శ్రీ నారాయణాచార్యులు, పుట్టపర్తి

    'కదనమందున ధర్మము దేలిపోవలెన్'

    తమవారన్న విమోహలేశము మదిన్
        దట్టాడి, సుక్షత్ర ధ
    ర్మము నెగ్గించిన వాసవాత్మజుని యు
        న్మాదంబు బోకార్చి, యు
    ద్ధము సాధించిన పుణ్యపూరుషుడు గీ
        తాచార్యు డీనాడు, చ
    క్రమునున్ దానుగ నౌచు మాకెలన సా
        క్షాత్కారమున్ జెందుతన్.

    పారమ్యంబులు ధర్మబోధలకు 'నీ
        ఫా' ప్రాంత నిర్వాణ బౌ
    ద్ధారామంబులు, శాత్రవాసుర మహా
        హంకార హుంకార ధా
    రారీఢంబులు, వీరభారత కుమా
        రా! ధర్మ చక్రంబు, నీ
    పారంపర్యము, దూకవన్న విమత
        ప్రారంభ దావాగ్నివై.

    జవహరు పండితుండు, నర
        జాతికి మౌళి విభూషణంబు, తత్
    ప్రవిమల శాంతి వాదము ని
        రాదృతి జేసి, వివేక మూఢులై
    భువన భయంకరంబయిన
        పోటున కొగ్గిన వారి దీర్చుటే
    సవనము, తద్విధా పరులు,
        జచ్చియు నిల్తురు కీర్తి కాయులై.

    అంగదలెత్తి ధర్మమున
        కాతుహినాద్రులు "ఫాహియాన్" "హియాన్
    సాంగులు" దాటివచ్చి; మన
        సన్నిధి గొల్చిరి; వేల యేండ్ల స
    త్సంగతి దుమ్ములోఁ గలిపి,
        దానవులైఁ బడవచ్చు నీచులన్
    భంగము సేయకే నిదుర
        వచ్చునె! దుర్దమ మార్య జాతికిన్.

    ప్రాణపదమ్ము మాకు హిమ
        వంతము; మా కథలెల్ల తద్యశ
    స్నాన పునీతముల్: విమత
        సైన్య పదార్పణ కిచ్చగింతుమే
    మానము పోవనింక కసు
        మాలపు జీవనమేమి శాంతిసం
    ధానము సాగిరాదు కద
        నంబున ధర్మమూ దేలిపోవలెన్.

                                                                  *  *  *  *