శ్రీ నారాయణరెడ్డి, సి.

    క్రొవ్వెక్కిన చైనా

    వెన్నవంటి భరతజాతి
    వెన్నున నిప్పంటించిన
    దెవ్వరు? నువ్వేనా!
    క్రొవ్వెక్కిన చైనా!

    ఎదరొమ్మున బాకు రువ్వి
    యే మెరుగనిలా దిక్కులు
    చూచు నంగనాచీ!
    ఛీఛీ విషవీచీ!

    నమ్ముకొన్న నేస్తకాని
    నాడులు తెగనరుక నెంచు
    క్రవ్యాదుడ వీవు; గోము
    ఖవ్యాఘ్రం నీవు!

    సామ్యవాద మను పేరిట
    సామ్రాజ్య పిపాసదీర్చ
    నెంచు కుటిలజాతీ!
    ఇదా రాజనీతి?

    సరిహద్దుల తగాదాల
    బురఖాలో ద్వేషవిషం
    బుసకొట్టెనులేరా! నిను
    పసికడితిమి పోరా!

    ప్రక్కయింటి ద్వారానికి
    పచ్చతోరణాలు చూచి    
    కళ్ళుమండె నీకు; నీ
    కథ తెలిసెను మాకు.

    తిండికి సరిపోకుంటే
    తిరిపె మెత్తుకోనుంటివి;
    జనం పెరిగితే మిత్రుల
    శరణు వేడుకోనుంటివి.

    తోటి దేశమున చొరబడి
    దురంతాల కొడిగట్టే
    బూజుబుద్ధి తగదుర! చెం
    గీజుఖాను సోదరా!

    భాయీయని బుజముదట్టి
    చేయి చేయి కలిపినట్టి
    గడియ మరతువేమి? బుద్ధి
    గడ్డితిన్న దేమి?
    
    భరతజాతి సత్త్వమ్మును
    పరీక్షించబోకుము; అది
    సహనానికి ఏలిక! ఈ
    సమరానికి కాళిక!!

                                                                   *  *  *  *