13వ. సర్గ
    1.   "దశకంఠునింట - సీత యుండునని
            పక్షిరాజు సం | పాతి మాటవిని |
                              లంకాపురమున - ప్రతి అంగుళమును
                               పరిపరి విధముల - పరికించితిని |
            లంకేశ్వరుని - భవనములన్ని
            తిరిగి తిరిగి పలు | మారు వెదకితిని |"
                                   అని చింతించుచు - రాముని దలచుచు
                                    మారుతి సాగెను - సీతను వెదకుచు ....   ||శ్రీ||
    2.   "రాక్షస మాయకు - సీత లొంగెనో
            రావణాసురుని - వశమై యుండునో |
                                సవతి యగునని - రావణు సతులు
                                 సీతను ద్వేషించి - చంపి యుందురో |
          "హా రామా | హా - లక్షణా" యని
            కృంగి కృశించి వై | దేహి వోరిగెనో |"
                               అని చింతించుచు - రాముని దలచుచు
                                మారుతి సాగెను - సీతను వెదకుచు ....   ||శ్రీ||
    3.   "పంజరమందున - శారిక రీతిని
            లంకాపురమున - సీత యుండెనో |
                               అంధకార బం | ధురమౌ శాలల
                               సీత నిరాశతో - చెరలందుండేనో |
            రామ వియోగపు - దుఃఖ భారమున
            తనకు తానుగా - మరణమొందెనో |"
                              అని చింతించుచు - పుష్పకము వీడి
                              మారుతి చేరె ప్రా | కారము పైకి .....      ||శ్రీ||
    4.   "సీత జాడ కన | లేదను వార్తను
            తెలిపిన క్రూరం | లేకున్న ద్రోహం |
                                హృదయతాపకర - ఘోర భయంకర
                               దుర్వార్త విని - రాముడుండునా ?
            అన్నయే తన - సర్వమనుకొనే
            లక్ష్మణుడా పై - బ్రతికి యుండునా ?"
                                అని మారుతి వి | రుద్ధ భావనల
                                 కలతగ నిలచె | కన్నీటి ధారల ....    
    5.   "రామ లక్ష్మణులు | గతించిరనిన
            భరత శతృఘ్నులు - బ్రతుక జాలరు |
                                కౌసల్యా సు | మిత్రా కైకలు
                                పుత్ర శోకమున - మరణించెదరు |
            ఇంతటి ఘోరము - గాంచినంతనే
            సుగ్రీవాదులు - మడియక మానరు |"
                               అని మారుతి వి | రుద్ధ భావనల
                               కలతగ నిలచె | కన్నీటి ధారల ....    ||శ్రీ||
    6.   "అటుపై రుమ సు | గ్రీవు భార్యయు
            భర్త వియోగము | న అసువులుబాయు |
                              వాలి భార్య తార - ఒరిమి జార
                              బ్రతుకలేక పర | లోకము జేరు |
           అంగదుడాదిగ - వానరులందరు
           శోకాబ్ది మునిగి - మృతి జెందెదరు |"
                               అని మారుతి వి | రుద్ధ భావనల
                               కలతగ నిలచె | కన్నీటి ధారల ....    ||శ్రీ||
    7.   "ఇంత వినాశము - నావల్లనేను
            నే కిష్కింధకు - పోనే పోను
                            వాన ప్రస్తా | శ్రమవాసుడనై
                            నియమ విష్టలతో - బ్రతుకువాడనై
           సీతామాతను - చూచి తీరేదను
           లేకున్న నేను - అగ్ని దూకేదను |"
                            అని హనుమంతుడు - కృత నిశ్చయుడై
                            నలుదెసలగనె - సాహసవంతుడై .....   ||శ్రీ||
    8.   చూడమరచిన అ | శోక వనమును
           చూపుమేరలో - మారుతి గాంచెను |
                             సీతారామ - లక్ష్మణాదులకు
                             ఏకాదశ రు | ద్రాది దేవులకు
           ఇంద్రాది యమ - వాయు దేవులకు
           సూర్యచంద్ర మ | రుద్గణములకు |
                            వాయునందనుడు - వందనములిడి
                            అశోకవని - చేరెను వడి వడి .....      ||శ్రీ||
    9.    ఎల్లవేళల అ | శోక వనమున
            చల్లని గాలి - వీచెడు మెల్లన |
                           ఎటు చూచిన - రాక్షసవీరులు
                          కావలి యుందురు - రేయింబవలు |
            రామకార్యమును - నెరవేర్చుటకై
            రావణాదులు - చూడకుండుటకై |
                                వామన రూపము - మారుతి దాలిచి
                                వనమున సాగె - పెద్దల తలచి ....    ||శ్రీ||
                                     __: 13 వ. స. సంపూర్ణము :__