్టిన బీజేపీ, రెండు తెలుగు రాష్ట్రాలలో వీలయినంత మందిని చేర్చుకునే పనిలో పడింది. ఆ చేర్చుకునేది ఏదో పేరున్న నాయకులనో, నలుగురు చేయెత్తి నమస్కారం పెట్టగలిగిన వ్యక్తులనో చేర్చుకుంటే ఫర్వాలేదు కానీ ఒక అరవై ఏళ్ళు పైబడిన మహిళను తనను లైంగికంగా వేధించిందని పరువు తీసిన వ్యక్తిని పార్టీలో చేర్చుకోవడంతో ఇప్పుడు పరువు తీసుకుని, దానిని కవర్ చేసుకునే పనిలో పడింది. తాజాగా బీజేపీ ఏపీ రాష్ట్ర అధ్యక్షుడు కన్నా లక్ష్మీనారాయణ – ఎన్టీఆర్ సతీమణి లక్ష్మీ పార్వతి తనను లైంగిక వేధింపులకు గురి చేసిందంటూ ఎన్నికలా సమయంలో  ఫిర్యాదు చేసిన కోటి అనే వ్యక్తిని కండువా కప్పి పార్టీలోకి చేర్చుకున్నారు.  అయితే కోటి కావాలనే లక్ష్మీ పార్వతి పరువు తీయడానికే ఇలా చేశాడని హైదరాబాద్ పోలీసులు తేల్చారు, అంతేకాదు పూనమ్ కౌర్ మాట్లాడుతున్నట్టుగా ఉన్న వీడియోలని వైరల్ చేసింది కూడా ఇతనే అని పోలీసులు గుర్తించారు. కోర్టుకు వెళ్లి నం బెయిలబుల్ వారెంట్ తెద్దాం అనుకునే లోపే ఈ కోటి వెళ్లి బెయిలు తెచ్చేసుకున్నాడు. అయితే అప్పుడు మిస్సయ్యిన కోటి నిన్న బీజేపీ అధ్యక్ష్యుల వారి కండువాలో కనపడ్డాడు. ఈ క్రమంలో ఇలాంటి వ్యక్తిని పార్టీలో చేర్చుకోవడంపై సామాన్య ప్రజల్లో సైతం ఆగ్రహావేశాలు వ్యక్తమవుతున్నాయి. లక్ష్మీపార్వతి వైసీపిలో ఉంది కాబట్టి ఆమె చట్టపరమైన చర్యలు తీసుకోకుండా వాటి నుంచి తప్పించుకోవడానికి ఆయన బీజేపీలో చేరి ఉంటాడని నెటిజన్లు దుమ్మెత్తిపోస్తున్నారు.  సుజనా చౌదరి, సీఎం రమేష్ లాంటి వాళ్ళను ఆర్ధిక ఉగ్రవాదులు అంటూ తెలుగు ప్రజల్లో ప్రాజెక్ట్ చేసిన బీజేపీ పెద్దలు ఆ తర్వాత ఏమాత్రం తొణకకుండా వారిని పార్టీలో చేర్చుకున్నప్పుడు రాజకీయాల్లో ఇలాంటివి సహజమే అని జనం సరిపెట్టుకుని ఉండచ్చు, కానీ ఒక మహిళ అది కూడా వృద్ద మహిళను ఇలా అసభ్య రీతిలో చిత్రీకరించిన ఇలాంటి వ్యక్తిని పార్టీలో ఎలా చేర్చుకుంటారని వారు ప్రశ్నిస్తున్నారు. దీంతో ఈ కోటి పార్టీలో చేరడం వలన ఒరిగేది ఏమీ లేకున్నా పెద్ద నష్టం కలిగేలా ఉండడంతో బీజేపీ నేతలు వెంటనే దీనిపై వివరణ ఇచ్చుకున్నారు.  మాజీ మంత్రి రావెల కిషోర్ బాబు ఆధ్వర్యంలో వినుకొండ నియోజకవర్గానికి చెందిన 80 మంది టీడీపీ కార్యకర్తలు నిన్న పార్టీలో చేరారని వారిలో కోటి కూడా ఉన్నాడని అతనిని ప్రత్యేకంగా ఏమీ చేర్చుకోలేదని, ఇంకా బీజేపీలో కోటికి సభ్యత్వం ఇవ్వలేదని. అతడు బీజేపీ సభ్యుడు కాదని క్లారిటీ ఇచ్చింది. అయినా తాను 100 మందితో వచ్చి జాయిన్ అయ్యానని, మోడీ పాలన నచ్చే జాయిన్ అయ్యానని కోటి చెబుతుంటే బీజేపీ మాత్రం తమకు సంబంధం లేదని అంటోంది. అయినా విషయం తెలియక చేతులు కాలాక ఆకులు పట్టుకుంటే లాభం ఏముంది చెప్పండి.

విత్తన సంక్షోభం : గత ప్రభుత్వ నిర్లక్ష్యమా....ఈ ప్రభుత్వ అనుభవలేమా ?

ఏపీ ప్రభుత్వ అనుభవ లేమి ప్రతి విషయంలోనూ కొట్టోచ్చిన్నట్టు కనిపిస్తోంది. ఏపీ ప్రభుత్వం పాలన మొదలుపెట్టి నెల రోజులయింది. అయితే ఈ ప్రభుత్వానికి మొట్టమొదటి దెబ్బ రైతుల నుండే తగిలింది. విత్తనాల లేమితో  రైతులందరూ రోడ్ల మీదకు వచ్చే పరిస్థితి ఎదురయింది. తడ నుండి ఇచ్చాపురం దాకా విత్తనాల సమస్య తీవ్రంగా ఉంది. ఇప్పటికే పలు చోట్ల రోడ్ల మీదకి వచ్చి ధర్నాలు చేస్తున్నారు. విత్తన పంపిణీ కేంద్రాల వద్ద రైతులు బారులు తీరుతున్నారు. పడిగాపులు పడుతున్నారు. కానీ విత్తనాలు మాత్రం అందడం లేదు. అయితే విత్తన సమస్యను తీర్చే చర్యల గురించి చెప్పాల్సిన మంత్రి టీడీపీ ప్రభుత్వం మీద నిందలేసి తాము పరిశుద్దులం అనిపించుకునే ప్రయట్నం చేస్తున్నారు.  ఈ నెల రోజుల్లో వ్యవసాయ సీజన్‌ కు రైతులకు కావాల్సినవి అందుబాటులో ఉంచారో, లేదో మాత్రం సమీక్ష చేయలేకపోయారు ఏపీ మంత్రి వర్యులు. అవినీతి మీద సమీక్ష అంటూ సమయం వృధా చేసిన సర్కార్ ఒక్క రోజంటే ఒక్క రోజు కూడా వ్యవసాయ సమస్యలపై సమీక్షించలేదు. ఫలితంగా విత్తన సంక్షోభం రైతులను ఏడిపిస్తోంది. ఏదో ఒకటి చేసి విత్తనాలు రైతులకు ఇవ్వాల్సిన సర్కారు గత ప్రభుత్వం దగ్గర ప్రణాళికే లేదని, నాణ్యమైన విత్తనాల పంపిణీలో గత ప్రభుత్వం విఫలమయిందని మంత్రి కన్నబాబు చెప్పుకొస్తున్నారు. విత్తన సేకరణకు, పంపిణీకి గత ప్రభుత్వానికి.. ఒక స్పష్టమైన కార్యాచరణ లేదని మండిపడ్డారు. అయితే సుమారుగా 25 రోజుల క్రితమే మంత్రిగా బాధ్యతలు తీసుకున్న కన్నబాబు, వ్యవసాయశాఖ శాఖ మీద పట్టు సాదించలేకపోయారు అని చెప్పవచ్చు. రాష్ట్రంలో ఉన్న రైతులకు ఎన్ని క్వింటాళ్ల విత్తనాలు పంపించేయాలి మన దగ్గర ఎన్ని క్వింటాళ్ల విత్తనాలు ఉన్నాయి అని వ్యవసాయశాఖ అధికారులు దగ్గర సమాచారం ఉంటుంది, కానీ అవి ఏమి తెలుసుకోకుండా మంత్రి అట్టహాసంగా జూన్ 15 తేదీన విత్తన పంపిణీ ప్రారంభించారు. అయితే విత్తన పంపిణీ విషయంలో వ్యవసాయశాఖ వైఫల్యం చెందడంతో రైతులు రాస్తారోకోలు, ధర్నాలకు దిగారు.  ఆలస్యంగా మేలకున్న మంత్రి కన్నబాబు చంద్రబాబు మీదకే నెపం నెట్టే ప్రయత్నం చేశారు. ఇప్పుడు విత్తనాల కోసం 10 రోజుల్లో మరో వెయ్యి కోట్లు విడుదల చేస్తామని గొప్పగా ప్రకటించారు. ఎక్కువ ధర ఇచ్చైనా నాణ్యమైన విత్తనాలు సేకరిస్తామని చెబుతున్నారు. ఈ ఏడాది 4.43 లక్షల క్వింటాళ్ల వేరుశనగ విత్తనాలను పంపిణీ చేయాల్సి ఉంటే తమ ప్రభుత్వం ఏర్పడేనాటికి 50 వేల క్వింటాళ్లనే సేకరించారన్నారు. తాము అధికారంలోకి వచిన తర్వాత 2.70 లక్షల క్వింటాళ్లను సిద్ధం చేసి రైతులకు అందజేశామని, మరో 50 వేల క్వింటాళ్లను అందుబాటులో ఉంచినట్టు చెబుతున్నారు. ఇది జగన్ ప్రభుత్వ అనుభవ లేమితోనే జరిగిందని విశ్లేషకులు భావిస్తున్నారు.

