చావులేని చారుశీలికి1

విద్యుత్తులు ప్రవహించే నీ నరాల్తో
విప్లవం శాలువ అల్లినవాడా
తెల్లభయాని2 కెదురుగుండా
ఎర్ర బీభత్సం జల్లినవాడా

ఉడుకు నెత్తురుప్పోంగే యువతీ యువకుల్నీ
అడవుల్లోకి పంపించినవాడా
అడవుల్లోంచి మైదానాల్లోకి
ఆనందం దింపించినవాడా

ఆలోచనల్ని ఘాటెక్కించి
ఆచరణగా మార్పించినవాడా
అన్యాయాల్ని బోనెక్కించి
ఆయుధానికి అఆలు నేర్పించినవాడా

భ్రమకి డమరుకం కొట్టి
శ్రమకి బొమిడికం పెట్టి
జులుం పని పట్టించినవాడా
హజం ఆట' కట్టించినవాడా

జనం బలం అనే నిస్త్రింశంలో
ధనం వ్రణం శాస్త్రించిన వాడా
డియర్ కామ్రేడ్ చారుమజుందార్
అందుకో మా అందరి జోహార్

                                                                               రచన : 26 - 7 - 1973
                                             ముద్రణ : మరో ప్రస్థానం , విరసం ప్రచురణ - మే, 1980.

1. చారుమజుందార్.
2. తెల్లభయం : ప్రభుత్వ దమనకాండని ఇంగ్లీషులో వైట్ టెర్రర్ అంటారు. దీన్ని శ్రీశ్రీ తెల్ల భయంగా తెనిగించారు.