శివుడి పంచ బ్రహ్మా అవతారములు

 

శివుడి పంచ బ్రహ్మా అవతారములు

 

సాదారణంగా అందరి దేవుళ్ళకు ఎన్నో అవతారాలు ఉంటాయి. విష్ణువు దశావతారాలు ఎత్తినట్టు శివుడు కూడా పంచ బ్రహ్మావతారాలు ఎత్తాడు. అయితే వాటి గురించి తెలిసిన వాళ్ళు చాలా తక్కువ. ఆ అవతాలు ఏమిటంటే...

 శివుని యొక్క మొట్టమొదటి అవతారం పందొమ్మిదవ శ్వేత లోహిత కల్పంలో జరిగింది. అప్పట్లో బ్రహ్మ ధ్యానంలో వుండగా ఎరుపు- తెలుపు -నలుపు రంగులతో కలిసి ప్రకాశిస్తున్న కుమారుడుగా ఆవిర్భవించాడు శివుడు. ధ్యాన ఫలంగా అప్పటికప్పుడు పుట్టడం వల్ల ఆ అవతారాన్నే సద్యోజాత బ్రహ్మావతారం అన్నారు. ఆయన నుంచి - నందనోపనంద సునంద విశ్వనందులనే నలుగురు శ్వేతవర్ణులు శిష్యులుగా ఉదయించారు. సద్యోజాతుడు బ్రహ్మకు సృష్టి గురించి తెలివికలిగేలా  చెప్పి శివజ్ఞానాన్ని అందరికీ ప్రచారం చేసేందుకు అక్కడి నుండి వెళ్ళిపోయాడు.  

ఆ తర్వాత యిరవయ్యవ రక్తకల్పంలో ఎర్రరంగుతో కూడిన బ్రహ్మ, శివుణ్ణి ప్రార్ధిస్తూండగా  కలిగినది వామదేవావతారం. ఈ వామదేవుడితో పాటు విరజ, వివాహ, విశోద, విశ్వభావనులు అనే నలుగురు శిష్యులు కూడా కలిగారు. ఆ వామ దేవుడే బ్రహ్మకు ప్రపంచాన్ని పుట్టించే శక్తిని ప్రసాదించి ఆ తరువాత మాయమైపోయాడు..

పీతవాసం అనే యిరవయ్యొకటో కల్పంలో శివుడు తత్పురుష బ్రహ్మగా పీతాంబరధారియై అవతరించాడు. ఆ అవతారంలో బ్రహ్మకు సృష్టిలో సామర్థ్యాన్ని కలిగేలా అనుగ్రహం కలిగించి ఆ తయువత మాయమైపోయాడు.  అప్పుడు అతనికి పీత వస్త్రధారులైన దివ్య కుమారులు అనేకమంది యోగమార్గాన్ని ప్రచారం చేసే వారు జన్మించినారు. 

ఆ తర్వాత శివకల్పంలో నల్లరంగు శరీరంలో నల్లబట్టలూ నల్ల పూలమాలికలూ, నల్లటి జందెమూ, నల్లకిరీటం ధరించి అఘోర బ్రహ్మగా ఆవిర్భవించాడు శివుడు. కృష్ణ, కృష్ణాస్య, కృష్ణశిఖ, కృష్ణ కంఠధరులు నలుగురూ ఆ అవతారంలో ఆయన శిష్యులు, అప్పటికి బ్రహ్మకు పరిపూర్ణ సృష్టి సామర్థ్యాలను సమకూర్చారు. ఆ తరువాత వెళ్లిపోయారు.  

అయిదవది ఈశానావతారం, విశ్వరూపకల్పంలో బ్రహ్మ సృష్టికారక పురుషుణ్ణి పొందగోరి శివధ్యానం చేస్తుండగా ఒక మహానాదం ఆవిర్భవించింది. ఆ నాదంలోంచే శుద్ధ స్ఫటిక వర్ణాస్యుడు - సర్వభూషణ భూషితుడు అయిన ఒక పురుషుడు పుట్టాడు. ఆయనే ఈశానుడు. ఈ యీశానుడే బ్రహ్మకు సృష్టియొక్క క్రమాన్ని ప్రసాదించాడు. జటి, ముండి, శిఖండి, అర్ధముండి ఈశానుడి శిష్యులు. 

ఇలా శివుడి అయిదు అవతారాలు బ్రహ్మకు ఈ సృష్టి ఆవిర్భవానికి, దానికి కావలసిన శక్తిని, యుక్తిని, మార్గాలను అన్నిటినీ భోదించాయి. 

ఈ పై అయిదు అవతారాలే పంచబ్రహ్మావతారాలు, వీరిలో ఈశానుడు ముఖ్యుడు. జీవుణ్ణి అధిష్ఠించి వుండే వాడు ఈయనే. ఈయన తత్పురుషుడు. సత్త్వ, రజో, తమో గుణాలను ఆధీనంలో ఉంచుకుని వాటిలో నివసించేవాడు.  అఘోరుడు బుద్ధి తత్వవాసి. వామదేవుడు అహంకారాన్ని, సద్యోజాతుడు మనస్సునీ ఆవహించి వుంటారు. 

◆ వెంకటేష్ పువ్వాడ