ఒక పరాజయం 100 తప్పులు.. టీడీపీ కొంప ముంచిన NRI ముఠా

  దూరపు కొండలు నునుపు అన్నట్టుగా.. కొందరు ఎన్నారైల మాయలో పడి, వారినేదో గొప్పవారిలా ఊహించుకొని చంద్రబాబు దెబ్బతిన్నారా అంటే అవుననే అభిప్రాయం వ్యక్తమవుతోంది. ఎన్నారైలు ఇక్కడ నుంచి విదేశాలకు బ్రతుకుదెరువు కోసం వెళ్లిన వారు మాత్రమే. కానీ బాబు, లోకేష్ లు మాత్రం.. కొందరు ఎన్నారైలను ఆకాశం నుంచి దిగొచ్చిన వారిలా చూస్తూ.. వారి భజనకి, వారి మాయమాటలకు పడిపోయి.. తానా అంటే తందానా అన్నారు. ఇప్పుడు ఫలితం అనుభవిస్తున్నారు. ఎన్నారైలు నాలుగు డాలర్లు వెనకేసుకునే సరికి.. వారికి టికెట్, వీరికి పదవి అంటూ బాబు, లోకేష్ ల వద్ద పైరవీలు చేసారు. దీంతో నిజమైన కార్యకర్తలు, పార్టీ కోసం కష్టపడిన సరైన గుర్తింపు లేక చిన్నగా పార్టీకి దూరమవుతూ వచ్చారు. దీనికి తోడు వేమూరి రవి వంటి వారు APNRT పేరుతో చేసిన హడావుడి అంతాఇంతా కాదు. అదేదో ప్రభుత్వ సంస్థనో, పార్టీ అనుబంధ సంస్థనో అన్నట్లు చేసారు. అంతేనా ఎన్నారైలు తిరుమల వస్తే వారికి ప్రత్యేక దర్శనం టికెట్లు అంట. వారేమన్నా దైవాంశ సంభూతులా? లేక మంత్రులు, ప్రధాన మంత్రులా?. ఇలా వారిని నెత్తికి ఎక్కించుకొని బాబు తీవ్ర విమర్శలు పాలయ్యారు. బాబు సామాజిక వర్గానికి చెందిన కొందరు ఎన్నారైలు.. టీడీపీ తమ కులానికి చెందిన పార్టీ అన్నట్టుగా అత్యుత్సాహం చూపడం కూడా పార్టీ ప్రతిష్టతను దెబ్బతీసింది. టీడీపీ మొదటినుంచి అండగా ఉన్న అనేక కులాలను దూరం చేసింది. ఈ ఎన్నారై ముఠా ఇంకా చాలా కార్యాలు వెలగబెట్టింది. అవన్నీ ఈ వీడియోలో వివరంగా తెలుసుకోండి.

ప్రజాదర్బార్ కాదని....సహస్ర చండీ యాగమా జగన్ ?

  విభజన తర్వాత పదమూడు జిల్లాలతో ఏర్పడ్డ ఏపీకి రెండవ సీఎంగా వైసీపీ అధ్యక్ష్యుడు వైఎస్ జగన్ మోహన్ రెడ్డి బాద్యతలు చేపట్టి నిన్నటితో నెల రోజులు పూర్తయ్యాయి. దీంతో చాలా వరకూ మీడియా సంస్థలు, వెబ్ సైట్స్ ఆయన నెల రోజుల పాలన భేష్ అంటూ ఏక పక్ష తీర్మానాలు ఇచ్చేశాయి. అయితే నిజానికి కాస్త మనసు పెట్టి ఆలోచిస్తే ఆయన ఏమేరకు పని చేస్తున్నారు అనే విషయం అందరికీ ఇట్టే అర్ధం అవుతుంది. ఆయన తీసుకుంటున్న నిర్ణయాలు బానే ఉంటున్నాయి, కానీ కొన్ని మాత్రం ఆచరణ సాధ్యమా కాదా అనే విషయాన్ని పట్టించుకోకుండా మొండిగా ప్రకటన చేసి ముందుకు వెళ్ళడం వలన అది జగన్ ప్రభుత్వం మీద పెద్ద మచ్చగా మిగిలిపోయే అవకాశం ఎక్కువగా కనిపిస్తోంది.  ఎందుకంటే ఏ విషయం అయినా చేసేయగలం అనే నమ్మకంతో ప్రకటనలు చేసి ప్రజల ముందు లోకువ అవుతున్న పరిస్థితులు కనిపిస్తున్నాయి. అలాంటిదే ప్రజా దర్బార్, ఆయన తండ్రి రాజన్న మాదిరిగానే ప్రజలను నేరుగా కలుస్తారని ఆయన క్యాంప్ ఆఫీసులోనే ప్రజలతో మమేకం అయ్యి వారి సమస్యలు తీరుస్తారని జూన్ 29వ తేదీన సీఎంవో నుంచి దీనిపై అధికారిక ప్రకటన వెలువడింది. జూలై ఒకటి నుండి ఆయన ప్రతీ రోజూ ప్రజాదర్బార్‌లో పాల్గొన్న తర్వాతే రోజువారీ అధికారిక కార్యక్రమాలల్లో పాల్గొంటారని ప్రకటించారు.  ఈ విషయం మీద ముందు నుండీ సమన్వయం ఉందో లేదో తెలీదు కానీ నిన్న జగన్ తో భేటీ ఐన మంత్రులు, ఈ నెలలో బడ్జెట్ అసెంబ్లీ సమావేశాలు ఉంటాయని అవి పూర్తయ్యాక వచ్చే నెలలో ఈ దర్బార్ మొదలవుతుందని ప్రకటించారు. అయితే సీఎంవో ప్రకటన మాత్రం వేరేలా ఉంది, ప్రజల వసతి కోసం సీఎం క్యాంప్ కార్యాలయంలో ఇంకా ఏర్పాట్లు పూర్తి కాలేదని అందుకే ఆగస్టు ఒకటో తేదీకి ప్రజాదర్బార్‌ను వాయిదా వేసినట్లుగా ప్రకటించారు. అదొక ఎత్తు అయితే జగన్ ఇంటికి ఈరోజు ప్రజాదర్బార్ వాయిదా పడిన విషయం తెలియక కొంతమంది ప్రజలు వచ్చి జగన్ కోసం ఎదురు చూస్తున్నారు.  అయితే వారికి మాట మాత్రం అయినా ఈ వాయిదా విషయాన్ని చెప్పని జగన్ తమ పార్టీ ఏర్పాటు చేసిన సహస్ర చండీ యాగంలో పాల్గొనేందుకు వెళ్ళిపోయారు. జగన్ అలా వెళ్తున్న విషయాన్ని తెలుస్కున్న ఇంటికి చేరుకున్న ప్రజలు ఆయన్ను కలిసేందుకు ప్రయత్నించి తొక్కిసలాటకి లోనయ్యారు. వైసీపీ ఆధ్వర్యంలో తాడేపల్లి సీఎస్ఆర్ కళ్యాణమండపంలో సహస్ర చండీయాగం జరుగుతోంది. జగన్ సీఎంగా బాధ్యతలు స్వీకరించాలని కోరుతూ ఏడాది క్రితం వైసీపీ నేతలు ఈ యాగాన్ని చేపట్టారు.  ఎమ్మెల్యే భూమనకరుణాకర్ రెడ్డి సహకారంతో సాగిన ఈ యాగంలో పార్టీ ముఖ్యనేతలు కూడా పాల్గొంటూ వచ్చారు. ఈరోజు పూర్నాహుతి కార్యక్రమంలో జగన్ పాల్గొని ఈరోజుతో యాగానికి ముగింపు పలికారు. అయితే ముఖ్యమంత్రి హోదాలో జగన్ దైవ కార్యాలకి వెళితే ఎవరూ తప్పు పట్టరు, కానీ ఆయన ఇలా తన కోసం ఎదురు చూస్తున్న జనానికి మాట మాత్రం అయినా చెప్పకుండా అలా వెళ్ళిపోవడం, అనుభవ లేమితో ప్రకటనలు, వాయిదాలు ఖచ్చితంగా ప్రభుత్వం మీద నెగటివ్ అభిప్రాయం ఏర్పరుస్తుందని విశ్లేషకులు అంటున్నారు. ఇలాంటివి ఇప్పటికి అయినా పొరపాట్లు అనుకుని దిద్దుకునే చర్యలు చేపట్టకుంటే ప్రభుత్వానికి ఇబ్బందే !   

