తెలంగాణ పర్యాటక శాఖలో నెలకొన్న బ్రాండ్ అంబాసిడర్  వివాదం మరింత ముదురుతోంది. తెలంగాణ పర్యాటక శాఖ ప్రచారకర్తగా నియామకం అయిన తర్వాత తన చుట్టూ రగులుకున్న వివాదంపై యూట్యూబ్ స్టార్ దేత్తడి హారిక తీవ్ర మనస్తాపం చెందినట్టు కనిపిస్తోంది. దీంతో తనకు అలాంటి పదవులేమీ వద్దని, మునుపటిలా తన పనేదో తాను చేసుకుంటానంటూ ట్విట్టర్ ద్వారా హారిక వెల్లడించింది.

మహిళా దినోత్సవం రోజున తనను తెలంగాణ టూరిజం శాఖ బ్రాండ్ అంబాసిడర్‌గా నియమించిన దగ్గరి నుంచి ఏం జరిగిందో మీ అందరికీ తెలుసని, కొన్ని కారణాలతో ఆ పదవి నుంచి తప్పుకుంటున్నట్టు హారిక పేర్కొంది. ఈ విషయంలో తనకు మద్దతు తెలిపిన వారందరికీ కృతజ్ఞతలు తెలిపిన హారిక.. ఎవరినైనా బాధపెట్టి ఉంటే క్షమించాలని బిగ్ బాస్ ఫేం వేడుకుంది.

హారికను పర్యాటకశాఖ ప్రచారకర్తగా నియమించినప్పటి నుంచి వివాదం మొదలైంది. ప్రభుత్వానికి, ఆ శాఖ మంత్రికి ఎలాంటి సమాచారం లేకుండానే ఆమెను పదవిలో నియమించారన్న ప్రచారం జరిగింది. ఆమె నియామకంపై పర్యాటకశాఖ మంత్రి శ్రీనివాస్‌గౌడ్ ఆగ్రహం వ్యక్తం చేసినట్టు 
తెలిసింది. హారిక ఎవరో తనకు తెలియదని, ఆమెను నియమించిన వారిపై కఠిన చర్యలు తీసుకుంటామని హెచ్చరించారు. అంతేకాదు, త్వరలోనే మరో సెలబ్రిటీని బ్రాండ్ అంబాసిడర్‌గా 
నియమిస్తామని మంత్రి చెప్పుకొచ్చారు.