9. పురోనువాక్య. అగ్నీ! నీవు దుఃఖము కలిగించువాడవు. ఋత్విజులు భరించువాడవు. ఆహుతులందు వసించువాడవు.

    అగ్నీ! నీవు శ్రేష్ఠమును, దీప్తివంతము, అందరు ఆశించునదియు నగు ధనమును తీసికొనిరమ్ము.

    10. యాజ్య. అగ్ని శోధించువాడు. ఆహవనీయ, గార్హపత్యాది నామములు కలవాడు. యవిష్ఠాది విశేషములు కలవాడు. హవిస్సులు ఆరగించుచు, యజమాని గృహమున ఉండువాడు.

    అగ్ని ప్రకాశమానుడు. ఫలప్రదుడు. వెలుగులున్న చోట ఉండువాడు. జరారహితులగు దేవతలచే స్తుతించబడునాడు. వైరులకు దుఃఖము కలిగించుచున్నాడు.

    11. పురోనువాక్య శ్రేష్ఠుడగు అగ్ని నీకు సంపూర్ణ ఆయువు కలిగించును గాత. అపమృత్యువును నివారించును గాత. వ్యాధులను నశింపచేయును గాత.

    12. యాజ్య. అగ్నీ! నీవు హవిస్సులను సేవించువాడవు. ఘృతమే ప్రతీకగా కలవాడవు. ఘృతమే జన్మకారణమైనవాడవు. నీవు ఈ యజమానికి ఆయువును ప్రసాదించుము. నీవు రుచియై, నిర్మలమైన ఆజ్యమును సేవించుము. తండ్రి కొడుకును రక్షించినట్లు - ఈ యజమానిని కాపాడుము.

    13. పురోనువాక్యఅగ్నీ! నీవు ఎందరో యజమానులు కలవాడవు. పుట్టుకతోనే జ్ఞానివి. నిత్య యజమాని ఇంటికి వెళ్లువాడవు. నీ కొరకు - సుష్ణుతిమ్ జనామి - మంచి స్తోత్రమును కల్పించుచున్నాను.

    14. యాజ్య. అగ్ని తొలుత ద్యులోకమున సూర్యరూపమున అవతరించినాడు. తదుపరి మర్త్యలోకమున అగ్నిగా ఆవిర్భవించినాడు. మూడవసారి సముద్రమున బడబానల రూపమున అవతరించినాడు. అన్ని దిశలందును అగ్ని యజమానుల యందు అనుగ్రహము కలిగి ఉండును.

    యజమానీ! అట్టి అగ్నిని ఇంధనమున దీపింపచేయుము. స్వాయత్త చిత్తుడవై జరాపర్యంతము సేవించుము.

    15. పురోనువాక్యము. అగ్నీ! నీవు పావకుడవు. శుచివి. వందనీయుడవు ఆజ్యాదుల ఆహుతులచే ఎంతో ప్రకాశించుచున్నావు.

    16. యాజ్య. అగ్ని దర్శనీయుడు. కిరణ్మయుడు. అజేయుడు. ప్రాణములకు ఆశ్రయమైనవాడు. అతడు ఆ అగ్ని - మహాతేజస్సున ప్రజ్వరిల్లుచున్నాడు. ద్యులోకము నందలి దేవతలు సురేతస్కులగుచు అగ్నిని ఆవిర్భవింపచేసినారు. అందువలన ఈ అగ్ని హవిస్సుల వలన అమృతుడైనాడు.

    17. పురోనువాక్యము. అగ్ని ద్యులోకమున తోజోవంతుడై ఉన్నాడు. యజమానిని రక్షించువాడు అగుచున్నాడు. అగ్ని మాతాపితరుల బీజమందు ప్రవేశించుచున్నాడు. స్వాధీనచిత్తుడు - దోషరహితుడు, తరుణవయస్కుని పుట్టించుచున్నాడు. పాపములను నశింపచేయుచున్నాడు.

    18. యాజ్య. అగ్నీ! నీది అత్యంత తేజోవంతమనసు. నీవు దానిచే యజమానిని రక్షించినావు. సంతానవంతుడు, సమర్థుడు, మానవ శ్రేష్ఠుడగు యజమానికి ధనము కలిగించుము. నీ అధీనపు వారలమై మేము ధనవంతులము, స్తుతివంతులము అగుదుము గాత.

    19. పురోనువాక్యము. అగ్నీ! మాకు అన్నములు కలిగించుటకు శత్రుసేనలను చిత్తుచేసినావు. మాకీర్తిని కాదను శత్రువు ధనమును మాకు అందించుము.

    20. యాజ్య. అగ్నీ! నీవు బలశాలివి. పరసేనను తిరస్కరించునంతటి ధనమును కొనిరమ్ము. నీవు సత్యమవు. అద్భుతుడవు. నీవేకదా అన్నదాతవు!

    21. పురోనువాక్యము. అగ్ని యాగమునందు వృషభమును, వంధ్యగోవును హవిస్సుగా గ్రహించువాడు. సోమసహితస్తోత్రయుక్తుడు. అన్నము కలిగించువాడు. "స్తోమైర్విధేమాగ్నయే" అగ్నిని స్తోత్రములతో భజింతుము.

    22. యాజ్య. అగ్నీ! పుత్రుని వంటినీవు వాగ్దేవతా స్వరూపుడవు. నీవు అన్నకోశమునందు జఠరాగ్ని రూపమున ఉన్నావు. అట్లున్న వాడవై మాకొరకు అన్నమును, నివాసమును ఏర్పరచినావు.

    అగ్నీ! నీవు రసప్రదుడవు. మాకు రసమును ప్రసాదించుము. రాజువలె జయించుము. హింస ఎరుగని యజమాని అంతఃకరణమున వసించుము.

    23. పురోనువాక్యఅగ్నీ! మాకు ఆయువును కలిగించుము. పాలు, అన్నము మా ముందుకు పంపుము. ఉపద్రవములను దూరమందుననే బాధించుము. దరిచేరనీయకుము.

    24. యాజ్య. అగ్నీ! నీవు మంచి పనులవాడవు. మాయందు బ్రహ్మవర్చస్సును, సామర్థ్యమును పెంపొందించుము. నా యందు ధనమును, పుష్టిని చేర్చుము.

    25. పురోనువాక్యము. అగ్నీ! నీవు పాలకుడవు. ప్రకాశకుడవు. నీవాక్కు మధురము - దీప్తిమంతము. దానితో దేవతలను ఆవహింపుము. యోగమును సాగించుము.

     26. యాజ్య. అగ్నీ! నీవు పాలకుడవు. దీప్తుడవు. మాకొరకు దేవతలను ఈ యజ్ఞమునకు రప్పింపుము. ఈ యజ్ఞపు హవిస్సులను దేవతలకు అందించుము.

    27. పురోనువాక్యము. అగ్ని దాహక, పావక, పరిశుద్ధాచరణ కలవాడు. విప్రుడు. కవి. శుచి. ఆహుతులు అందుకొని మరింత కాంతివంతుడై వెలుగుచున్నాడు.

    28. యాజ్య అగ్నీ! నీకాంతులు నిర్మలములు. అవి వెలుగుచున్నవి. పైకి ఎగయుచున్నవి. నిన్ను భజించువారు జ్యోతిర్మూర్తులయిన దేవతాస్వరూపులు అగుచున్నారు.


           శ్రీమదాంధ్రవచన కృష్ణయజుర్వేదీయ తైత్తిరీయ సంహిత 
           మొదటి కాండమునందలి మూడవ ప్రపాఠకము సమాప్తము.