వాజ్ పేయి అసమర్ధుడు కాదు....మానవాతావాది

  గతంలో పుల్వామాలో సైనికుల మీద పాక్ లో తలదాచుకున్న ఉగ్రవాద సంస్థ దాడికి ప్రతీకారంగా పాకిస్తాన్‌లోని బాలాకోట్‌ ఉగ్రవాద స్థావరాలపై భారత్ జరిపిన దాడుల గురించి తెలిసిందే. ఈ దాడుల గురించి ఒక్కొక్కరూ ఒక్కో విధంగా చెబుతుంటారు. అసలు దాడులే జరగలేదని పాకిస్తాన్ చెప్పగా, భారత్ దాడులతో పెద్దగా నష్టం జరగలేదని అప్పట్లో అంతర్జాతీయ మీడియా కథనాలు ప్రసారం చేసింది. మరో వైపు బీజేపీ మాత్రం బాలాకోట్‌ లో మూడు వందల మంది ఉగ్రవాదులు మృతి చెందారని ప్రచారం చేసింది.   ఏది ఏమైనా జైషే మహమ్మద్ స్థావరంపై మెరుపు దాడులు చేయించటం ద్వారా ప్రధాని నరేంద్ర మోదీ మన దేశ పరువుప్రతిష్టలను ఇనుమడింపజేశారని, ప్రపంచం దృష్టిలో మన గౌరవ మర్యాదలను మరింతగా పెంచారు. వ్యూహాత్మకంగా చేసిన వైమానిక దాడి ద్వారా పాకిస్తాన్‌కు బుద్ధి చెప్పారని విశ్లేషకులు మోడీని పొగిడారు. అలాగే పార్లమెంటుపై దాడి జరిగినప్పుడు కేంద్ర ప్రభుత్వం ధైర్యంతో వ్యవహరించలేదని, అప్పటి ప్రధాని అటల్ బిహారీ వాజపేయి పాకిస్తాన్‌ ని భయపెట్టలేక పోయారని విశ్లేషకుల వాదన. పాక్‌పై యుద్ధానికి సన్నద్ధం అన్నట్టుగా సైన్యాన్ని సరిహద్దులకు తరలించినా ఆ తరువాత ఎందుకో వాజపేయి వెనక్కి తగ్గారు. అమెరికా ఒత్తిడి వల్ల పాకిస్తాన్‌కు బుద్ధి చెప్పడంలో వెనుకంజ వేసినందుకు గాను వాజపేయి ప్రతిష్ట తగ్గిందని అప్పటి విశ్లేషకులు ఏవేవో చెబుతూ ఆయన ప్రతిష్ట దిగజార్చే వ్యాఖ్యలు, విశ్లేషణలు చేశారు. అయితే దీని వెనుక కారణం ఏమిటి అనేది ఇప్పుడు బయటకు వచ్చింది. నిజానికి 13 డిసెంబరు 2001లో పాకిస్థాన్ ప్రేరేపిత ఉగ్రవాద సంస్థ జైషే మహ్మద్ భారత పార్లమెంటుపై దాడికి పాల్పడింది.  దేశం మొత్తాన్ని పట్టి కుదిపివేసిన ఈ దాడి తర్వాత అప్పటి ప్రధాని వాజ్‌పేయి పాకిస్థాన్ ఆర్మీ ఆధ్వరంలో నడుస్తున్న ఉగ్ర స్థావరాలపై బాలాకోట్ తరహా వాయు దాడులు చేయాలని భావించారట. జైషేకు చెందిన ఐదుగురు ఉగ్రవాదులు పార్లమెంటుపై దాడికి దిగి తొమ్మిది మందిని చంపిన తర్వాత త్రివిధ దళాధిపతులు అప్పటి రక్షణ శాఖా మంత్రి జార్జ్ ఫెర్నాండెజ్‌ను, జాతీయ భద్రతా సలహాదారు బ్రజేశ్ మిశ్రాను కలిసి చర్చించారట. ఈ సమయంలోనే  పాకిస్థాన్‌కు బుద్ధి చెప్పాలని నిర్ణయించి పాక్ ఆక్రమిత కశ్మీర్‌లోని నియంత్రణ రేఖ వెంబడి పాక్ ఆర్మీ ఆధ్వర్యంలో నడుస్తున్న ఉగ్రవాద స్థావరాల మీద దాడులు చేయాలన్న నిర్ణయానికి వచ్చారట.  మిరేజ్-2000 ఫైటర్ జెట్స్‌తో ఈ దాడికి రూపకల్పన కూడా జరిగిందని అయితే భారత్ దాడులకు సిద్ధమయ్యే అవకాశం ఉందని ముందే గ్రహించిన పాకిస్థాన్ ఆర్మీ జైషే ఉగ్ర స్థావరాలను ఓ స్కూలు, మరో పెద్ద ఆసుపత్రి మధ్యలో ఏర్పాటు చేయడంతో ఈ దాడుల విషయంలో వెనక్కి తగ్గాల్సి వచ్చిందట. దాడి కారణంగా ఊహకు అందని నష్టం వాటిల్లే అవకాశం ఉండడంతో ఆ ఆలోచనను విరమించుకోవాల్సి వచ్చిందని, భారత ఆర్మీని ఆరునెలల పాటు బోర్డర్ లో ఉంచి కూడా వెనక్కి రప్పించడానికి అదే కారణం అన్నమాట.  అయితే అప్పుడు వెలుగులోకి రాని విషయాలను ఇప్పుడు వెలుగులోకి ఎలావచ్చాయంటే ఈ విషయాలను అన్నిటినీ ఏ ప్రైమ్‌ మినిస్టర్‌ టు రిమెంబర్‌: మెమరీస్‌ ఆఫ్‌ ఏ మిలటరీ చీఫ్‌ పేరుతో అప్పటి నౌకాదళాధిపతి సుశీల్‌ కుమార్‌ రాసిన పుస్తకంలో ఈ విషయాలు పేర్కొన్నారు. ఆ పుస్తకం శుక్రవారం విడుదలయింది. ఈ పుస్తకంలోనే ఆయన ఈ విషయాలు అన్నీ రాసుకొచ్చారు. నిజానికి అప్పట్లో రక్షణ, దేశ దౌత్యంకి సంబందించిన విషయాలు అన్నీ రహస్యంగా ఉంచేవారు. ఇప్పటిలా అప్పుడు మీడియా ప్రాబల్యం లేనందువలన ఇలాంటి విషయాలు వెలుగులోకి వచ్చేవి కావు, కానీ ఇవేమీ పట్టని విశ్లేషకులు ఒక సమర్ధ ప్రధానిని కూడా అసమర్ద ముద్ర వేసి ప్రచారం మాత్రం చేస్తారు. 

జగన్ నెల రోజుల పాలన.. హిట్టా? ఫట్టా?

  రాష్ట్ర విభజన తరువాత మొదటిసారి జరిగిన ఎన్నికల్లో టీడీపీ అధినేత చంద్రబాబుకి పట్టంకట్టిన ఏపీ ప్రజలు.. రెండోసారి వైసీపీ అధినేత వైఎస్ జగన్ కు పట్టంకట్టారు. జగన్ ఏపీ సీఎంగా మే 30 న ప్రమాణం స్వీకారం చేసారు. అంటే జగన్ సీఎంగా ప్రమాణం చేసి నెల రోజులు పూర్తయింది. మరి జగన్ మొదటి నెలరోజుల పాలన ఎలా ఉంది?. బాబుని కాదనుకొని ఒక్క ఛాన్స్ ఇచ్చిన ఏపీ ప్రజల మనసు జగన్ గెలుచుకున్నారా? మొదటి నెలరోజుల పాలనలో బాబు కంటే మెరుగ్గా పాలించారా? వంటివి తెలుసుకునే ప్రయత్నం చేద్దాం. 2014 లో టీడీపీ అధికారంలోకి వచ్చినప్పుడు సీఎంగా బాబు ప్రమాణస్వీకారం చేయడానికన్నా ముందే.. కేంద్రాన్ని ఓ విషయంలో పట్టుబట్టారు. తెలంగాణలోని 7 పోలవరం ముంపు మండలాలను ఏపీలో కలిపితేనే సీఎంగా ప్రమాణం చేస్తానన్నారు. అనుకున్నది సాధించారు. పోలవరం ముంపు మండలాల విషయంలో విజయం సాధించిన బాబు.. సీఎం హోదాలో తొలి సంతకాలు చేసిన కొన్ని అంశాలపై మాత్రం పూర్తిగా విజయం సాధించలేకపోయారనే చెప్పాలి. సీఎంగా ప్రమాణం చేసిన బాబు అప్పుడు ఐదు ఫైళ్లపై సంతకాలు చేశారు. తొలి సంతకం.. రైతు రుణాలు, డ్వాక్రా రుణాలు, చేనేత రుణ మాఫీ ఫైలుపై సంతకం చేసారు. అయితే ఇవి ఐదేళ్లల్లో పూర్తిస్థాయిలో జరగలేదనే చెప్పాలి. రెండో సంతకం.. వృద్ధులు, వితంతువులకు రూ. 1000 పెన్షన్, వికలాంగులకు రూ. 1500 పెన్షన్ ఫైలుపై చేసారు. ఈ విషయంలో బాబు మాట నిలబెట్టుకున్నారు. అంతేకాదు తరువాత పెన్షన్ ని రెట్టింపు కూడా చేసారు. మూడో సంతకం.. అన్ని గ్రామాలకు తాగునీరు అందించే 'ఎన్టీఆర్ సుజల స్రవంతి' పథకం ఫైలుపై చేసారు. రూ.2 కే 20 లీటర్ల మినరల్ వాటర్ అందించాలనే ఉద్దేశంతో ఈ పథకానికి శ్రీకారం చుట్టారు. కానీ ఈ పథకం పూర్తిస్థాయిలో ఆచరణ సాధ్యం కాలేదు. నాలుగో సంతకం.. బెల్టు షాపుల రద్దు ఫైలుపై చేసారు. ఈ విషయంలో బాబు విఫలమయ్యారనే చెప్పాలి. ఇక ఐదో సంతకం.. ఉద్యోగులకు రిటైర్మెంట్ వయస్సు 58 నుంచి 60 ఏళ్లకు పెంచే ఫైలుపై సంతకం చేశారు. ఈ విషయంలో బాబు మాట నిలబెట్టుకున్నారు. బాబు ఐదేళ్ల పాలన చూసాం కాబట్టి తొలి ఐదు సంతకాల అంశాలు నెరవేర్చారో లేదో ఓ స్పష్టత ఉంది. అయితే జగన్ సీఎంగా బాధ్యతలు తీసుకొని నెలరోజులే అవుతుంది కాబట్టి.. ఈ నెల రోజుల్లో ఆయన తీసుకున్న నిర్ణయాలు, చర్యలు గురించి ప్రధానంగా చర్చిద్దాం.  సీఎంగా ప్రమాణం చేసిన జగన్.. రూ.2000 ఉన్న పెన్షన్ ను రూ.2250 కు పెంచుతూ తొలి సంతకం చేసారు. అయితే ఈ విషయంలో జగన్ కాస్త విమర్శలు ఎదుర్కొన్నారు. ఎందుకంటే వైసీపీ మేనిఫెస్టోలో పెన్షన్ రూ.3000 లకు పెంచుకుంటూ పోతామని క్లియర్ గా రాసినప్పటికీ, ఎన్నికల ప్రచారంలో మాత్రం పెన్షన్ రూ.3000 చేస్తామని పదేపదే చెప్పారు. దీంతో ప్రజలు జగన్ సీఎం కాగానే పెన్షన్ రూ.3000 చేస్తారనుకున్నారు. తీరా సీఎం అయ్యాక మేనిఫెస్టోలో రాసినట్టే పెంచుకుంటూ పోతామని సంతకం చేసారు. దీంతో కాస్త విమర్శలు ఎదురయ్యాయి. జగన్ తన మంత్రివర్గంలో అన్ని సామజిక వర్గాలకు ప్రాధాన్యం ఇవ్వడంతో ప్రశంసలు అందుకున్నారు. ఎస్సీ, ఎస్టీ, బీసీ, మైనార్టీలకు మంత్రివర్గంలో 50 శాతం చోటు కల్పించారు. దళిత మహిళను హోంమంత్రిగా నియమించారు. ఇక అమ్మఒడి పథకంపై కొన్ని విమర్శలు ఎదురైనప్పటికి జగన్ కి ఈ విషయంలో మంచి మార్కులు పడ్డాయనే చెప్పాలి. పాఠశాలకు కి పిల్లల్ని పంపే ప్రతి తల్లికి ఏడాదికి రూ.15 వేలు ఇస్తామని జగన్ ప్రకటించారు. అయితే ఈ పథకం కేవలం ప్రభుత్వ పాఠశాలలకే వర్తిస్తుందని కొందరు నేతలు చెప్పడంతో.. పెన్షన్ లో మెలిక పెట్టినట్టే ఈ పథకంలో కూడా మెలిక పెట్టారంటూ విమర్శలు వచ్చాయి. దీంతో తరువాత మళ్ళీ ఏ పాఠశాలలో చదివినా వర్తిస్తుందని నేతలు చెప్పుకొచ్చారు. అయితే విశ్లేషకులు మాత్రం ఈ పథకాన్ని  ప్రభుత్వ పాఠశాలలకే పరిమితం చేయడం కూడా మంచిదని అభిప్రాయపడుతున్నారు. ఎందుకంటే జగన్  ప్రభుత్వ పాఠశాలలను ప్రక్షాళన చేస్తానని, రెండేళ్లలో వాటి రూపు రేఖలే మారిపోతాయని చెప్తున్నారు. అందుకే ఆ పథకాన్ని ప్రభుత్వ పాఠశాలలకే పరిమితం చేస్తే.. ప్రభుత్వ పాఠశాలల్లో విద్యార్థుల సంఖ్య పెరిగే అవకాశముందనేది విశ్లేషకుల భావన. అంతేకాదు ప్రైవేట్ పాఠశాలల్లో చదివిన వారికి కూడా పథకం వర్తిస్తే.. బడ్జెట్ మరింత భారమవుతుందని అభిప్రాయపడుతున్నారు. మరి ఈ విషయంలో జగన్ ఎలాంటి నిర్ణయం తీసుకుంటారో చూడాలి. అదేవిధంగా పార్టీ ఫిరాయింపుల విషయంలో జగన్ తీసుకున్న నిర్ణయం అభినందనీయం. ఫిరాయింపులను ప్రోత్సహించనని, ఒకవేళ ఇతర పార్టీ ఎమ్మెల్యేలు తమ పార్టీలో చేరాలనుకుంటే.. కచ్చితంగా రాజీనామా చేసి రావాల్సిందేనని అసెంబ్లీ సాక్షిగా ప్రకటించి.. ప్రశంసలు అందుకున్నారు. ఇక ఈ నెల రోజుల్లో జగన్ ని బాగా ఇబ్బంది పెట్టిన అంశం ఏదైనా ఉందా అంటే ప్రత్యేకహోదా అనే చెప్పాలి. జగన్ హోదా విషయంలో మొదటి నుంచి దృఢ నిశ్చయంతో ఉన్నారు. హోదా వచ్చే వరకు పోరాడతామని చెబుతూ వస్తున్నారు. అయితే సీఎం అయ్యాక మాత్రం కేంద్రంలో బీజేపీకి పూర్తీ మెజారిటీ ఉందని, బ్రతిమాలడం తప్ప గట్టిగా అడగలేం అన్నట్టుగా మాట్లాడారు. దీనికి తోడు బీజేపీ హోదా ఇచ్చేది లేదని తేల్చి చెప్పింది. దీంతో జగన్ హోదా విషయంలో ఎలాంటి అడుగులు వేస్తారోనన్న ఆసక్తి నెలకొంది. అవినీతిరహిత పాలన అందించడమే తమ ప్రధాన లక్ష్యమని చెబుతున్న జగన్.. గత ప్రభుత్వ అవినీతిపై కేబినెట్ సబ్ కమిటీని కూడా వేశారు. అంతేకాదు అక్రమ కట్టడాలపై చర్యలు అంటూ.. ఏకంగా గత ప్రభుత్వం నిర్మించిన ప్రజావేదికనే కూల్చేసి సంచలం సృష్టించారు. అయితే ఈ విషయంపై భిన్నాభిప్రాయాలు వ్యక్తమయ్యాయి. కొందరు ప్రజాధనాన్ని వృథా చేసారని విమర్శించారు. అయితే కొందరు మాత్రం.. 'మార్పు మననుంచే మొదలు కావాలి అంటారు. అందుకే జగన్ మొదట ప్రభుత్వ అక్రమ కట్టడాన్ని కూల్చేసి, తరువాత మిగతా అక్రమ కట్టడాలపై దృష్టి పెట్టారు.' అంటున్నారు. అదేవిధంగా తెలంగాణ సీఎం కేసీఆర్ తో జగన్ సన్నిహితంగా ఉంటూ.. నీళ్ల పంపకం, విభజన సమస్యలు పరిష్కారానికి అడుగులు వేస్తున్నారు. మరి ముందు ముందు జగన్ ఎలాంటి నిర్ణయాలు తీసుకుంటారో, ఎలాంటి అడుగులు వేస్తారో చూడాలి.

జమిలీ వెనుక మెయిన్ రీజన్...మోడీ ఏజ్ ఫ్యాక్టర్ ?

మోడీ రెండో సారి అధికారం చేపట్టిన తర్వాత ఒక అఖిలపక్ష భేటీ ఏర్పాటు చేసి పార్లమెంట్‌లో ప్రాతినిధ్యం ఉన్న ప్రతీ పార్టీ అధ్యక్షుడ్ని ఆహ్వానించారు. మొత్తం ఐదు అంశాలు ఎజెండాగా చెప్పినప్పటికీ అసలు విషయం మాత్రం జమిలీ ఎన్నికలు అనేది అప్పటికే అందరికీ అర్ధం అయ్యే ఉంటుంది.  ఒకే దేశం - ఒకే ఎన్నికలు అనే నినాదాన్ని భాజపా చాలా కాలంగా వినిపిస్తోంది. వాస్తవానికి జమిలి ఎన్నికలు నిర్వహణ మీద గతంలోనూ బిజెపి పాలనలోనే న్యాయశాఖ 1999లో జమిలికి జై కొట్టగా 2015లో పార్లమెంటు స్థాయి కమిటీ కూడా జమిలికి మద్దతుగా ఎన్నికల సంఘానికి ప్రతిపాదనలు పంపింది.  మొన్నటి సార్వత్రిక ఎన్నికల్లో సగానికి సగం రాష్ట్రాల్లో అసెంబ్లీ ఎన్నికలు కూడా జరిపేసిజమిలీ ఎన్నికలు నిర్వహించాలని అనుకున్నారు. అందు కోసం సాధ్యాసాధ్యాల పరిశీలనకు లా కమిషన్‌ను కూడా నియమించారు. ఆ కమిషన్ అన్ని పార్టీల దగ్గర్నుంచి అభిప్రాయాలు తీసుకుంది. జమిలీ ఎన్నికలు నిర్వహిస్తే  ఎదురయ్యే సవాళ్లు అధిగమించాల్సిన మార్గాలతో నివేదిక సిద్ధం చేసింది. కానీ అప్పటి రాజకీయ పరిస్థితుల్లో బీజేపీని వ్యతిరేకించే ప్రతీ పార్టీ జమిలీ ఎన్నికలను అంగీకరించలేదు. అందుకే జమిలీ లేకుండానే మొన్నటి ఎన్నికలు అయిపోయాయి.  అయితే గతంలో జమిలీ ప్రతిపాదన వచ్చినప్పుడు లా కమిషన్ ముందు. కాంగ్రెస్, సమాజ్ వాదీ పార్టీ , టీడీపీ, బీఎస్పీ సహా పలు పార్టీలు అభ్యంతరం వ్యక్తం చేశాయి. కానీ ఇప్పుడు కొన్ని పార్టీలు జమిలీ ఎన్నికలను స్వాగతించక తప్పని పరిస్థితి ఉందన్న అభిప్రాయం వ్యక్తమవుతోంది. ఎన్నికలకు ముందు వైసీపీ అధినేత జగన్, టీఆర్ఎస్ అధినేత కేసీఆర్ జమిలీ ఎన్నికలకు సంపూర్ణ మద్దతు ప్రకటించారు. లా కమిషన్‌కు లిఖితపూర్వకంగా ఈ విషయాన్ని తెలియజేశారు.  అయితే ఇక్కడ అసలు విషయం ఇప్పుడు బయటకి వస్తోంది. జమిలీ ఎన్నికలు నిర్వహించడానికి మూడేళ్లలో కసరత్తు పూర్తి చేసి రెండేళ్ల ముందే దేశవ్యాప్తంగా జమిలీ ఎన్నికలు నిర్వహించే అవకాశం ఉందని చెబుతున్నారు.  అంటే 2022లో జమిలీ ఎన్నికలు పెట్టొచ్చు. ఆ ఏడాది దాదాపుగా ఎనిమిది రాష్ట్రాలకు అసెంబ్లీ ఎన్నికలు జరగాల్సి ఉంది. ఆ తర్వాత ఏడాది మరో ఐదు రాష్ట్రాలకు జరగాల్సి ఉంది. 2021లో నాలుగు రాష్ట్రాలకు అసెంబ్లీ ఎన్నికలు జరగాల్సి ఉంది. అయితే వీటన్నింటినీ కలిపేసి.. 2022లో పెట్టడానికి.. బీజేపీ అంతర్గత కసరత్తు చేస్తోందని తాజా పరిణామాలతో స్పష్టమవుతోంది. జమిలీని పెడితే ఎలాంటి సమస్యలు వస్తాయన్న విషయాల మీద అనేక రకాలుగా పరిశీలన జరుపుతున్నారు అగ్రనేతలు. జమిలీ ఎన్నికలు నిర్వహించాలంటే కొన్ని రాష్ట్రప్రభుత్వాల కాలపరిమితి తగ్గించాలి లేదా పెంచాలి. అలా చేయాలంటే రాజ్యాంగ సవరణ అవసరం.  అందుకే ఆ ప్రయత్నాలకి ఇబ్బంది కలగకుండా రాజ్యసభ సభ్యులను తమ పార్టీలో చేర్చుకుంటున్నారని అంటున్నారు. మొత్తానికి రెండేళ్ల ముందే ఈ సారి ఎన్నికలు వచ్చినా ఆశ్చర్యరం లేదని విశ్లేషకులు అంటున్నారు. నిజానికి దీని వెనుక మోడీ బుర్ర ప్రధానం అని తెలుస్తోంది ! కానీ ఎందుకయ్యా అంటే, తాజాగా బీజేపీ పెద్దలు కొత్త రూల్ ఒకటి తెచ్చారంట. దాని ప్రకారం బీజేపీలో 75 ఏళ్ల పైబడిన ఎవరికీ టిక్కెట్లు ఇవ్వరట. అందుకే మొన్నటి ఎన్నికల్లో అద్వానీ, మురళీ మనోహర్ జోషి, సుష్మా లాంటి వాళ్ళని ఇళ్లకే పరిమితం చేశారు.  అయితే ఇప్పుడు ఇదే రూల్ మోడీ తలకు చుట్టుకునేలా ఉంది. అది ఎలా అంటే ప్రస్తుతం మోడీ వయసు 68, ఆయన లెక్క ప్రకరం మళ్ళీ పోటీ చేస్తే వచ్చే వయసు 73 ఏళ్ళు, అప్పటికి టికెట్ వచ్చినా ఆయనని ప్రధాని పదవి నుండి తప్పుకోమని ఆర్ఎస్ఎస్ అడిగే అవకాశం ఉంది. ఇప్పటికే గడ్కరీ లాంటి నేతలను లైన్ లోకి తెస్తున్న ఆ సంస్థ మళ్ళీ మోడీ అంటే ఇబ్బంది పెట్టచ్చు. అందుకే ఆ అవకాశం ఇవ్వకుండా   2022లో జమిలీ పెడితే ఇంకా నాలుగేళ్ళు ఉంటుందనే కారణంతో మోడీ మళ్ళీ ప్రధాని కావచ్చు. అలా మూడు సార్లు ప్రధానిగా పని చేసి అప్పుడు తప్పుకోవచ్చనేది ఆయన యోచనగా చెబుతున్నారు విశ్లేషకులు. అయితే ఇందులో నిజం ఎంతుందో తెలీదు కానీ ఒక్క మనిషి అధికారం కోసం ఇంత చేయడం దేనికి సంకేతమో మరి ? 

చంద్రబాబు భద్రత...అక్రమ కట్టడాలు...జగన్ కి తలనొప్పే !

  నిన్నమొన్నటి దాకా ఏపీలో ప్రజావేదిక హాట్ టాపిక్ గా నిలవగా ఇప్పుడు అందరి దృష్టీ చంద్రబాబు భద్రత మీద పడింది. దానికి ముఖ్య కారణం ఆయన భద్రత తగ్గించడమే. గత పదేళ్ళుగా  ఆయనకు ఒక ఏఎస్పీ, ఒక డీఎస్పీ, ముగ్గురు ఆర్‌ఐ బృందాలతో భద్రత ఉండేదని, ఇప్పుడు కేవలం ఒక షిఫ్టునకు ఇద్దరు కానిస్టేబుళ్లు మిగిలారని, కేవలం కక్షపూరితంగానే ఇలా చేశారనే వాదన వినిపిస్తోంది. గతంలో వైఎస్ మొదటి సారి ముఖ్యమంత్రి కాగానే చంద్రబాబుకు భదత్ర తగ్గించాలని నిర్ణయించి ఎన్‌ఎస్జీ భద్రత కూడా అవసరం లేదంటూ కేంద్రానికి లేఖ రాసారు. అయితే అప్పట్లో టీడీపీ పార్లమెంటరీ నేతగా ఉన్న ఎర్రన్నాయుడు అప్పటి ప్రధాని మన్మోహన్‌సింగ్‌ ను కలిసి ఆయనకు భద్రతా కల్పించాల్సిన విషయం మీద మాట్లాడితే మన్మోహన్‌ వెంటనే భద్రత పునరుద్ధరించడంమే కాక జడ్‌ ప్లస్‌, ఎన్‌ఎ్‌సజీ భదత్ర కల్పించారు.  కానీ జగన్ ఎన్ఎస్జీని ఏమీ చేయలేదు కానీ ఏపీ ప్రభుత్వం కల్పిస్తున్న భద్రతను కుదిస్తూ వస్తున్నారు. చివరికి ఇద్దరు కానిస్టేబుల్స్ ని ఉంచారు. అయితే ఈ విషయం మీద టీడీపీ నేతలు విమర్శలు చేస్తోంటే ఈ భద్రత తగ్గింపు అంశంపై రాష్ట్ర హోంమంత్రి మేకతోటి సుచరిత స్పందించారు. ఏ కేటగిరీ వ్యక్తులకు ఎంత భద్రత కల్పించాలనేది భద్రతా సమీక్ష కమిటీ నిర్ణయిస్తుందన్నారు. ఎవరూ కక్షపూరిత నిర్ణయం తీసుకోలేదని కొందరు కావాలనే రాజకీయం చేస్తున్నారని ఆమె మండిపడ్డారు. చంద్రబాబుకు చట్టపరిధిలోనే భద్రత కేటాయింపు జరుగుతుందని ఆమె స్పష్టం చేశారు. అయితే ఈ భద్రతా తగ్గింపు అనే అంశం మీద జాతీయ స్థాయిలో కూడా చర్చ జరుగుతోంది. మాజీ ప్రధాని మన్మోహన్‌సింగ్‌ కు కి కూడా మోడీ ప్రభుత్వం సిబ్బందిని తగ్గించింది.  నిజానికి చంద్రబాబుకు జెడ్ ప్లస్ కేటగిరీ, ఎన్ఎస్జీ కమాండోలతో రక్షణ కల్పించడానికి కారణం చంద్రబాబు మీద జరిగిన అలిపిరి హత్యాయత్నం. ఆ రోజున ముఖ్యమంత్రి హోదాలో బ్రహ్మోత్సవాలకు పట్టు వస్త్రాలను తీసుకువెళ్తున్న సమయంలో తిరుమల వెళ్లేముందు అలిపిరిలో ఈ బ్లాస్ట్ చేశారు మావోయిస్ట్ లు. దీంతో ఆనాటి నుండే ఆయనకు ఈ స్థాయి భద్రత కల్పిస్తూ వచ్చింది ప్రభుత్వం. అయితే వైఎస్ అప్పట్లో తగ్గించాలని చూసిన మన్మోహన్ దెబ్బకు వెనక్కి తగ్గారు, మన్మోహన్ ఉన్నంతవరకూ అంతెందుకు మోడీతో ఎన్ని ఇబ్బందులు వచ్చినా కూడా చంద్రబాబుకు భద్రతా తగ్గించలేదు కానీ జగన్ ముఖ్యమంత్రి అయిన నాటి నుండే ఈ భద్రతా తగ్గింపు స్పష్టంగా కనిపిస్తోంది. కక్షపూరితంగా చేయట్లేదని చెబుతున్నా అది స్పష్టంగా కనిపిస్తోంది. నిజానికి ఏపీ ప్రభుత్వం చేయడానికి ఎన్నో కార్యక్రమాలు పెండింగ్ లో ఉన్నాయి.  కానీ వాటి సంగతి పక్కన పెట్టి ముందుగా ఈ పని పడతా అన్నట్టు జగన్ చంద్రబాబుని తెలుగుదేశాన్ని, గతంలో ఆ ప్రభుత్వం చేసిన పనుల మీదే మెయిన్ ఫోకస్ పెట్టుకు కూర్చుంది. నిజానికి పోలవరం విషయంలో చంద్రబాబు సర్కార్ ని టార్గెట్ చేయచ్చని జగన్ భావించాడు. కానీ అలాంటి ఛాన్స్ ఇవ్వకుండా కేంద్రం చంద్రబాబు ప్రభుత్వం పంపిన అంచనాలను ఆమోదించింది. ఈ ఘటనతో మింగుడు పడనీ జగన్ ఏదో ఒక విధంగా బాబుని టార్గెట్ చేసే పనిలో ఉన్నాడు. అయితే ఈ విషయంలో టీడీపీ నేతల స్పందన ఎలా ఉన్నా చంద్రబాబు మాత్రం హుందాగా స్పందిస్తున్నారు. ప్రభుత్వానికి తన మీద కోపం ఉండి భద్రత తగ్గిస్తే తగ్గించనివ్వండని,  ప్రజలే నాకు రక్షకులు దేవుడు, ప్రజల ఆశీస్సుల వల్లే అలిపిరి దాడిలో మృత్యువు నుంచి బయటపడ్డానని, తనకు తన భద్రత సమస్య కాదనీ రాష్ట్రంలో సామాన్యుల భద్రత ముఖ్యం అంటూ చెబుతున్నారు.  రాష్ట్రంలో జరుగుతున్న దాడులు, అవాంఛనీయ పరిస్థితుల పట్ల హోం మంత్రి మేకతోటి సుచరిత స్పందిస్తున్న విధానం సరైంది కాదని చంద్రబాబు అభిప్రాయపడ్డారు.  మొన్నటికి మొన్న ఒంగోలులో జరిగిన రేప్ గురించి స్పందిస్తూ ఎన్నో జరుగుతుంటాయి, అంతమాత్రాన ప్రతిచోట ఉండి కాపలా కాయలేం కదా అని ఆవిడ చెప్పుకొచ్చారు. హోంమంత్రే అంటే ఇక సామాన్యుడికి దిక్కెవరని బాబు ప్రశ్నించారు. ఇలాంటి ఘర్షణ వాతావరనం సృష్టించి ఎప్పుడూ ఏదో ఒక విషయం మీద కొట్టుకుంటూ ఉంటే పెట్టుబడులకు అనుకూల వాతావరణం లేదనే భావనతో పరిశ్రమలు రావని, యువతకు ఉపాధి అవకాశాలు నిర్వీర్యమవుతాయని, శాంతిభద్రతల అంశమే పెట్టుబడుల్లో కీలకమని ఆయన అంటున్నారు. ఏపీ బ్రాండ్ ఇమేజ్ దెబ్బతింటే రాష్ట్ర అభివృద్ధికి తానుచేసిన కృషంతా బూడిదలో పోసిన పన్నీరే అవుతుందని ఆయన ఆవేదన వ్యక్తం చేస్తున్నారు.   అయితే ఇదంతా ఒక ఎత్తు అయితే రాజధాని ప్రాంత రైతులు ఆయనను కలిసేందుకు వచ్చి చేసిన వ్యాఖ్యలు మరో ఎత్తు. చంద్రబాబు మీద నమ్మకంతోనే తాము భూములు ఇచ్చామని ఇప్పుడు ఆయన ఇంటినే కూల్చే పరిస్థితి వస్తే వెలగపూడి, తుళ్లూరు, రావిపూడి గ్రామాల చుట్టుపక్కల ఆయన నివాసానికి స్థలాన్ని ఇచ్చేందుకు సిద్ధమని చెబుతున్నారు. మరి అజేయ కళ్ళం లాంటి సీనియర్ ఐఏఎస్ లను తన సలహాదారులుగా చేర్చుకున్న జగన్ ఇలా కక్షపూరితంగా వ్యవహరిస్తే జరిగే నష్టం గురించి వారితో చర్చించలేదా ? లేక వారు ఏదైనా సలహా ఇచ్చినా జగన్ పట్టించుకోవడం లేదా ? అనే ప్రశ్నలు ఉత్పన్నం అవుతున్నాయి.  ఎక్కడైనా కొత్తగా ఏర్పడిన ప్రభుత్వం ముందుగా ద్రుష్టి పెట్టేది రాష్ట్ర అభివృద్ధి మీద, కానీ జగన్ ప్రభుత్వం మాత్రం అక్రమం, అవినీతి అంటూ వేరేవాటి మీద ఎక్కువ ఫోకస్ చేస్తోంది. పాజిటివిటీ మీద పనులు చేసుకుంటూ వెళ్ళాల్సింది పోయి, నెగిటివిటీతో జరిగిన పనులను, ఇబ్బంది లేకున్నా అక్రమ కట్టడాల మీద చూపిస్తున్న జులుం ఖచ్చితంగా ఇబ్బంది పెట్టేదే, అది ఇప్పటికిప్పుడు ప్రభావం చూపకపోవచ్చు కానీ, జగన్ కి ఆ ప్రభావం ఖచ్చితంగా అర్ధం అయ్యే రోజు వస్తుందని విశ్లేషకులు అభిప్రాయపడుతున్నారు. 

ఒక పరాజయం 100 తప్పులు.. నంద్యాల వాపును బలుపుగా భావించారా?

  క్రికెట్ టోర్నమెంట్ లో.. లీగుల్లో, సెమీ ఫైనల్లో గెలిచాం కదా అని.. ఫైనల్లో అతి విశ్వాసంతో నిర్లక్ష్యంగా ఆడితే ఆ టీంకి ఓటమి ఎదురయ్యే అవకాశాలున్నాయి. సరిగ్గా టీడీపీ విషయంలో కూడా అలాంటి అతి విశ్వాసమే దెబ్బతీసింది అనిపిస్తోంది. టీడీపీ అధికారంలో ఉన్న సమయంలో.. ఆ ప్రభుత్వ పనితీరు మీద ప్రజల్లో ఎలాంటి అభిప్రాయం ఉందో తెలుసుకోవడానికి ఉప ఎన్నికలు, స్థానిక ఎన్నికలు రూపంలో చాలా తక్కువ అవకాశాలు వచ్చాయి. అలాంటి వాటిల్లో నంద్యాల ఉపఎన్నిక, కాకినాడ మున్సిపల్ చైర్ పర్సన్ ఎన్నిక ఉన్నాయి. ఆ రెండు ఎన్నికల్లోనూ టీడీపీ విజయం సాధించింది. కానీ ఆ విజయం ఎలా దక్కిందన్నదే ప్రశ్న.  ముఖ్యంగా నంద్యాల ఉప ఎన్నికల్లో గెలుపు కోసం టీడీపీ అన్ని దారులు తొక్కిందని ఆరోపణలు వచ్చాయి. ఆ ఎన్నికల్లో ధన ప్రవాహం ఓ రేంజ్ లో జరిగిందని బహిరంగ రహస్యం. అంటే ఆ ఎన్నికల ఫలితాన్ని బట్టి బాబు సర్కార్ పై ప్రజలు సంతృప్తితో ఉన్నారో లేదో అంచనా వేయలేం. ఇక కాకినాడ మున్సిపల్ ఎన్నిక కూడా అక్కడ స్థానిక నేతల పనితీరు మీద ఎక్కువ ఆధారపడి ఉంటుంది. దీనిని బట్టి కూడా బాబు సర్కార్ పై ప్రజల అభిప్రాయాన్ని అంచనా వేయడం కష్టం. కానీ టీడీపీ మాత్రం ఈ రెండు విజయాలతో.. 2019 ఎన్నికల్లో కూడా తమదే అధికారమని ధీమా వ్యక్తం చేసింది. ముఖ్యంగా నంద్యాల ఉపఎన్నికల ఫలితాన్ని చూసి మాకు తిరుగులేదని అతి విశ్వాసానికి పోయింది. అదే కొంపముంచింది. నంద్యాల ఉపఎన్నికలో ప్రజల నిజమైన నాడిని తెలుసుకోకుండా.. టీడీపీ రకరకాల దారులు తొక్కి గెలిచిందని ఆరోపణలు వచ్చాయి. దానికితోడు ఆ గెలుపుని చూసి ఇక మాకు తిరుగులేదని భ్రమల్లో తేలిపోయిందని అంటున్నారు.

జగన్ ప్లాన్ : ప్రజావేదిక మీద ఫోకస్....ప్రత్యేక హోదా మిస్సయ్యింది !

  గత మూడు రోజులుగా ఏపీలో వినిపిస్తున్న ఏకైక న్యూస్ ప్రజావేదిక. మీడియా ఫోకస్ మొత్తం ఆ ప్రజావేదిక కూల్చివేత, దాని మీద ప్రముఖుల స్పందన, పబ్లిక్ టాక్స్ పెడుతూ అదే ఏపీకి జీవన్మరణ సమస్యలాగా కలరింగ్ ఇచ్చింది. దాదపు ప్రజలు కూడా అన్ని విషయాలూ వదిలేసి రెండు వర్గాలుగా విడిపోయి మరీ ఈ విషయాన్ని ఒకరు ఖండిస్తుంటే మరొకరు సమర్దిస్తూ ఇదొక జీవన్మరణ సమస్యలా చేస్తూ వెళ్ళారు. ఏపీ ప్రజల్లో ఇంతగా ఈ విషయం హైలైట్ కావాడానికి కారణం మీడియా అని చెప్పక తప్పదు. అయితే ఈ విషయం మీడియాలో ఇంతగా హైలైట్ కావడానికి కారణం ఏమిటా అని ఆరా తీస్తే అందుకు పలు ఆసక్తికర అంశాలను విశ్లేషకులు విశ్లేషిస్తున్నారు.  ఏపీలో నూతనంగా పాలనా పగ్గాలు చేపట్టి పారదర్శక పాలన అందించే దిశగా అడుగులు వేస్తున్న జగన్ ప్రత్యేక హోదా సాధిస్తారనే భావన ఏపీ ప్రజల్లో ఎర్పడుతూ వచ్చింది. దానికి కారణం ఆయన బీజేపీ అలాగే తెలంగాణా రాష్ట్రంతో వ్యవహరిస్తున్న వైఖరి అనే చెప్పొచ్చు. నిజానికి అధికారంలోకి వచ్చే ముందు వైఎస్ జగన్ ఇచ్చిన హామీల్లో ప్రధానమైనది కూడా ప్రత్యేక హోదానే. ఎలాగైనా ఏపీకి హోదా సాధించి తీరుతామని కేంద్రంలో ఎవరు ప్రత్యేక హోదా ఇస్తే వారికి మద్దతు ఇస్తామని చెబుతూ వచ్చింది. ప్రత్యేక హోదా ఇస్తానంటే కూడా ప్రస్తుత పరిస్థితుల్లో బీజేపీకి టీడీపీ మద్దతు ఇచ్చే అవకాశమే లేదని ప్రత్యేక హోదా ఇవ్వాలంటే అది కేవలం వైసీపీ వలనే సాధ్యమని వైకాపా నేతలు ఎన్నికల ముందు గట్టిగా చెప్పారు.  జనం సైతం వారి మాటల్ని నమ్మి ఓట్లు వేసి గెలిపించారు. కానీ గెలిచిన మరునాడే కేంద్రానికి పరిపూర్ణ బలం ఉంది కాబట్టి ఆ విషయంలో గట్టిగా మాట్లాడలేమని జగన్ వ్యాఖ్యలు చేశారు. బీజేపీకి ఇన్ని సీట్లు రాకుండా ఉండాల్సింది అని ఆయన వ్యాఖ్యలు చేశారు . కానీ ప్రత్యేక హోదా సాధనే తమ లక్ష్యం అని పేర్కొన్నారు. దాని కోసం ప్రయత్నం చేస్తున్న జగన్ కు కేంద్రం ఝలక్ ఇస్తూ సరిగ్గా నాలుగు రోజుల క్రితమే హోదాపై కేంద్ర ప్రభుత్వం మరోసారి తన వైఖరి వెల్లడించింది. ‘హోదా ఇచ్చేది లేదు’ అని కేంద్రం తేల్చి చెప్పింది. లోక్‌సభలో జేడీయూ ఎంపీ కౌశలేంద్ర కుమార్‌ అడిగిన ఓ ప్రశ్నకు జగన్ ప్రజావేదిక లో కలెక్టర్ ల సదస్సు ఏర్పాటు చేసిన రోజే కేంద్ర ఆర్థిక మంత్రి నిర్మలా సీతారామన్‌ లిఖితపూర్వక సమాధానమిచ్చారు.  ఆంధ్రప్రదేశ్‌తోపాటు తెలంగాణ, ఒడిసా, రాజస్థాన్‌, బిహార్‌, జార్ఖండ్‌, ఛత్తీస్‌గఢ్‌ల నుంచీ ప్రత్యేక హోదా డిమాండ్లు వచ్చాయి. అయితే, ఏ రాష్ట్రానికీ ప్రత్యేక హోదా ఇచ్చే ప్రతిపాదనలు కేంద్ర ప్రభుత్వం పరిశీలనలో లేవని నిర్మలా సీతారామన్‌ చెప్పారు. నిజానికి గతంలో ప్రణాళిక సహకారంలో భాగంగా ఆయా ప్రమాణాలను పరిగణనలోకి తీసుకుని రాష్ట్రాలకు జాతీయ అభివృద్ధి మండలి ప్రత్యేక హోదా ఇచ్చేది. కొండ ప్రాంతాలు, తక్కువ జన సాంద్రత, ఎక్కువ గిరిజన జనాభా, పొరుగు దేశాలతో సరిహద్దు పంచుకున్న ప్రాంతాలు, ఆర్థిక, మౌలిక సదుపాయాల వెనుకబాటు, వంటి అంశాలను పరిగణలోకి తీసుకుని హోదా ఇచ్చేవారు.  కానీ ప్రత్యేక హోదాలో పారిశ్రామిక వృద్ధికి నిర్దిష్ట చర్యలేమీ లేవని ఆమె తన సమాధానంలో వివరించారు. ఈ విషయం మీడియాలోకి రాక ముందే జాగ్రత్త పడిన జగన్ జాగ్రత్త పడ్డారు, వెంటనే ఈ ప్రజావేదికని కూల్చివేస్తున్నామని ఆయన అప్పటికప్పుడు ప్రకటించారు. ఇక అప్పటికే పెద్దగా న్యూస్ లేక కరువులో ఉన్న తెలుగు మీడియాకి ఈ సమస్య పెద్ద బంగారు బాతులా కనపడి ఉండచ్చు, దీంతో వెంటనే పబ్లిక్ పల్స్ లూ, సెలెబ్రిటీ బైట్స్ అంటూ సినిమా కోసం ప్రమోషన్స్ చేసినట్టు ఈ ప్రజావేదిక విషయంలో కాన్సంట్రేట్ చేశారు. అంటే ఒక రకంగా జగన్ చేసిన చిన్న డీవిఏషన్ కి మీడియా పడిపోయింది. మరి తెలిసి అలా చేసిందో తెలియక అలా చేసిందో కానీ మొత్తానికి ఆ విషయాన్ని పక్కన పెట్టేసేలా వ్యవహరించింది. ఇక ఈ విషయం మీద మాట్లాడిన బీజేపీ నాయకురాలు పురందేశ్వరి  ప్రత్యేక హోదా ముగిసిపోయిన అధ్యాయమని అన్నారు. ఏపీకి ప్రత్యేక ప్యాకేజీ ఇచ్చేందుకు కేంద్ర ప్రభుత్వం కట్టుబడి ఉందని ప్రత్యేక హోదా పేరుతో ప్రజలను ముఖ్యమంత్రి జగన్ పక్కదోవ పట్టించరాదని హితవు పలికారు. నిజానికి ఆయన అప్పటికే పక్క దోవ పట్టించేశారు. ఈవిడకే కాస్త ఆలస్యంగా అర్ధం అయినట్టుంది.

ఒక పరాజయం 100 తప్పులు.. పుష్కరాల 'అతి' ఈ 'గతి' కి కారణమా?

  పుష్కరాల 'అతి' టీడీపీకి ఈ 'గతి' పట్టడానికి ఓ కారణమా? అంటే అవుననే అభిప్రాయం వ్యక్తమవుతోంది. గత టీడీపీ ప్రభుత్వ హయాంలో కృష్ణ, గోదావరి రెండు పుష్కరాలు వచ్చాయి. భక్తితో చేయాల్సిన పుష్కరాలను వేల కోట్లు ఖర్చు పెట్టి భారీగా చేసి.. విమర్శలు పాలయ్యారు. అసలే కొత్తగా ఏర్పడిన రాష్ట్రం. రాజధాని లేదు, ప్రాజెక్ట్ లు నిర్మాణం జరగాలి, లోటు బడ్జెట్. ఇవన్నీ తెలిసి కూడా దశాబ్దాల అనుభవమున్న బాబు.. పుష్కరాల పేరుతో వేలకోట్లు వృథా చేసారు. పోనీ అంత ఖర్చు పెట్టి పుష్కారాల ఏర్పాట్లు అయినా సరిగ్గా చేసారా అంటే అదీ లేదు. విపరీతమైన ప్రచారం చేసుకున్నారు కానీ, పుష్కర ఘాట్లు సరిగ్గా ఏర్పాటు చేయలేకపోయారు. అప్పటికప్పుడు నామినేషన్ల పద్దతిలో టెండర్లు ఇచ్చారు. వారు డబ్బులు తిని అరకొర ఏర్పాట్లు చేసారు. దీంతో ప్రజలు ఎన్నో ఇబ్బందులు పడ్డారు. వీటికితోడు పుష్కారాలను సినీ దర్శకుడితో షూట్ చేపించారు. అలాంటి వాటి వల్ల ప్రజాధనం వృధా అయింది కానీ ప్రజలకు ఒరిగిందేమీ లేదు. అంతేకాదు, పుష్కారాల సమయంలో దివ్యమైన ముహూర్తం అంటూ ఒక సమయాన్ని ప్రచారం చేసారు. దీంతో ప్రజలందరూ అదే సమయంలో పుష్కర స్నానం చేయడానికి ఉత్సాహం చూపించారు. చివరికి సీఎం గా ఉన్న బాబు కూడా.. సకుటుంబ సమేతంగా అదే సమయానికి పుష్కర స్నానం చేసారు. ఆ ముహూర్తం పుణ్యమా అని తొక్కిసలాట జరిగి పదుల సంఖ్యలో ప్రజలు ప్రాణాలు కోల్పోయారు. పుష్కరాల పేరుతో ప్రజల ప్రాణాలతో చెలగాటమాడారంటూ టీడీపీ ప్రభుత్వం మీద అప్పుడే తీవ్ర విమర్శలు వచ్చాయి. ఇలా పుష్కరాల పేరుతో ఓ వైపు కోట్ల రూపాయల ప్రజాధనం వృథా, మరోవైపు ప్రజల ప్రాణాలతో చెలగాటం.. దీంతో టీడీపీ మీద ప్రజల్లో తీవ్ర వ్యతిరేకత ఏర్పడింది. ఆ వ్యతిరేకత ఓటమికి దారి తీసింది.